新鴻基地產、恆指成交金額萎縮 (Sept 3, 2026)

 News 1: 新地 (0016) 應該可以投到屯門16區發展權

市場傳出，屯門第16區第二期，估值有機會超過百億元。這是一個大項目，是屬於港鐵 (0066)的，而且已經截標了，相信好快就會有結果出現。因為呢塊地實在太大塊啦，據說住宅總數單位可以高達5,510個，直程係一個巨型社區啊。第一期的地皮由新地投得，據高層說，第一期的總投資金額高達$60億港元，可興建的數量大約是1,280個單位。而第一期的分紅比例是29%歸港鐵，餘下的才是新地的。據說落成之後，要賣到$1.5萬元-$1.7萬元左右，以現在市況來看，屬於正常偏高，不過，如果第二期都落入新地手上，咁就更加大型發展，理論上可以壓低建築成本，將來賣出去，可能會賺得更加多錢。

不過要記住，如果真的是落入新地手上，總數加起來接近7,000個單位，唔知要幾耐先至可以消化得晒呢。總而言之，第二期，相信總投資金額，不會少過$2百億港元，在香港，有能力獨資興建的，嚟嚟去去都係嗰幾間。現在在大概知道的是長實 (1113)、恆地 (0012)、新地獨資投標，而嘉里建設 (684)、信和 (0083)、中國海外 (688)和鷹君(0041)組成財團入標。李澤鉅的長實集團一定冇問題，手頭上大把錢，畀得起有餘。不過，根據過往紀錄，長實投唔到的機會率接近99%，哈哈哈，大家心裏應該知道點解。

至於恆地，除咗欠外邊錢之外，仲欠大股東四叔家族接近$800億元的債務，理論上，即使有能力投到呢塊地，亦都唔應該去投，應該將公司的財務狀況，搞得更加企理，呢個先至係最重要。至於由信置組成的財團，機會亦都唔小。不過我早前已經講過，如果信和仲係咁勇猛不斷去投地，手頭上揸住嗰$500幾億，相信好快會唔見一大截，到時萬一地產市道唔好，它現在擁有的優勢，將會一無所有，一點大家要小心。

所以最有可能勇奪呢一塊地皮，應該係新地，有協同效應，減低發展成本，而且它財政方面，都比較健全。如果其餘那些發展商得唔到呢塊地皮，也並不是一件壞事，因為只要新地食飽咗，以後其他地皮推出，新地應該唔會太落力去競投。最近香港都講緊加息，邊個手上越多地皮，越多未賣出的單位，情況反而越糟糕。所以你見到最近地產公司股價跌起上嚟，邊間公司跌得最少？答案係長實，因為佢手頭上最少單位等待出售，反而影響最輕微。

突發消息，當我剛剛完成上面的內容時，屯門的地皮已經揭標，得主果然係新鴻基地產，和我上述所推斷的，一模一樣。寫文章就有這個壞處，一旦慢慢寫，結果出了來，上面的文章內容，就沒有那麼好的閱讀性，真可惜！

Nwes 2: 恒生指數全日成交創新低

其實今天，我對恆指，有兩個指標。第一，希望恆指可以跌穿25,000點，不過呢個願望落空了。唔緊要，反正今日恒生指數都係跌，只要持續每日跌少少，相信跌穿25,000點，係遲早嘅事，所以我就熱烈期待。第二個指標，就係想睇吓全日成交金額，會唔會跌穿兩千億港元！呢個指標，今日終於達到了，全日成交金額只有$1,993億港元，到底啲錢走晒去邊度呢？

今日嘅全日成交金額可以作為一個指導性，睇吓九月份，到底有幾多交易日，交易金額會跌穿兩千億。起初在七月底、整個八月，都見到成交金額非常低，大家可能覺得是偶然事件，但隨着時間一日一日的 過去，看來並非偶然事件。中國政府出了一連串的政策，好像都在破壞市場的投資氣氛，雖然恒生指數仍然在25,000-26,000點之間徘徊，但每日的成交金額，萎縮了很多，這個就不正常了。最起碼令到來香港排隊上市的IPO，都應該會受到影響。原因係，如果香港的交易額不夠高，代表市場不夠熱烈，新上市的公司，要炒起，似乎比較困難。

另外，港交所(388)的股價，都會肯定受到影響。九月份便是第三季度的最後一個月，如果情況還沒有改善的話，港交所第三季度的業績，將會難睇，到時還怕股價不跌？今天，港交所的股價還徘徊在$403元左右，如果每日成交金額繼續萎縮，而且持續到年底，我敢打賭，港交所的股價必定會創全年新低，即是低於$360元，大家慢慢留意吧！

美國的加息趨勢，似乎越來越明顯，萬一真的加息起來，肯定將恆指再踩多一腳，所以下一個目標，應該是看24,000點，這樣的話，淡友應該很高興。例如我經常投資的7500，如果恒生指數從現在水平跌至24,000點，理論上7500的股價會升近一成，因此股價可以攀升到大約$1.88元，夠好未？未夠，因為對上一次，我最高出售7500，股價係$2.18元，希望可以再見到呢個牌價，不過到時可能好友已經被恆指，嚇破膽，哈哈哈！

後語

由於我的YouTube頻道，被封鎖了賺錢能力，現在一毫子都賺唔到，但係我又想同大家見面，所以就寫下散文，一來可以抒發一下，二來都仲有微博的廣告收入。所以在此希望各位俾面，睇吓文章之餘，幫手按一按文章附近的廣告，希望咁樣可以得到少量的廣告費，多謝大家幫忙，感激不盡！