大快活用AI翻身、恆指的走勢 (Oct 20, 2026)

News 1: 大快活 (052)靠AI發盈喜

剛剛得到一個消息，大快活竟然發出盈喜，上年上半年，大約賺咗$1300萬港元左右，即將公布的今年上半年，據說可以賺到$3200萬元至$3400買完左右，咁咪好叻仔？其實一間咁大間嘅公司，半年賺$3000幾萬，唔係咩大不了，不過，而家環境唔係咁好，可以有盈利已經要還神。而家仲可以盈利大增長，就更加難能可貴。到底有咩奇招，令到大快活盈利可以急升呢？答案原來係好搞笑的用咗AI嚟幫手。點樣幫手呢？大家細聽一下。

其實我哋可以當AI係一個聰明絕頂嘅高手，但係淨係絕頂高手係冇用嘅，要將佢擺喺任何一個範疇裏面，佢就可以發揮到威力。今次大快活就犀利啦，將佢擺喺數據分析層面上，去睇吓點樣去推廣產品。另外，亦都搵用AI，去分析和揀選新的店舖位置，加強人流，賺錢自然多囉！仲有，喺生產方面，亦都問AI如何增強效率，減少步驟，AI又真係幫到佢手喎。所以最後，大快活就可以發盈喜嘞，你話幾好呢？

其實如果講市值，大快活嘅市值只有$6億港元左右，唔算特別大間的企業。根據市場資料顯示，它的市盈率大約14倍，而且派息相當之唔錯，直至到2026年三月底為止，全年派息$0.3港元，回報率大約有6.4%，睇落去非常之吸引，但係你要記住，香港而家市道唔好，一時半刻，仍未有改善，並不代表以後都會有大幅改善，所以買呢啲股，一定要衡量得清楚。2026年全年賺到$4200萬港元，派息比率高達94%，差唔多盡派。新嘅一年，上半年發盈喜，全年業績，可能比上年勁好多，如果繼續以超過九成的派息率嚟計，有機會股息加得好緊要，隨時可以令到股價炒上去，問題係你夠唔夠膽投資喺呢一間公司身上。

大家樂 (341)，又係大快活嘅親戚，又係大快活嘅競爭對手，但係大家樂嘅市值，就大過大快活好多倍，市值大約$31億港元，比起大快活，大超過五倍。論實力，應該大家樂好啲。大家樂2026年賺到$1.64港元，每股盈利$0.2866港元，但卻派了$0.4港元的股息，派息比率接近140%，所以冇理由長期可以咁樣派。但係大家樂已經連續兩年，每年都派$0.4港元股息，如果今年都一樣的話，股息回報率高達7.35%，比大快活仲要高，好似好吸引咁。

但係而家做得大，有機會輸得更加慘。雖然大快活啱啱發出盈喜，但未聽到大家樂會發出盈喜喎，所以如果要投資，都係睇吓有冇好消息出現，如果冇的話，大家樂嘅情況就唔係大家想像中咁樂觀，咁就無謂搏啦。其實呢兩間公司嘅股票每日成交金額唔多，最麻煩嘅就係，買入容易，賣出可能好難。所以如果係投資喺呢啲公司身上，相信都係貪圖他的股息，應該會作長線持有。不過，現在的環境，長線持有呢類蚊形股票，是否應該呢？大家又要諗一諗啦。

News 2: 恆指第四季的走勢預測

首先，我希望大家用少少時間，睇吓上邊呢一幅圖，係我根據一月初至到九月底所收集的數據，製造出來的。喺張圖裏面，你會見到有五個黃色的號碼，請大家記住它們的位置和資料。

對上一次，我整同樣的一幅圖出來，不過資料方面只係由年初去到六月底為止。根據當時的數據顯示，恒生指數喺在極端的情況之下，預期可以在22,758點至到28,872點之間波動。而事實上，恆指在一月底創過最高峰的28,056點。而在6月26日，恆指亦創出全年低位22,518點，最高最低相距5,538點，對一啲鍾意炒期指嘅人嚟講，波動大，娛樂無窮。

結果是，預期的數據 (22,758~28,872)和事實的數據 (22,518~28,056)非常接近，這代表，收集數據後用統計學來預測恒生指數，有一定準確性，值得參考。

今天恒生指數又係冇釐心機，垂頭喪氣跌到落去23,867點，甚至連電台和電視台的財經評論員，個個都講到冇心機，好可憐的港股。既然港股第四季亦已經展開了，餘下呢一季，到底會令到今年恆指有升幅，還是跌幅呢？2025年12月31日 (最後一個交易日)恆指報收25,630點。所以暫時嚟睇，目前嘅恆指係潛咗水，它要喺12月31日之前，由現在的水平升到去25,630點，升幅要有1,763點，或要升近7.4%，話易唔易，話難吾難。

睇返上圖，恆指平均點數為25,544。全年的合理範圍波幅，應該係由第二點去到第三點，即係23,578點 ~ 27,510點。如果再走極端一點，恆指嘅波幅範圍會擴大到去22,595 ~ 28,493。最近劉央又出嚟講嘢，她話中國經濟勢頭好，應該可以上返27,000點或以上。她呢個講法，我唔反對，因為根據上圖所顯示，27,000點，大約是貼近+2SD，即係貼近27,510。不過佢話如果勢頭再好啲，恆指有機會挑戰30,000，呢個講法，暫時喺呢一張圖裏面，見唔到會出現。但係唔代表唔會出現，只不過個機會率，係低到微乎其微。

反而係，每一次她出來唱好恆指的時候，往往市場去向就係同佢對着幹。對上一次係今年年初出嚟講一講，恆指大約跌咗三千點。如果佢今次，出嚟講完之後，唔好話跌三千點，就算跌多兩千點，都已經夠攞命。以今日嘅收市23,578點嚟睇，再跌多兩千點，咁就得返21,578點。喺上圖嘅數據嚟睇，喺極端情況之下，恆指都有機會跌穿22,595點，即係跌穿-3SD的水平，但係要跌到落去咁深 (21,578點)嘅水平，理論上難啲。

最後，大家不妨將我上圖收藏起來，每日都欣賞一下，睇吓恆指每日去到邊一個水平，其實都幾有趣㗎。我有個朋友最近講咗一單嘢，我覺得又好笑，又極有可能。事緣係，周凱旋話誠哥喺2021年已經講咗山雨欲來風滿樓。不過，她在2023年才講出嚟，好難界定係真定假。但係如果由2023年開始計，既然誠哥都睇唔好香港嘅運程，以佢咁聰明，冇理由唔買期指跌㗎！不過，如果喺2023年買恆指跌，應該冇得贏，而且仲會輸獲金嘅！反而係在2021年買恆指跌的話，咁就有著數啦！

所以你覺得超人會唔會因為睇淡香港嘅經濟，而去沽空港股呢！我朋友話會喎，不過梗係唔會用自己個名啦，因為如果俾阿爺知道咪好大鑊，隨時抄家滅族，哈哈，有趣！

後語

由於我的YouTube頻道，被封鎖了賺錢能力，現在一毫子都賺唔到，但係我又想同大家見面，所以就寫下散文，一來可以抒發一下，二來都仲有微博的廣告收入。所以在此希望各位俾面，睇吓文章之餘，幫手按一按文章附近的廣告，希望咁樣可以得到少量的廣告費，多謝大家幫忙，感激不盡！

加息影響美股、智能手機大鑊了 (Oct 17, 2026)

News 1: 美國要加息壓抑通脹

九月份，美國聯儲局加了0.25%的聯邦基金利率，現在最新區間是3.75%-4.0%。今年如下仲有兩次例行議息會議，最快一次將會在10月27日至28日公布議息結果。原本10月份加息的機會率都好高，但市場上普遍相信，10月份盡量都唔加息，原因就係要讓路比特朗普的11月中期選舉。因為一旦加息，衝擊力實在太大啦，可能會危害到特朗普和共和黨在中期選舉勝出的機會率。如果真係避得過初一，但係都未必避得過十五，因為2026年最後一次議息，是在12月8日至9日，市場普遍都相信，十二月份一定會加息，原因就係經濟數據顯示出通脹並沒有回落，所以必須要加大力度控制，否則麻煩將會接踵而來。

最近美國公布咗兩個數據，一個係生產者物價指數，PP I 。另一個係消費者物價指數，CPI 。詳情如下。

美國9月PPI (生產者物價指數)，年增率: 6.3% (創 2022 年 12 月以來最大漲幅，高於預期)，而月增率: 1.3% (創四年半以來最大單月漲幅，遠超市場預期)。 

美國9月CPI (消費者物價指數)，年增率: 3.7% (高於市場預期與前值)，而月增率: 0.6%。

我哋先從PP I入手。你可以簡單地將PPI睇成出廠價。如果呢個出廠價升咗，某程度上代表一間工廠可能係原材料價格升咗，又或者係工資升咗，所以冇辦法之下，生產出嚟的產品，都要賣貴啲。舉個大家都懂得嘅例子，就係台積電（TSM)，今年的七月已經加咗一次價，原因係原材料貴咗。明年年初，亦都會再加價，原因都係一樣。

台積電的主要兩大客戶，是蘋果(AAPL)和輝達 (NVDA)。當台積電加價之後將AI晶片賣俾蘋果和輝達，你估呢兩間公司會點做？當然梗係要睇吓可唔可以盡量將出廠價完全地轉嫁比消費者啦。如果可以嘅話，咁就會由消費者承擔所有晶片的加幅，從而推高CPI。

另一個做法，例如蘋果咁，九月份公布新iPhone的售價時候，竟然有驚喜，原因係因為蘋果克制地加價。因為蘋果管理層都知道，將所有成本轉嫁比客戶，可能會帶來更大的損害。例如，如果蘋果將iPhone加價得好厲害，消費者未必負擔得起的情況下，有機會延遲換機，咁樣已經可以對蘋果造成極大傷害，所以蘋果要克制。接下來，就要睇一睇蘋果嘅銷售額，有冇因為新iPhone加價已受到影響，如果影響不大，咁係一件好事。如果銷售額跌得緊要，咁恐怕蘋果的股價將會大跌，所以咪要小心囉！

聯邦儲備局的通脹目標係2%，而最新的數字是3.7%，還是不斷擴張當中，似乎控制不了，所以聯儲局只能夠用加息來抑壓通脹。好多人都會問，美國嘅通脹嚟自邊度㗎？呢個係一個好有趣嘅問題。根據消息所指，9月CPI與PPI雙雙高於市場預期，主要受到能源價格 (如汽油飆升)以及漲勢向服務業擴散的影響。 所以原因都已經好清晰，就係油價影響。早前美國政府先至控制咗委內瑞拉，又或將來石油價格將會變得好便宜，但似乎現在看來，和特朗普所說的情況有很大出入。石油加價，運輸費用一定加，然後好快就會蔓延到所有超市都會加價。

美國情況我不太了解，但係美國的鄰居加拿大，同樣受到油價高升的影響，食品的價格亦都慢慢升起來，對一些收入不高，又要租樓，又要養車 (必需品），又要交稅，又有其他雜費要支出，所以最終生活上，苦不堪言。如果加拿大嘅情況係咁樣，相信大部份美國的打工仔，都應該遭遇到類似的景況。所以如果通脹控制得唔好，令到人們的生活環境越嚟越差，美國遲早會出事。例如人民會上街遊行、會反政府，會要求改革，一旦情況失控，咁就大鑊囉！大家唔好以為呢啲景況在遙遠的未來，其實可能越嚟越近，甚至有機會，明年2027年，就會開始爆發。

加息的確可以壓抑通脹，原因係息口越高，理論上人們會將錢存入銀行賺取利息，所以佢哋就唔會去消費太多，咁即係需求下跌，嗰啲超級市場，見到冇人買嘢，自然就會減價促銷。隨着呢個路線走，通脹就可以慢慢降下來。但係大家要記住，加息就好似食藥咁，食得多，都會有後遺症。

冇錯，超市見到冇人幫襯，自然會減價促銷，但同時如果超市冇錢賺，公司亦都會諗辦法去節省成本，裁員是一個直接的方法。另外就是減少開新舖，這就是叫做減少投資。又裁員、又減少投資，跟着市民節衣縮食，連消費都大減，美國嘅GDP會好嗎？美國的股市會好嗎？另外美國經濟佔了全球¼。一旦美國冧檔，環球經濟可以頂得住嗎？當然冇可能能頂得住。

最慘嘅就係歐洲，本身已經借錢太多，夠晒窮。現在能源價格上升，歐洲已經自行加息，但係你睇吓法國的情況，好多人上街遊行，責罵政府減少支出，破壞他們的原有福利。如果呢個趨勢持續，歐洲其他國家都會有人示威、遊行、反政府。作為全世界第二大經濟體系的歐洲出事，再加上美國如果再出事，恐怕自1933年之後，再嚟多一個經濟大蕭條，一啲都唔出奇。

所以我奉勸各位，如果手頭上仲有一點錢的話，要好好利用，因為有AI嘅衝擊，自己份工可唔可以保得住，都成一個問題，儲備越多，受到外來嘅衝擊就會越少。李嘉誠係咁講，李澤鉅都係咁講，甚至連股神巴菲特都揸住大把現金喺手，你就知道未來的情況，最好唔好估得太樂觀，否則願望落空，得到的痛苦將會更多、更慘！

News 2: 智能手機危機四伏

今年10月16日，晚上八時左右，蘋果最新產品「摺疊屏手機 iPhone Duo」將會正式在線上預購。喺我未講結果之前，想問一問大家，覺得呢款新的手機，會否熱賣呢？根據在北京的消息指出，預購開啟後，iPhone Duo各版本均快速售罄，官網與各大內地電商一度集體「藍屏」。這是什麼意思？即係話，你想在線上買到最新嘅iPhone手機，都冇機會，因為喺好短時間之內，已經被搶購一空。

有一些幸運的中國客戶，雖然買到最新的摺疊機，但不是馬上可以拿到實物，而係要等到12月，才可以收到實物，足足要等起碼一個半月，實在太痛苦啦。據悉，iPhone Duo官方定價15,999元人民幣至26,499元人民幣 。有一些有錢人，等唔到咁耐，唯有出高價去搶購，根據市場消息指出，有人願意多出7,143元人民幣，希望可以馬上攞到實物，馬上用，看來中國雖然經濟環境不太好，仍然有一批不愁穿、不愁吃的有錢人，仍然願意出高價去嘗試新產品。可能係呢個原因，所以蘋果的股價亦都非常硬淨，報$343美元一股，而且市值亦都再次衝破$5萬億美元，厲害。不過整體蘋果的產品是否在全世界熱賣，還要觀察多一段時間，等待聖誕節過後，計一計數，便知道今年生意額如何了。大家要記住，生產成本貴了，即使蘋果產品熱賣，因為有一部份成本不能轉嫁給客戶，所以最實際梗係要睇埋蘋果嘅純利。萬一營業額好，但純利倒退，咁就唔係一個好消息啦。

可能今年經濟實在太不明朗，換手機熱潮不再了。根據IDC全球季度手機追蹤報告的初步數據，2026年第三季度全球智能手機出貨量按年下降22.0%至2.553億部，創下有史以來最大季度按年降幅。手機已經是我們生活的一個重要部份，如果有能力的話，係人都想換一部更新、更快、更勁的手機。偏偏今年第三季手機出貨量跌了22%，即係市場呢個餅細咗，理論上所有生產智能手機的企業都冇運行，所以大家都好想知道，到底這些企業，流失的生意額有幾大影響呢？

全球五大手機生產商，佔了全球市佔率近75%，餘下的25%，就由其他細廠商去瓜分。呢五間企業以市佔率來排列。第一位，韓國的Samsung，市佔率22.6%。第二位，美國的Apple，市佔率22.4%。第三位，中國的小米，市佔率12%。第四位，中國的OPPO，市佔率10%。第五位，中國的Vivo，市佔率7.5%。以上的市佔率數據是2026年第三季。如果和上年同一季度比較，你覺得呢五間企業，邊一間嘅跌幅最恐怖呢？答案即將揭曉！

跌幅第一位，OPPO，跌了34.5%。

跌幅第二位，Vivo，跌了31.5%。

跌幅第三位，小米，跌了29.2%

跌幅第四位，Samsung，跌了5.8%

跌幅第五位，Apple，跌了4%。

由此可見，中國三間企業，手機出貨量大量萎縮，點解呢？是產品不好？還是因為它們手機加價，在性價比的情況下，聰明的消費者選擇了Samsung和Apple手機？不過現在好明顯，蘋果跌幅最少，就正如股神巴菲特所說，蘋果這個品牌，黏貼力好強，流失客戶最少。

小米 (1810)的出貨量由2025年第三季的4,340萬部，減少到2026年第三季的3,070萬部，呢一個跌幅，可以令到小米盈利受到巨大影響。小米2026年上半年業績，已經倒退了34.46%，但亦賺到近$164億港元。不過現在看起來，第三季嘅銷售量都咁差，如果第四季都係咁樣，恐怕小米全年業績，分分鐘純利大跌一半。唔怪得之最近它的股價由年初的若$38港元一股，跌至現在的$26.6元，如果壞消息陸續出現，相信其股價還有排跌，即使跌穿$20元，我也不覺得奇怪。

至於蘋果，雖然出貨量少了4%，但仍然影響業績表現。正如我上述所講，成本的上升，蘋果自己都要硬食一部份，所以應該會影響其毛利，對它的純利的影響可能更大。所以求神拜佛，都希望iPhone最新整個系列，都能夠賣得好，盡量減少損失，如果唔係，蘋果股價跌落嚟，肯定拖低整個美股，到時就大家都冇運行。我們應該要有呢一個心理準備。

後語

由於我的YouTube頻道，被封鎖了賺錢能力，現在一毫子都賺唔到，但係我又想同大家見面，所以就寫下散文，一來可以抒發一下，二來都仲有微博的廣告收入。所以在此希望各位俾面，睇吓文章之餘，幫手按一按文章附近的廣告，希望咁樣可以得到少量的廣告費，多謝大家幫忙，感激不盡！

中國出口強勁、長實打爛自己招牌 (Oct 16, 2026)

News 1: 中國出口搵外國人錢

內地海關總署公布，以美元計價內地9月出口 (Exports)額按年增長36.3%至$4,471.8億美元，遠超市場預期的25.7%。進口 (Imports)按年升31%至$3,136.5億美元，升幅亦優於市場預期的25%。貿易盈餘則擴大至$1,335.3億美元 ($4,471.8億美元  - $3,136.5億美元 )，高於市場預測水平。今年首三季，內地進出口 (Exports & Imports)均保持逾20%升幅，貿易盈餘已達$9,381億美元（平均每個月錄得貿易順差$1,042億美元），令全年貿盈有望超越去年水平再創紀錄高位。

2026年全年有望錄得貿易順差$12,504億美元，以14億人口計，每人平均可以從外國賺到$893美元。如果真係落到人民口袋裏，其實是一筆非常可觀的收入，起碼可以幫補一下生計。根據IMF預測，中國2026年GDP總值大約$20.8萬億美元。所以雖然淨出口 (Net Exports)可以錄得$12,504億美元，不過其實只係佔GDP若6%左右，其餘的94%，就要靠其他因素來湊夠。而最重要的支撐就係「本地消費 (Domestic Consumption)」 ，根據網上所提供資料，中國嘅GDP大約有45%至54%是來自「本地消費」，如果呢個板塊受到嚴重衝擊，中國的GDP根本冇可能有增長，甚至應該會係倒退。

按金額和地區劃分中國的貿易夥伴如下:

9月新興市場出口亦持續增長，其中出口至最大貿易伙伴東盟的貨值為$817億美元，按年升52.3%。 

9月對歐盟出口按年升25.3%至$601.51億美元。 

9月對美國出口按年大增39.6%至$478.8億美元，創逾5年來最快增速；對美國的貿易順差升至$340億美元，為2025年1月以來的最高水平。

人們經常都將GDP和通脹混為一談。經濟學上，的確有一種說法，就係「一個國家有通脹，這個國家嘅GDP就會有增長」，呢個講法原則上都成立，但係睇吓點樣去解釋通脹的由來。根據國家統計局公布，9月內地居民消費價格指數 (CPI)按年上升0.9%，低於市場預期的1%。 工業生產者出廠價格 (PPI)卻按年上升5%，創2022年6月以來新高，亦高於市場預期的4.4%。9月PPI與CPI差距為4.1%，分析指內地CPI未見廣泛上升，受限於國內需求不足，原材料價格上升難以順暢傳遞到終端消費品。

其實通脹可以由兩方面帶起。第一方面，來自「需求 (Demand-side effect)」。第二方面，可以來自「供應 (Supply-side effect)」。兩者都會造成通脹，但係情況就會非常之不一樣。

舉個例子，10年前嘅香港，依然有好多有錢嘅內地人，落嚟香港購物、置業、求學等，這種全面嘅需求，推動了物價、地產、學位等嚴重不足，不能滿足內地豪客嘅需求，所以所有價格一直咁升上去。最經典例子，就係搶奶粉，搶到天價咁樣。然後就係地產業務，銅鑼灣一個靚舖位，一個月租金$400萬港元，因為舖租貴，所有產品價錢都係咁升，但係我哋港人當時仲接受到，因為我哋當時嘅經濟都唔錯，所以就有一句說話「有通脹，即係代表經濟好」。呢句說話在當時來說，係冇錯嘅。

但係如果係供應嗰邊出現短缺，造成通脹，咁就麻煩好多啦。舉個例子，美國攻打伊朗，伊朗政府封鎖霍爾木茲海峽，造成石油唔夠輸出去其他國家，呢啲叫做能源短缺。所以你見到油價不斷上升。一旦油價上升，運輸費用就會貴，有啲貨品，運到個超級市場，價格都會高啲。一旦超級市場裏面嘅產品價格上升，咁就差不多是全面性加價，呢個亦都會造成通脹，但係這樣是代表經濟好嗎？未必！

中國現在嘅情況，根據上述所描述，係PP I上升，導致CPI上升。另外仲有一個更恐怖嘅情景就係，PPI上升5.1%，CPI只是上升了0.9%，完全跟唔上，呢個係咩情況呢？就係出廠價雖然貴咗，但係去到消費者手上，零售價都係加些少，不敢加太多，點解？因為需求實在太低迷，人們沒有錢，如果再大幅加價，市民承受不了，只會買得更少，到時嗰啲商家，死得仲慘，因為將會有大批貨賣出去，擺喺貨倉，無法變現，不破產才怪！呢個可能就係現今中國嘅狀況。

其實香港都唔會好得去邊，來貨價貴了，反而超市的價格越嚟越平，最終做到超市冇錢賺，不過對我們消費者來說，向好方面諗，啲嘢平啲，我哋咪開心囉。但係長遠唔係辦法，超級市場賺唔到錢，遲早會裁員，到時一大堆人冇嘢做，香港經濟又點會好呢？所以大家要睇餸食飯，賺到嘅錢，盡量留喺自己身邊，小心去運用，為將來不明朗的日子作出最精明的準備。

News 2: 點解長實 (1113) 咁信得過卓越天工?

通常做生意嘅時候，俾人哋搵咗笨，應該會學精咗，唔會再相信嗰個搵你笨嘅人。但係今日睇到一段新聞，一向非常精明的長實李澤鉅竟然繼續用同一間起樓有問題的建築商「卓越天工」！根據消息所指，長實旗下仲有兩個樓花盆，分別在啟德和在元朗的樓盤，仍然繼續聘用「卓越天工」作為承建商。

呢間建築商，已經令到長實在觀塘安達臣道的「港人首置盤」要拆去其中三幢有問題的大廈，然後再重建，市場估計損失大約$12-$14億港元左右。我之前拍YouTube片嘅時候，都有提及過呢單嘢，但係有啲觀眾唔知點解，仲係覺得長實唔需要上身，因為係建築商嘅問題，應該由建築商去解決。問題係如果建築商冇能力解決，咁嗰個問題係會繼續存在？還是變咗冇問題呢?

最新消息報道係咁樣講:「發展局局長甯漢豪表示，就長實安達臣道「港人首置盤」而言，項目涉及2,900多伙，其中約1,000伙為首置單位，項目發現鋼筋出現問題，已經針對承建商及專業人士檢控，不過若項目未能在賣地條款限定的日期前依期完工，政府有權收取補地價安排，而發展商與承建商之間的合約問題，則要交由雙方自行處理。」 其實都覺說得好清楚，和政府簽約的是長實。如果到時長實交唔到貨出嚟，政府只會搵佢麻煩。但係按照現在的建築進度，應該冇乜可能可以按時交樓俾政府，所以好快應該又有好戲睇啦。

長實在啟德和元朗樓盤，理論上可以出售樓花。不過，地政總署指，會按實際情况，考慮發展商有否遵從預售樓花同意書的條件並採取相應的行動，以及是否需要暫停或撤銷有關的同意書。而屋宇署則指，該署會多次突擊巡查有關地盤，至今未發現有明顯不符合批准圖則的情况。咁即係點？即係話，如果喺巡查嘅時候，沒有發現建築物有偷工減料嘅情況，咁就會放行，准許長實可以買樓花。

長實呢一排嘅情況咁唔理想，當然有報館去詢問現在情況如何。長實發言人稱，就旗下所有樓盤，集團均責成承建商作嚴謹監管，確保樓宇合規及安全。呢句回覆實在太過求其，答咗等於冇答。如果真係咁嚴謹監管，安達臣嘅樓盤就唔會出現偷工減料，要拆卸重建嘅情況啦！

雖然卓越天工因為安達臣樓盤事件，已被長實更換，但其過去曾屬多個樓盤的承建商，如長實油塘親海駅1、2期、宏安 (1243)大角嘴Larchwood，以及長實、新地(0016)合作的屯門青山公路大欖段飛揚1、2期。唔知道呢個消息會唔會影響之前已經落成的樓盤，萬一真係要賣平啲，咁就對嗰啲業主好唔公平啦，不過最緊要都係一樣嘢，就係樓宇嘅結構冇問題，咁樣住落去，都唔會咁驚。

其實真係唔明白長實點解會搞到如此田地？令到其股價亦都不斷下滑。由今年的五月高峰約$53港元，跌到現在，只剩下$44.5元，回落了16%。其實這是不應該的，因為其最近出售一些英國業務，賺咗好多錢，理論上股價應該升得更加緊要，可惜事與願違。目前長實手上持有$565億港元，扣除所有債務之後，債務比率低，如果你仲係覺得呢一間公司值得投資的話，現價買入，希望可以再衝上$53元，回報率都相當唔錯。

據說香港的地產市道好些，原則上需要為旗下資產再度減值的機會唔大，如果業務可以保持平穩，呢間公司嘅派息政策，應該會相對穩定。目前股息回報率剛剛好4%，沒有太大驚喜，不過如果在一個不確定的股市上面，能夠有一間公司，手持大量現金，而且業務穩定，應該可以下注去投資一下。最衰呢排劉央又出嚟講嘢，所以害怕港股隨時都冇運行，如果真的是這樣，相信長實的股價還會繼續跌，是否應該等候一個好機會增持呢？大家確實要諗一諗呢個問題啦。

後語

由於我的YouTube頻道，被封鎖了賺錢能力，現在一毫子都賺唔到，但係我又想同大家見面，所以就寫下散文，一來可以抒發一下，二來都仲有微博的廣告收入。所以在此希望各位俾面，睇吓文章之餘，幫手按一按文章附近的廣告，希望咁樣可以得到少量的廣告費，多謝大家幫忙，感激不盡！

騰訊又唔夠錢使? 要黃金投資嗎? (Oct 14, 2026)

News 1: 騰訊又要伸手問市場攞錢

在10月7日，寫咗一篇文章，其中一條新聞寫着「寧德騰訊一鑊熟」，當時講咗，呢兩間公司將會投資在即將上市的DeepSeek身上，雖然金額不詳，但肯定係過百億元人民幣兌，要記住，投資AI行業，以現時嚟睇，還是在燒銀紙階段，離開有收入，仲有一段遙遠的距離。離開要賺到錢，就更加唔使諗。

騰訊本身業績冇問題。2024年賺到$2,064億港元。2025年賺到$2,502億港元，增長超過兩成一，算係咁啦。不過，它的股價就好唔生性，由年初的$630港元，一直跌到今天的$424港元。而家肯定喺度挑戰緊全年低位的$411港元。2026年上半年，仍未仍然有穩定的增長，一共賺了$1,319港元。如果下半年冇任何問題的話，全年可以賺近$2,700億港元，甚至更多。所以其股價下跌，實在有點古怪，諗唔通。

在2025年底，騰訊手上持有現金有3,848億元人民幣。到了2026年六月底，騰訊持有嘅現金進步，加強到4,289億元人民幣。

投資AI建設，已經喺騰訊嘅基本動作。翻查資料顯示，在2025全年 CAPEX (資本性開支)為792億元人民幣，按年增加約 3%。但到了2026年第二季單季 CAPEX 已達528億元人民幣，按年暴增176%。管理層亦明確表示，2026年大幅增加算力 (compute)採購及AI 基礎設施投資。可能在2026年初，已經有一批醒目嘅投資者，知道騰訊將會大量投資落去AI基礎建設，覺得風險度增加，所以喺市場沽貨，走咗先算。

另外仲有一個重要因素，就係騰訊嘅大股東 (Prosus)，一直都係市場沽貨，而騰訊亦都非常有規律，不斷在市場回購股份，幫手接大股東啲貨，亦都幫手托住個股價。可惜今年2026年，並非騰訊的好年，股價不斷向下跌。2024年，騰訊共用超過$1,120億港元回購股份。2025年，也動用了$800億港元回購股份，今年呢？據說到目前為止，只是動用了$320億 港元回購股份。回購股份的金額越嚟越少，肯定係將啲錢搬咗過去投資AI建設。所以因為回購股份金額少咗，股價冇咗支持力，跌得比較厲害，可以想像和理解！

最新消息，騰訊計劃發行4筆票據，集資逾$56億美元。4筆票據分別為金額$13億美元十年期、金額$5億美元二十年期、金額200億人民幣十年期和金額60億人民幣三十年期。2筆美元票據集資淨額17.9億美元，2筆人民幣票據，集資淨額258.9億人民幣，用於一般企業用途。騰訊已經講咗，集資返嚟嘅錢將會用於支持人工智能AI領域的投資，希望唔好「抌錢落海」就得啦！

我計一計條數俾大家睇，2025年騰訊賺了$2,502億港元，不過佢嘅使費都好大。例如：利息支出132億元人民幣，股息支出400億元人民幣，償還貸款1,767億元人民幣，資本投資792億元人民幣，回購股份$800億元港幣，以上嘅有用人民幣作為單位，又有以港幣作為單位，不過你計一計條數，你就會發覺騰訊所賺的$2,502億港元，其實都唔夠用，除咗問銀行借錢之外，好似今次咁，要發行中期票據，先至頂得住。而家睇落去，最驚係現金流可能會出現問題，大家要小心。下一個股價心理關口，就係睇吓會唔會跌穿$400港幣。如果跌穿咗，咁就會麻煩啲囉。

News 2: 黃金作為儲備好嗎?

現在的環球環境，立立亂，都唔知爭咩貨幣好。雖然話美國的美元係世界貨幣，但係美國國債爭落咁多錢，舊嘅國債息率比較平，利息支出仲可以負擔得起。而家再發行國債，利率已經高咗好多，將來美國政府所比的利息支出，肯定會大量增加，美國會唔會爆煲唔知道，但係風險一定有，所以大家要睇路。

至於其他強貨幣，例如歐元、英鎊等，環境都唔係咁好。歐洲第二大強國法國，最近示威不斷，隨時衝擊政府，而且法國亦都欠落好多債，隨時都會瀨嘢。英國就更加唔使講，以前富有國家，而家係過氣的有錢佬，人民嘅生活非常一般，甚至有人形容住在英國的人叫做「能源的貧窮」，因為能源嘅開支實在太大啦，令到英國人嘅生活水準不斷下降。

所以我個人認為，某些國家嘅貨幣會貶值，持有一部份黃金(或銀)，未來可能有啲保障，不過唔需要持有太多。雖然黃金是國際貨幣之一，好多國家都認可，但係買舊金入嚟容易，賣出去就相當困難。舉個例子，如果你想買入一安士黃金，金行開價五萬元。但係當你買返俾佢，最多值四萬元，一來一回，唔見咗一萬元，何必呢?

咁點解要買黃金呢？喺香港，原則上唔會發生乜嘢重大危機。但係萬一有朝一日，香港亂起上嚟，身邊有少少黃金，就係可以攞嚟走佬用的。你唔好以為我喺度吹水，如果有朝一日，中國攻打台灣，搞到整個台灣海峽附近，一塌糊塗，危機四伏。到時乜嘢貨幣都未必用得到，黃金喺打仗嘅時候，價格就會飆升，隨時走佬，都可能要靠黃金。

不過喺國家層面，儲備多啲黃金，其實真係搵自己笨。根據中國人民銀行及國家外匯管理局發布的最新數據，截至2026年9月末，中國的官方黃金儲備已達2,410噸，呢一批黃金價值大約$3,226億美元左右。中國央行自2024年11月重啟購金以來，已連續第 23個月增加黃金儲備，創下自2015年以來最長的連續增購期。 根據世界黃金協會的數據，中國官方的黃金儲備總量目前位列全球第五大持有國。 分析普遍指出，中國持續狂掃黃金，核心目的在於推進外匯儲備多元化、降低對美元資產的依賴 (去美元化)，以及應對地緣政治與國內避險需求。 

最後尾嗰句才是最重要「應對地緣政治」，因為萬一中國和台灣開拖，美國一定會制裁中國，到時美元呢條路就行唔通，要改用黃金作為買賣的貨幣。不過黃金來作貨幣，實在太麻煩了。大家試諗吓，假如中國向沙地阿拉伯買入價值$100噸黃金的石油，然後將黃金交俾沙地阿拉伯，咁你話煩唔煩？首先，沙地阿拉伯都驚你呢100噸黃金，唔知係真定假。第二，呢100噸黃金嘅運費、保險費，肯定非常貴，萬一中途俾人截劫，咁點算呀？而且好似中國咁，有咁多黃金儲備，淨係搵個地方來擺放，仲要有特別防盜設施，又要大量人手看管，呢啲都係持有黃金嘅成本，都真係制唔過喎。

哈薩克央行開始出售黃金儲備。美國國債孳息率高企，削弱沒有利息的黃金的投資吸引力。哈薩克央行稱，很久沒有見過美國國債孳息率在這些水平，令美元成為一個具有吸引力的選擇，降低黃金作為投資資產的吸引力，所以哈薩克央行開始出售黃金儲備。

哈薩克是全球第8大黃金生產國，哈薩克央行有權購買國內生產的全部黃金。自去年2月停止出售黃金以來，央行的黃金持有量已增至386噸，黃金佔外匯儲備總額的七成八，這個比例高得令人不安，計劃到今年年底前，將比例降至七成半。即係出售一部份黃金，變成美金，然後可以買美國國債，而家買入美國國債的回報率，可能高達6%。萬一將來高息周期過了，美國開始減息，到時美國債券價格就會升得好厲害，哈薩克隨時可以賺多一筆，總好過將所有儲備變晒做黃金，日日擺響金庫裏面，無所作為，而且機會成本特別高。

所以總結就係，除非呢覺得未來日子裏面，美元會崩塌，世界會好混亂，如果係咁，持有適量的黃金和銀係應該的。但係如果你覺得呢個世界唔會咁恐怖嘅，咁都要持有少量金和銀，因為呢啲貴金屬，可以隨時升到阿媽都唔認得。上年，銀價就係飆升到嚇死你，我都大賺一筆，點解？ 因為我喺好多年前好平嘅時候，買入咗一批中國熊貓銀幣，上年銀價升得太緊要啦，放咗一部份出去，賺咗起碼三倍，呢啲唔係我叻，只係時來運到，我都唔知點解。總之財神爺俾你嘅，你袋咗落袋就算啦，唔好問點解，哈哈哈！

後語

由於我的YouTube頻道，被封鎖了賺錢能力，現在一毫子都賺唔到，但係我又想同大家見面，所以就寫下散文，一來可以抒發一下，二來都仲有微博的廣告收入。所以在此希望各位俾面，睇吓文章之餘，幫手按一按文章附近的廣告，希望咁樣可以得到少量的廣告費，多謝大家幫忙，感激不盡！

滙豐改革、看中國奢侈品市場 (Oct 13, 2026)

News 1: 滙豐賺錢更加進取好唔好?

今日喺報章度聽到一個消息，傳滙豐明年起取消高層固定津貼，再提高花紅比例與表現掛鈎。滙豐一向俾人的感覺，四平八穩，值得信賴。所以喺我朋友圈中，我相信接近九成人，都係滙豐嘅客戶。滙豐喺香港扎根百幾年，傳統上好多有錢佬，都係滙豐嘅客戶，所以即使遇上經濟環境唔好，滙豐的客戶群質素，都係最高，某程度上可以話壞帳都會少啲。

新CEO上場，又係新人士新作風。手起刀落之下，已經cut咗唔少高層嘅津貼。例如什麼會所津貼冇咗，又例如什麼教育津貼都冇埋，咁樣一年大大話話，又可以慳返好多億美元的成本，驅動滙豐盈利再創高峰，其實呢啲都係好事，滙豐嘅股東，應該要舉腳贊成。不過，今次的改革唔係喺營運上的改革，而係要改一改風格。即係點？ 即係滙豐銀行嘅CEO希望滙豐銀行以後更加進取，為銀行賺得更加多錢，咁樣對滙豐股東好，對自己員工又好，因為呢一次嘅改革係多勞多得制。

只要員工能夠幫銀行搵多啲錢返嚟，自自然然花紅就會越派越多，呢啲就係「華爾街風格」。不過我就喺度諗，如果一般嘅銀行業務，無論員工怎樣努力，理論上都唔會令到業務突然間爆升。咁邊一個部門能夠為滙豐賺得最多錢呢？根據新嘅制度之下，肯定係滙豐嘅炒房啦。

如果滙豐要喺投資上賺多啲錢返嚟，就要更進取，要冒險，呢啲就係傳統英國銀行和美國銀行的分別。所謂高風險、高回報。如果樣樣事情都順風順水，肯定冇問題、肯定賺大錢。到時股息再派多啲，滙豐嘅股東肯定笑到見牙唔見眼。

問題又出現了，講明投資，萬一睇錯方向，輸起上嚟，亦都可以重創滙豐。所以喺投資風險監管方面，滙豐一定要做得好。但係監管做得好，炒房要發揮嘅機會又會少咗啲，兩難局面。不過，向壞方面去諗，就算俾你滙豐銀行贏九鋪，只要一鋪瀨嘢，隨時都會出事。大家應該還記得雷曼兄弟嗎？所產生嘅金融海嘯，由美國一路波及到全世界，包括了歐洲和亞洲。我還依稀記得，在英國的所有銀行裏面，只有滙豐銀行能夠獨力捱過呢一關，唔需要問政府幫拖，不過它的股價依然逃不過下跌的命運。

如果你是一位長期投資滙豐的股東，你希望滙豐銀行保持原有風格，穩打穩扎的去賺錢。還是贊同新CEO的想法，將滙豐銀行變成華爾街銀行之一，帶着貪婪的面具，不斷在投資上賺數巨大利潤 (亦都有可能係最大損失)。呢個係滙豐長遠嘅策略，作為滙豐嘅股東，亦都要睇緊一點，因為這個改革，亦未必係好事，又係嗰句，小心駛得萬年船！

News 2: 外來證據中國經濟疲弱

有一個吹水學生，成日話佢自己測驗成績好、考試成績好，差不多次次都攞滿分。但奇怪嘅就係，從來沒有同學仔見過這位吹水學生的測驗卷和考試卷。咁到底信唔信佢呢？以呢位吹水同學嘅本性，你再問多佢一萬次，佢嘅答案依然係所有成績非常好。所以只能夠從外面收風來推斷呢位吹水學生，到底係咪真係咁勁。例如某位老師講，今次嘅考試成績，大部份人都係勉強合格，冇人攞超過80分，咁如果呢位吹水同學仔話佢差不多次次攞滿分，咁你仲信唔信佢呢？

同樣地，中國嘅經濟數據，經常告訴我們，無論在什麼條件之下，GDP依然有好的增長，最多都係增長緩慢。但係有其他的經濟數據，透露了實情並非這樣。例如，最風光的時候，那些內地人來香港購物，買貴重物品，根本唔需要睇價錢，呢種豪氣，就是真的有錢。但是現在來的內地客，是不是還是這樣呢？我相信仍然有一班有錢的內地客，可以落嚟香港購物，只不過和以前相比，這些有錢的內地客數量，已經不可以和往日比較了，少了很多。

最近，全球最大奢侈品集團LVMH，上季銷售額增長乏力，主要受到中國市場需求放緩影響。LVMH第三季度營業收入185億歐元，內部自然增長較去年同期升1%，差過市場預期升1.52%，升幅亦低於第2季的3%；期內時裝和皮具業務收入下跌5%，跌幅大過市場預期的1.57%。

集團表示，由於中國需求放緩，拖累時裝業務表現，指上季中國消費環境更具挑戰性。LVMH一句中國需求放緩，代表了什麼呢？以前有錢的時候，中國人都非常熱衷奢侈品，越貴越好，因為買得起的話，可以炫耀自己的品味和財富。現在這種需求減少，直覺嘅判斷，就係這些原本富有的中國人，現在袋裏面亦都沒有那麼多錢，消費起上來，當然要將就將就一下。例如，以往會落嚟香港一次，可以消費$50萬港元，現在環境不好，可能消費$10萬港元。雖然仍然有消費力，但卻少了那麼多，不太尋常。

LVMH以往及現在都是以中國為主要市場。所以呢一個季度的業績，它什麼地方都沒有指出來，偏偏就是講中國對奢侈品的需求減退了。當然這間企業也不好過，據說今年以來，其股價已下跌逾四成，慘痛！

另外，近日中國人力資源和社會保障部網站發布了全國各省、自治區、直轄市最低工資標準情況 (數據截至2026年10月1日)。情況如下:

上海: 第一檔月最低工資標準為2,740元人民幣 (全國最高)，小時最低工資標準為25元。

北京: 第一檔月最低工資標準為2,540元人民幣 ，小時最低工資標準為27.7元 (全國最高)。

廣東: 全省第一檔月最低工資標準為2,680元人民幣  (其中深圳單列為2,700元)，第一檔小時最低工資標準為25.4元。

根據以上資料，如果是一個全職員工，每月工資大約也是4,000元人民幣左右，在這些大城市 (北京、上海、廣東) 要生存下來，根本不容易。從AI上顯示，在上海，一個剛剛大學畢業的年青人，如果有機會搵到一份寫字樓工，在小公司工作，扣除其他社保後，得到大約不到5,000元人民幣。如果能夠入到外國企業，待遇會好一些，社保後大約有6,500元人民幣左右。

請大家記住，我上述所提的，是中國的一級城市，年青人要活下來，也不容易。如果這些年青人不是上海本地人，又要租屋、又要食飯、又要搭車，一個月下來，還可以剩下多少錢呢？據說有一些來到上海打工的年青人，甚至每個月還要問在鄉間的父母那一些補貼，才能夠繼續在上海混下去。

我朋友仲好笑，佢話連貪官嘅收入都大減。點解？因為太多公司關門大吉，想去敲詐勒索都「冇門」。既然冇得貪，何來有得揮霍？所以我們不一定要從中國官方身上得到經濟資料，才能判斷中國的經濟方向。從這些蛛絲馬跡，亦能看得出大概的經濟狀況。

其實我有個心願，如果我可以去上海，一定走去恆隆地產 (101)旗下的兩個最主要商場行一行。只有親身到達那個地方，才能夠切切實實的感受到當地的經濟氛圍。在網上/在YouTube上有很多YouTuber都拍片提及上海，某些街道，人影都冇過。係咪真係咁誇張呀？好想親身去一趟，證明一下。

後語

由於我的YouTube頻道，被封鎖了賺錢能力，現在一毫子都賺唔到，但係我又想同大家見面，所以就寫下散文，一來可以抒發一下，二來都仲有微博的廣告收入。所以在此希望各位俾面，睇吓文章之餘，幫手按一按文章附近的廣告，希望咁樣可以得到少量的廣告費，多謝大家幫忙，感激不盡！

網購害死香港零售、美國家庭債務纏身 (Oct 12, 2026)

News 1: 個個都網購，香港店舖點算? 

我以前拍片嘅時候有提及過，我屋企附近有一間麵包店，同我哋好熟，我哋經常去嗰度幫襯，麵包店老闆亦都對我哋好好，甚至有時會送大量免費麵包俾我哋，街坊街里，關係融洽，非常好。直至到大約一年前，突然間聽到老闆講，麵包舖生意本身都倒退緊，加上竟然個業主喺續租嘅時候，話要再加多一萬蚊租金。麵包店老闆負擔不起，準備關門大吉。最終，麵包店終於關門了，應該都有一年時間，而呢一年時間，呢個舖位，根本就租不出去，直至到週一，看見這個舖位拉起閘內，似乎有人想租。我就係覺得奇怪，香港現在咁嘅環境，竟然仲有業主夠膽加租，最後當然得不償失，一年時間都租不出去，計吓會損失幾多錢？

其實在我住的地方附近，踏入2026年，附近的舖頭「執笠」、「關門大吉」的情況越嚟越嚴重。甚至連百佳、MarketPlace等大型超市，人流都絕對唔多，而且兩間大型超級市場都內捲起來，大打減價戰。對我哋呢啲消費者嚟講，絕對是一件好事，因為貨品平了，我哋啲銀紙見使了。但再想深一層，如果這兩間巨型超級市場，最終都係賺唔到錢，甚至要虧本，最後的結局會是怎樣？肯定會裁員兼且減少店舖，冇賺錢的店舖，一於關門大吉。

好多人都以為香港呢兩間巨型超級市場，會賺好多錢，但係我眼見嘅情況，兩間超級市場應該是掙扎求存 (都唔係諗住要賺錢㗎啦)，希望捱得過消費低迷呢一個浪。問題係，真的可以捱得過嗎？ 還是已經是一個結構性的問題？根本冇得話等佢好返。我哋香港人或者係香港經濟底子比較厚，所以捱得過呢一場疫情，但唔代表香港經濟冇內傷，其實我哋傷得幾嚴重，只不過易於面子關係，不好意思說出來。但人們的行為，擺到明就係話俾你知，而家搵錢困難，用錢方面，要更加smart，最好搵到一啲平靚正嘅產品，網購就是其中一個渠道，令到大家啲錢都見使，因為我哋已經冇以前咁風光，搵錢嘅機會越嚟越困難。所以既然係食緊老本，就要睇餸食飯，慢慢使錢，而且仲要使得其所。

根據明報報章所說，跨境電商衝擊本港零售商生意。本地連鎖零售商「文具佬生活百貨」早前在facebook發文稱，今年經營環境比預期更具挑戰，市道持續疲弱，行業競爭亦加劇。根據「文具佬」門店觀察稱，市民寧願留更多預算外遊，平時不急用的物品則習慣網購。

去年與文具佬作資源整合的「執笠倉」亦於本月初表示，其灣仔旗艦店租約將於11月中完結，點解？因為淘寶推出一個「免運費」政策，而呢個政策將會令到文具佬和執笠倉往後的生意更加難做。因為始終在平嘅產品都難以和淘寶上邊的網上店舖價格競爭，網上貨品價格，實在可以平到你唔信，香港實體店冇得打，呢場仗輸硬。

除了我哋香港人自己本身少咗喺香港消費之外，仲有另一個重要的因素拖垮我哋香港的實體消費經濟。根據資料所顯示，其實在疫情後，我哋香港居民對境外開支（即係離開香港消費）已經迅速回復起來，不過，來香港的訪客，消費能力卻沒有香港人在外消費那麼強勁。即係點？即係來香港的旅客人數持續增長（內地人居多），但他們的消費力卻不斷下降，所以咪進一步打擊本港零售銷售。

根據國家海關總署統計目錄，當中一項「低值簡易通關商品」，其從內地出口至香港的貨值由2019年約55億元增至去年468.65億元，增幅逾7倍 (無論是用人民幣或者是用港幣作為單位，這個升幅都是恐怖的)，證明了網購佔據了我們香港消費總額非常大的一部份。據報章所說，平均來說，每位香港人，每消費$4，就有一蚊來自內地的，亦即是25%的消費能力去了內地。如果呢個比例持續增加，即係代表在香港的消費比例繼續下跌，香港承受得了嗎？

我突然間記起我朋友說過一句說話，他說「1小時大灣區生活圈」的真正意思係，喺香港賺錢，喺其他大灣區使錢，現在我明白了。不過，淨係喺香港賺錢，但係唔喺香港使錢，長遠來看，得嗎？我好懷疑。

News 2: 美國經濟和消費將會轉差

美國人民貧富懸殊，可能會越嚟越嚴重。最壞打算，會有越來越多示威遊行，衝擊政府等等嘅情況出現。貧富懸殊情況有幾恐怖？而家和大家分享一下。

首先，近年美股大升，有買股票嘅人，身家增長快到你唔信。你知道美國的「科技七巨頭」(Magnificent Seven)合計市值接近$25兆美元，如果這7科技公司是一個國家，其經濟規模將位居全球第二，超越中國、德國、日本與英國且正逼近美國。當它們成為一股足以撼動經濟的力量，讓人不免擔心經濟力量異常集中所可能產生的問題。 

這七家大型科技股包括Alphabet (GOOG)、亞馬遜 (AMZN)、蘋果 (AAPL)、Meta (META)、微軟 (MSFT)、輝達 (NVDA)與特斯拉 (TSLA)。 我喺呢度再加多一間，變成科技八巨頭，就是台積電 (TSM)，因為它的市值也達到$23500億美元。而且現在全世界的AI晶片，差不多都要倚像它。

市場擔心的是這些公司生產的所有產品與提供的服務，就是全世界運轉所依賴的東西，而當你拔掉其中任何一個插頭，一切就會崩潰。例如，如果中國突然間攻打台灣，令到台積電不能夠運作，晶片的供應量會大減，其餘七大巨頭，便會無法運作下去，這樣的場面會令到整個世界經濟塌陷。要記住我上邊所描述，這八間巨企業，市值超過$27萬億美元，萬一崩潰，這個世界會變成怎樣，你有沒有想像過？一群少數的領導者，他們的財富，多到嚇死你。例如Elon Musk身家過萬億美元，絕對有能力和財力，影響整個世界的運作。

另一邊廂，聯儲局於上周五公布，美國家庭在過去三年維持債務還款的能力轉差，達到自全球金融危機後未見的水平。聯儲局警告，美國家庭在償還債務的能力明顯惡化。 

報告指出，「家庭未能按時履行財務責任的情況，較2010年調查以來任何時候都更為普遍。」2010年時，美國正從2007年12月至2009年6月的大衰退中復甦。次級按揭市場崩潰波及美國及全球大型金融機構，失業率一度升至10%。

最新調查顯示，截至2025年底，拖欠貸款還款的家庭比例由上一輪調查約12%，急升至接近20%，增幅約67%。拖欠兩個月或以上的家庭比例亦由2022年的5%升至超過8%。與此同時，高收入人士淨資產大幅增加，最高收入組別的家庭淨資產中位數上升31%。顯然地，貧富懸殊情況正在拉闊。

債務收入比亦顯著上升。供款佔收入比率超過40%的家庭比例升至8.6%，高於2022年的6.5%，並創2013年以來最高水平。美國經濟持續增長，但通脹水平為1980年代初以來最高。在這環境下，普通家庭的平均收入實際上是下跌了6%。

一個普通美國家庭，最近受到的困擾多的是。油價上升，他們的汽油消費增加了50%或以上。比起當初特朗普話再次做總統後，油價會便宜50%，落差太大。而且美國政府又話已經攻佔了委內瑞拉，理論上石油供應，並不是一個問題，為何仍會令到油價 上升呢？油價 上升所帶來的連鎖反應，就係其他產品的價格都上升。我閱讀過一篇文章，有一個美國家庭，油價上升，不單止令到支出大增，電費也加了很多，然後每個星期去超市購物，物價亦都不斷再上漲，這位家庭的爸爸已經陷入極度不安的情緒，因為他的收入已經不足以支持家庭的支出。這種情況在美國很普遍，萬一控制得唔好，出來示威遊行就變成指定動作，到時美國就會麻煩透了！

而且美國國債太多，債息又上升，所以我已經向所有朋友提出警告，美國三大指數，雖然在歷史高位徘徊，但係只要有一個不太好的消息傳出，市場一恐慌，暴跌的情況，可能就會呈現在大家眼前，還是大家作好準備吧，始終小心駛得萬年船。香港亦都有很多人買入美股作為投資，美股已經升咗好多年，隨時嚟一個大跌，一點也不出奇！

後語

由於我的YouTube頻道，被封鎖了賺錢能力，現在一毫子都賺唔到，但係我又想同大家見面，所以就寫下散文，一來可以抒發一下，二來都仲有微博的廣告收入。所以在此希望各位俾面，睇吓文章之餘，幫手按一按文章附近的廣告，希望咁樣可以得到少量的廣告費，多謝大家幫忙，感激不盡！

香港建築偷工減料、恆隆地產睇淡內房 (Oct 11, 2026)

News 1: 香港建築質素下降買呢啲股票

我諗大約兩、三年前吧，聽到香港政府官員曾經提及過，一些建築上的標準，其實可以降低一些，在一定的安全程度下，可以加快項目的完成日期，盡快投入服務，方便市民。以上呢一番概念，我肯定聽過，但係關於什麼政府項目，我已經不記得了。可能以前英國政府留落嚟的標準，例如起一條行人天橋，都要確保相當穩固，才能能夠落成俾人用。不過現在已經冇咗英國政府嘅效應，新主人新作風，一啲以前嘅標準，太過執着、太過嚴謹，反而新主人不喜歡，要改革。

記得以前紅磡站出現過鋼筋事件，最近有時我都會經過紅磡火車站，看見人來人往，熱鬧非凡，所以整座建築物，如果真係建築上冇問題，咁就最好。萬一將來出現問題，我可以告訴大家，死傷一定非常嚴重，因為在這個站裏，每1分每1秒都有大量人群穿梭。最近也不知怎樣，經常聽到香港的建築物，在興建時出現問題。包括瑪麗醫院電梯問題、赤柱豪宅One Stanley鋼筋減少問題、大圍柏傲莊石屎質量唔好，要拆過再重建、長實在安達臣樓盤項目上，原先起好的六座，起碼有三座要拆卸再重建。

最新的，再加入呢一宗。話說中九龍繞道 (油麻地段)去年底通車了，現在網傳2024年隧道施工片段，工人疑正建造隧道路面底板、陸續在鋼筋結構灌混凝土，惟多條鋼筋未扭入螺絲帽，引起安全疑慮。

據說有報館詢問過路政署，得到的回覆查詢時稱，當時承建商評估施工困難，故提出「替代設計」，於合適位置鑽孔插入額外鋼筋，強調事前已審批，確保結構安全，亦有查核工程紀錄及巡查；但未透露哪些位置用「替代設計」及提供紀錄，亦未具體解釋若鋼筋仍無扭入，如何確保結構安全。我在想，如果是一個有責任感的路政署，應該會詳細地記錄那個地方用了「替代設計」，最起碼方便日後如果整個繞道出現了一些問題，可以針對性地睇吓會否和「替代設計」有關，起碼在補救方面，能夠及時，也能對症下藥。其實補救已經不對，但在這種古怪的商業經營氛圍之下，有補救，始終好過冇。

現在這種情況下，買樓的人士，就要揀一啲好嘅發展商。最近我拍了一條片，提及長實安達臣樓盤嘅問題，某些觀眾表達，那是承建商的事，長實唔會上身，我覺得呢種說法非常古怪。

我舉個例子吧！美國有一間公司，將一批訂單交給我去生產，是和我簽約的，然後我將呢一批訂單，批出去俾東莞一間工廠去做。如果東莞工廠起唔到貨，我是否沒有責任呢？ 我能夠和美國公司說「係因為東莞工廠起唔到貨，唔關我事㗎，責任都唔係我嗰度」，你覺得這樣講得通嗎？亦都有觀眾講，如果東莞嗰間工廠起唔到貨，應該由佢哋作出賠償。道理上係咁，但萬一東莞呢間工廠賠唔起呢? 係唔係我呢間公司就冇責任要賠比美國公司呢? 我相信應該唔係咁樣，因為美國公司係和我的公司簽約，美國公司只會對着我來訴訟。至於東莞嗰間工廠，是和我簽約的，如果我要告，也只可告東莞間工廠。所以兩者之間存在差距，不可混為一談！

現在有質素的發展商會變得更加吃香，例如恆地 (0012)、新鴻基地產 (0016)、信和 (0083)、太古地產 (1972)、嘉里建設 (683)，現在看起來，變成很不錯的發展商。他們交樓的標準應該相當高，而且能夠承擔責任，對買主來說，會比較舒服啲。所以在這種「你又呃我、我又呃你」的商業模式下，能堅持原則，有社會責任，有高的道德標準的企業，更加難能可貴，要投資，就投資在這些「好」公司身上吧！買一間安樂窩，可能會住一世，錢已經付出了，質素一定要有，這樣才是安樂窩，不是嗎？

News 2: 恆隆地產 (101)看內房市

大家相信對陳啟宗呢個名唔會陌生，因為佢係恆隆集團 (010)和恆隆地產 (101)前主席，最近先至將呢個寶座，讓俾佢嘅寶貝仔陳文博。陳啟宗睇好內地地產市道，就係人都知㗎啦！以前我都幾鍾意聽佢講嘢，覺得佢講得有啲深度，所以計李嘉誠之後，佢就係我另一個鍾意聽故仔嘅講故人嘞。我曾經有拍過一條片，提及過李嘉誠和陳啟宗作一個比較。當時講嘅係，李嘉誠撤出內地，陳啟宗加碼壓注中國地產，一個走出來，一個走入去，到底邊個啱呢? 而家睇落去，誠哥可能贏幾條街返嚟。無他嘅，陳啟宗睇得中國太好，亦都可能只係睇好嗰一方面，冇顧及反面所帶出來的問題。

我記得陳啟宗曾經講過，如果中國再以一個高速的經濟增長，無需太耐時間，肯定可以「超英趕美」。他的論調沒有錯，只要中國GDP有高速的增長下，應該做得到，但是現在看起來，又是另一回事喎。不比較其他的，就比較中國和美國的股市指數的發展，唔需要我多講，自己去調查一下，便會知道。例如上證指數，在2007年創出歷史高位之後，過了差不多20年，今天的上證指數，只有3,800多點，和高峰超越六千點，差距太遠了。至於美國嘅納斯達克指數，我只能夠講，2007年的時候，指數少於2,000點，今天的收市，已經超越27,000點。咁嘅比數，邊有得鬥啊？

現任恒隆集團董事長陳文博預期，內地樓市5年內都難以扭轉現時的困境。據彭博報道，陳文博在新加坡出席Forbes一個活動時指，內地樓市面對的挑戰，未來5年都不會消退，甚至可能持續更長時間，他又稱，集團未來數年都不太可能再投資內地。他又提及，由於港人北上消費，相信本港零售市道將持續面對挑戰。此外，陳文博表示，雖然他願意繼續投資香港，但由於息口上升，或令資產估值受壓，又認為現時首要任務是去槓桿。

以上的一席話，就係陳文博一巴打埋去佢老竇陳啟宗塊面上。我諗而家嘅陳啟宗不得不承認內地房地產業務的確出現問題，但是他在內地嘅投資比例越佔越多。最新恆隆地產2026年上半年業績報告顯示，總收入為$61.13億港元，當中內自內地的收入是$36.17億港元，佔料近6成，餘下四成是來自香港的。所以它的重心發展好明顯地傾向中國。

陳文博今年44歲，你可以話佢喺商界上，仲係一條靚仔，冇乜代表性。但佢老竇陳啟宗，在商場打滾幾十年，自從1992年開始，已經向中國進發。喺上海打造出兩個超五星級商場，幫佢搵唔少錢，所以佢對中國有期望，我可以理解。無論係今次是陳文博自己的想法，還是恆隆集團裏面的想法，都帶出一個明確的信息，中國的房地產事業，肯定仲有排搞，佢哋都講到咁明白，未來五年裏面，都唔會再加碼投資中國，現有的內地資產，就繼續持有，但係加碼投資，就諗都唔會諗。

如果你仍然唔相信中國未來的日子會艱苦的話，很簡單，從今年開始，一直睇住恆隆地產在中國的賺錢能力，便能知曉一二。我鍾意恆隆地產係因為它在財務上的透明度相對較高，想卑你睇清楚它們現在的經營狀況。最近，我亦都有拍片提及恆隆地產，以它今天的股價來計算，股息回報率高達7.86%。投資1,000,000在它身上，每年的回報率有$78,600元，如果情況可以不斷咁樣持續，係一個不錯的回報率。問題係，內地和香港商場的經營狀況，會否越來越惡劣，如果會的話，誰能保證這個高股息回報率能持續不斷長時間呢？大家還是小心啲吧！

後語

由於我的YouTube頻道，被封鎖了賺錢能力，現在一毫子都賺唔到，但係我又想同大家見面，所以就寫下散文，一來可以抒發一下，二來都仲有微博的廣告收入。所以在此希望各位俾面，睇吓文章之餘，幫手按一按文章附近的廣告，希望咁樣可以得到少量的廣告費，多謝大家幫忙，感激不盡！

寧德騰訊一鑊熟、嘉里高價奪地 (Oct 7, 2026)

News 1: 應該要睇淡寧德 (3750)、騰訊 (700)的股價

大家都知道AI建設方面，需要投資龐大，而且在短期之內，根本見唔到任何受益，只係見到啲錢不斷燒吓燒，非常心痛。但係又唔可以唔投資喎，因為AI就係未來嘅必需品，人人都需要。就好似我咁，基本上每日都會用AI去搵一啲重要資料，雖然未必確定100%資料正確，但卻可以慳返好多時間，而且準確度只會越嚟越高。所以邊個擁有AI呢個市場份額，邊個就係未來的霸主！

而家只有兩個國家，有能力大量投資在AI建設身上。一個係美國，一個係中國。美國用嘅係市場經濟，所有嘅投資金額，係由企業自己去負擔，過去呢幾年，見到這些科技企業，眼也不眨地幾千億幾千億的投資在AI建設身上。有些搞到股價大跌，因為人們開始擔心投資的錢，根本冇辦法拿回來。最佳的例子便是甲骨文Oracle，原本在一片掌聲之下，股價瘋狂地增長，但當投資者擔心之下，股價又應聲下挫。失去的市值需要未來有一份好的財政報告，才能將投資者的信心和股價挽回來，容易嗎？當然不容易。

另外中國，創造了自己的AI天地，難以和美國融洽，但也需要投資在AI建設身上，也要不斷燒錢，去鞏固它在世界的科技實力。中國嘅大部份科技企業，講真，就係由政府扶植起來，所以話它們是國企也不為過。最慘就係，這些企業的投資方向，要聽阿爺指示，指示得好，走對了路，便沒有問題。萬一走錯了路，就好像將一紮一紮的錢，投進了焚化爐裏面，化為烏有！

彭博報道指出，內地AI企業DeepSeek即將在新一輪融資敲定至少800億元人民幣，遠超最初集資目標，為其計劃明年初IPO奠定基礎。同時，寧德時代 (3750)與騰訊(700)為該輪融資的領投。

據說，DeepSeek最初只打算募集約500億元人民幣，但其最新AI模型發布後，市場認購熱度遠超預期。據已簽署投資條款清單推算，最終規模或近1000億元人民幣。看來其他大企業仍然覺得投資在AI身上是一個金礦，值得繼續投資，真有趣！

上月初，DeepSeek計劃在其內蒙古大型數據中心部署最少16萬塊華為新一代Ascend 950DT晶片，並正洽談融資以擴充基礎設施，涉款以十億美元計。投資如此龐大，梗係要喺上市之前，搵足彈藥，才能夠燒到上市的一刻，大放異彩。

彭博表示，DeepSeek計劃明年潛在上市前進行一輪融資，反映模型開發與詞元(Token，模型處理單位)成本節節攀升，迫使公司向外尋求資金。至於本輪融資有騰訊與寧德時代等投資者參與，將公司估值推升，至少達5,000億元。不過，仍有待觀察DeepSeek將如何在股東追求最大利潤的壓力，與維持低價以支持國家級AI普及戰略之間的平衡。

寧德時代 (3750)加埋在內地上市的A股，市值高達22,000億元人民幣，絕對係大企業。至於騰訊 (700)淨係喺香港上市，市值高達$38,000億港元以上，所以DeepSeek搵呢兩位老襯入股，合情合理。但係我對呢兩間企業將來嘅股價，會有所保留。點解呢？原因很簡單，我假設呢一次集資1,000億元人民幣，是上市前的最後一次集資，所以個估值係非常之高，將來上咗市之後，除非DeepSeek股價仍然能夠倍增，否則寧德時代和騰訊在呢次集資活動上，風險高，但係又唔知回報高唔高。我假設呢兩間企業做領頭羊，每間企業各自攞出200億元人民幣，相比起兩間公司的市值，不算多，但是如果攞去燒，咁就好慘了。

寧德時代，最近在內地俾人話佢做生意霸道，好多合作者，都想遠它而去，如果佢將來失去領導地位，股價本身肯定會出現問題，再加上在AI投資上不斷燒銀紙，萬一市面出現負面評價，佢嘅股價就好難保得住囉。其實自從寧德時代上市之後，其股價由高位，都差不多腰斬。除非它的賺錢能力夠強，否則股價繼續跌，一點都不覺得奇怪。

至於騰訊，靠着中國市場，有壟斷成份，但因為中國經濟不太好，怕會影響基本業務的賺錢能力，現在自身又要投資在AI基礎上，樣樣項目都喺度燒錢，最驚係業績倒退。一旦倒退了，股價同樣會向下衝。讀者們可能會覺得我過分憂慮，但我根據自己的感覺說出來，至於係唔係咁嘅結果，就要由時間去證明，大家看着辦吧！

News 2: 嘉里高價投得的項目可以賺錢嗎?

由10份標書爭奪何文田佛光街的豪宅地皮，終於有了結果。地政總署公布由嘉里(683)以逾$43.08億元中標奪得，以最高可建樓面20.77萬方呎計、每方呎樓面價約$20,738元，較市場估值上限每方呎樓面價約$1.5萬元高約38%。似乎嘉里對香港未來地產市道非常之有信心，實在難得，如果嘉里管理層可以再講多一些如何對後市有信心的論據，咁就更加好啦，起碼大家知道佢點諗！

還記得潘蘇通這個人嗎？他控制的高銀金融在2016年以$63.81億元投得何文田同區常盛街豪宅地，每方呎樓面價約$10,889元。10年之後的今天，何文田的豪宅地，又再升值了，比起10年前潘蘇通所投得的地，今次的價格高出了逾90%，我哋要睇吓嘉里建設最終點樣能夠在這個項目上賺到大錢。

其實我哋一直都覺得用咁多嘅錢去投得一塊地，風險好高，好似好難賺到錢，但其實大家都在計數，只要計得掂就去馬。好明顯，今次長實 (1113)的李澤鉅再次以100%的落敗率，殺戮而回，哈哈哈！可能阿李澤鉅話，我將啲錢擺喺銀行收息，幾年之後嘅回報率加起來，唔會輸蝕得投到呢塊地而將來出售所得到的盈利。可能在李澤鉅眼中，嘉里建設係攞苦嚟辛，但係事實是否如此呢？ 我和大家講一講情況，讓大家自行去判決一下。

話說嘉里建設在2015至2016年間，先後擊退多家本地及內房財團，以當時高昂的地價奪得九龍筆架山龍駒道的兩幅相連低密度住宅地皮。

第一幅地皮: 龍駒道9號 (即現時「緹山」)，在2015年2月投得，地價大約$23.898 億港元  。以最高可建樓面面積約11.64萬平方呎，當時每方呎樓面地價約$20,534港元，創下當時九龍區每呎地價的最高紀錄。  

第二幅地皮: 龍駒道3號 (即現時「緹外」)，在2016年10月投得，地價大約$72.68 億港元，以最高可建樓面面積約34.3 萬平方呎，每方呎樓面地價達$21,200 港元，刷新了九龍區地王紀錄。

兩幅地加起來的總地價接近百億港元，加上建築費，項目的融資成本，好多人都覺得呢兩個項目，好難賺到錢。但當時的地產市場氣氛仍然熾熱，還記得李嘉誠在2017年以高價出售「中環中心」，這還不算最熾熱，再過多一年，即是2018年，便是將樓市推到最高峰的時候。所以嘉里建設在2015年、2016年，所投得的呢兩幅地，算是貴，但也不是最貴，最後呢兩塊地起好的物業陸續出售，所以最後嘉里建設能否賺到錢呢？

緹山 (龍駒道9號)，購地成本約$23.9億港元，以樓面面積約11.64 萬平方呎計，當時豪宅建築成本每呎約$7,000–$8,000計算，總建築及融資成本約$10億港元。總開發成本估計約$34億至$36億港元。最後呢個項目，全數沽清，總套現超過$68億港元。套現金額幾乎是總成本的一倍，算是獲利甚豐。

緹外 (龍駒道3號)，購地成本約$72.7億港元 (當時每呎地價約 $21,200)。以可建樓面面積高達34.3萬平方呎來計，以超級豪宅最高規格的建築、裝修及融資成本 (估算每呎 $10,000至$12,000)計算，建築成本約$35億至$40億港元。總開發成本估計約$110 億至$115億港元。根據網上資料是顯示，截至目前已累售56伙，單是已售單位已套現超過$166億港元，比最高的總投資金額$115億港元還要多，所以肯定唔需要蝕本。據知目前尚有約8伙待售。以平均數來計，之前出售的豪宅，每個平均價值$3億港元。 尚未賣出的8個豪宅，估計還可以套現多$20-$30億港元，所以最終呢一個超級九龍豪宅樓盤，相信盈利比成本多出一倍。這樣來看，似乎嘉里建設懂得起豪宅、亦都懂得計數、亦都懂得市場的需求。根據以上這兩個實際例子來看，今天它投到的何文田豪宅地，會否再下一城，繼續賺大錢呢？你哋要自己自行判斷啦。

不過再睇真啲嘉里建設的股價，似乎又幾吸引，點解？因為原來以目前的股價買入的話，可以享受到超過7.65%的股息回報率，在眾多的地產股當中，相信只有恆隆地產的股息回報率 (7.9%)可以和它媲美之外，其餘的都不成！過去嗰四年，嘉里建設每股派息都昰$1.35元，似乎相當穩定，估計今年都會是一樣。如果照這樣的推論，7.65%的股息回報率，都幾實在。看來，我還是要好好去研究一下這間公司是否真的值得投資。

後語

由於我的YouTube頻道，被封鎖了賺錢能力，現在一毫子都賺唔到，但係我又想同大家見面，所以就寫下散文，一來可以抒發一下，二來都仲有微博的廣告收入。所以在此希望各位俾面，睇吓文章之餘，幫手按一按文章附近的廣告，希望咁樣可以得到少量的廣告費，多謝大家幫忙，感激不盡！