以人民幣支付政府開支、老舖黃金 (Sept 25, 2026)

News 1: 港府用多啲人民幣就會國際化

最近港府出咗一個五年計劃，其中有一項內容叫做「以人民幣支付政府開支」，到底呢個係咩概念呢？點解會惹起外界嘅關注呢？我身邊嘅朋友，都有問過我呢個問題。其實答案要兩睇。一個正常嘅答案就係「如果香港和內地之間嘅往來多了，用人民幣去做支付，有乜問題呢？」就好像一個普通香港人，如果返內地的次數多了，對換多一點人民幣，然後返大陸用，這不是一個正常的做法嗎？但係如果是一個陰謀的答案，就係中國政府可能會印大量人民幣，然後要求港府用港幣或美元去接收呢一批人民幣。當然，呢一批人民幣，到時可以返大陸用，只不過兌換嘅金額，可能會非常龐大，有機會過百億、甚至過千億港元。

根據香港嘅印銀紙制度，理論上要收到美元，金融管理局先至可以印港元。所以如果港府兌換多啲人民幣，方便以後使用的話，某程度上，係會用美元直接去換人民幣。所以在金融管理局裏面，有機會，美元嘅數量就會少了，然後人民幣的數量便會多起來。不過，只要人民幣有實力，不會大幅貶值，增加一部份人民幣作為儲備，未嘗不可。

根據特首李家超的說法，考慮用人民幣而非港幣結算的項目，包括公務員在中國大陸的培訓費用，以及向廣東省購買香港日常水源東江水的開支。其實香港公務員上大陸培訓，用人民幣支付，正常到不得了，只不過以前，可能係需要嘅時候，先至去兌換。但現在，如果港府已經準備了一大堆人民幣在手，就可以隨時用人民幣支付，情況根本正常到不得了，所以看不出，用人民幣支付，能夠提升人民幣在國際上的地位。另外仲有一樣嘢搞笑，香港本身就係中國嘅一部份，在中國裏面，用人民幣，何來會更加國際化呢？

要人民幣國際化，必須要令到人民幣衝出中國，殺入其他國家。打開張地圖，中國周邊有很多國家，只要大家貿易來往得多，人民幣自然就會在其他國家流行起來。中國附近的國家包括了: 北韓、南韓、日本、蒙古、哈薩克、吉爾吉斯、阿富汗、巴基斯坦、尼泊爾、緬甸、泰國、越南、柬埔寨、寮國等等。舉個例子，如果越南人，好希望買到中國嘅產品，例如小米手機等，他們便要準備多一些人民幣，去購買中國的產品。這樣的話，人民幣在越南便會慢慢流行起來。甚至越南人會覺得人民幣比自己國家的貨幣 (越南盾)更加保值，希望擁有多啲人民幣。如果咁嘅情況出現，人民幣就真係變得更加國際化嘞！

所以在上述的國家裏面，只要令到佢哋愛上中國的產品，自自然然人民幣便會成為他們喜愛持有的貨幣之一。越多人搶人民幣，人民幣嘅升值潛力就會越嚟越高，國際上的認受性亦都會越來越高，時間一長，自自然然亦都有能力可以站上國際舞台，令到美元的重要性下降。

不過問題又出現了，在中國周邊的國家，都是發展中國家，窮到冇朋友，富有的，就只有南韓、日本、和中國這些老友記。而且這些窮國家的金融制度不健全，如果和它們互換貨幣資產，他們會求之不得，但中國就會得不償失。此話怎說呢？又舉一個例子。例如中國和緬甸互相交換等值100億元人民幣的貨幣資產。所以緬甸擁有100億元人民幣，而中國擁有價值100億元人民幣的緬甸幣。大家都知道什麼叫做通脹，而通脹會蠶食購買力，即係令到銀紙越嚟越貶值，乜都買唔到。

中國近年經濟不算太好，所以通脹不高，因此人民幣的購買力保存得比較好。但是緬甸呢？根據AI的提示，緬甸每年平均通脹率25%-30%，通脹情況嚴重。所以如果中國政府擁有價值100億元人民幣的緬甸貨幣，過多兩三年，購買力就會唔見一大截，所以，中國政府願意和緬甸政府互相交換貨幣嗎？相信緬甸政府會相當樂意，但中國政府一定不會願意。在這樣的條件下，即使圍繞着中國有很多國家，但始終都不會令到人民幣國際化的進展加快。

好耐之前聽到一個有趣的題材。話說中國政府用人民幣向沙地阿拉伯購買了石油。當時的沙地阿拉伯說用人民幣購買石油沒有問題，他們非常樂意接受。令到中國政府喜出望外，然後向外面宣告，你們看看，人民幣終於站在國際舞台上，因為其他國家願意接受人民幣去交換產品。這一宗交易的確是用上了人民幣，但據說交易之後冇幾耐，沙地阿拉伯變將人民幣換成美元 (據說是在香港發生)。所以最後，其實沙地阿拉伯都係要返美元，人民幣只有在交易的那一刻，站在國際舞台上，然後，便沒有然後了。

暫時來看，在世界上稱得上「硬貨幣」的，有美元、歐元、人民幣、英鎊、加元、澳元、紐元、日圓、新加坡元、甚至是港元，都算得上是強貨幣、硬貨幣，因為比較多國家認可。

News 2: 老鋪黃金有乜嘢咁巴閉?

大家睇過我的YouTube和閱讀過我嘅文章，都知道，有三隻股票，我非常之不欣賞，幾年來不斷提出它們的股價，遲早會有問題。呢三隻股票就係小米 (1810)、海底撈 (6181)、和李寧(2331)。在我的詛咒下，李寧股價終於創了三年低位，很好！海底撈股價也創出了歷史低位，更加好！至於小米，早前創過全年低位，而家就睇吓佢會唔會跌穿$20呢個水平。今日要加多一隻衰股，它叫做老鋪黃金。呢間公司個2024年6月底上市，上市已經超過兩年。上市價$40.5港元。第一天上市，每股$64.50 港元 (較發行價高出約 59.3%)，然後在首日收市，每股 $70港元 (首日大漲約 72.8%)，所有小投資者，開心到不得了。不過呢個開心，可以繼續延續。

至2025年7月 8 日觸及最高點$1,108 港元，上市僅約一年時間，股價累計爆漲近 27 倍。市值巔峰時，公司總市值一度接近 $1,900 億港元，當時甚至超越了創立近百年的傳統金飾龍頭周大福 (1929)被市場稱為港股「股價一哥」。市場有本事將呢間企業吹噓到神級水平，是否真的有個人之處呢？這些個人之處，是不是真的是一個賣點呢？值得研究一下！

我不知道老鋪黃金所擁有的黃金，是否與眾不同的，但不知為何，同樣是一嚿黃金，為什麼老舖黃金賣得比別人貴？

傳統金飾店 (如周大福、六福)主要按照 「當日金價 × 金重 + 加工費」 計算價格，售價隨國際金價波動。而老舖黃金採用 「一口價」 的純奢侈品定價模式，產品單價極高，其昂貴的核心原因包括:

第一: 古法工藝與文化附加值

主打傳統中國非物質文化遺產的「古法手工金器工藝」(如花絲鑲嵌、鏨刻、錈金、鑲嵌寶石等)。顧客購買的主要是藝術審美、工藝與文化價值，而非單純的黃金原料。

我的反駁是: 什麼叫做古法手工金器工藝？難道這些打金師傅，只有在這間企業裏面？其他珠寶行，例如周大福、六福、周生生做唔到呢啲古法金器出來？另外，它的顧客是擁有藝術審美、有文化價值，但我想請問一下，一旦這些顧客等錢用，攞去金鋪賣出去，收金的舖頭，會否因為這是一件藝術品，收購價都卑高啲呢？我相信唔會。一件黃金藝術品，被熔掉之後，就是一舊普通的黃金，沒有任何分別，所以別傻了，別因為它所打造出來的黃金藝術品，而卑高價錢去買，唔值得。

第二: 高淨值客群定位

專注服務高淨值客戶，店舖多設於一線城市的核心高端商場 (如北京 SKP、香港海港城及中環 IFC)。  

我的反駁是: 租一個比較高尚的地方來做生意，無可厚非，但其他珠寶行，亦都有在這些名氣的高檔商場經營業務，他們的租金也是一樣昂貴，但老鋪黃金賣出的首飾，卻比別的珠寶行高出好多，所以在高檔地方設立經營店而去提高金飾價格，這個說法牽強，說服力不夠。

第三: 奢侈品營銷機制

採用限量發行、預約進店及定期調漲價格的策略，塑造出稀缺感與「黃金保值 + 奢侈品體驗」的雙重屬性。

我的反駁是: 如果每一件金飾藝術品，都是限量版，理論上應該要有一個市場，方便顧客可以將呢啲藝術品，以合理的價錢賣出。這樣才值得用更高的價錢買入老鋪黃金的金飾。如果它沒有成立一個金飾藝術品市場，那麼最終這些限量版的金飾，當等錢用的時候，仍然只是一舊普通的黃金，沒有什麼了不起的地方，何必這樣傻，用咁高的價錢去買入呢？

自從上市以來，它公布了兩次全年盈利記錄。2024年全年，賺了$15.67億港元。2025年全年盈利仲犀利，賺了$54.18億港元，增長了245%。到了今年2026年上半年，賺了$49.32億港元，看這個增長勢頭，全年是否能夠賺過百億元呢？似乎真的有這個可能性。回說周大福截至到2026年3月底為止，全年也只賺了$90億港元，難道老鋪黃金，真的可以遙遙領先，我懷疑了！

老鋪黃金的股價，從高位跌到現在的$340港元水平，跌幅超過了69%，如果它的盈利真的那麼強勁，為何股價會跌這麼多呢？所以最後相信，呢間公司應該是炒出來的，當一切回歸現實嘅時候，它的股價便會貼地好多。除非它的盈利可以繼續高速的增長，否則我相信現時的股價，還是過度樂觀。這間企業的每股資產淨值$70港元，市場賣俾你$340港元一股，高出4.85倍，憑什麼？只要解釋不來的話，它便不值得擁有那麼高的溢價。周大福珠寶也只是高出3.18倍、而六福竟然是0.82倍，即係每股資產淨值大於現在的股價。照這些統計資料來看，老鋪黃金的股價，肯定需要再腰斬，大家拭目以待吧！

後語

由於我的YouTube頻道，被封鎖了賺錢能力，現在一毫子都賺唔到，但係我又想同大家見面，所以就寫下散文，一來可以抒發一下，二來都仲有微博的廣告收入。所以在此希望各位俾面，睇吓文章之餘，幫手按一按文章附近的廣告，希望咁樣可以得到少量的廣告費，多謝大家幫忙，感激不盡！

蜜雪集團 、小鵬汽車 (Sept 23, 2026)

News 1: 蜜雪集團 (2097)

最近睇到一篇文章，提及這間公司，蜜雪集團。一看之下，原來這間公司在香港上市的市值高達$725億港元，比好多香港傳統老牌上市公司都要大間。例如我喜愛的太古B，市值也不過是$426億港元。最近啱啱寫文章提及的恆隆地產 (101)，也只不過有$340億港元左右。到底蜜雪集團做啲咩生意呢？今天來了解一下！

蜜雪集團據說現在為中國最大的現製飲料企業，並於 2025 年 3 月成功在香港交易所主板上市。其招股價$202.5元。第一日開市價$262元，而收市價是$290，第一日漲幅有43.2%，很威風啊。不過這還不單止，在香港公開發售部分獲得超額認購 5,257 倍，唔怪得之它的股價可以升完再升。2025年6月4日，它的股價爬上歷史新高$618.5元，之後就大幅回落。小投資者如果在高位買入，相信今天應該是欲哭無淚，因為股價肯定唔止腰斬。

蜜雪集團到底有咩業務呢？其實他的業務頗為簡單，可以分為兩大業務。第一業務，蜜雪冰城 (Mixue): 主打平價現製茶飲與冰淇淋 (如冰鮮檸檬水、新鮮冰淇淋、珍珠奶茶)，單價普遍在 2 至 8 元人民幣之間。 第二業務，幸運咖 (Lucky Cup): 主打平價現磨咖啡 (如美式咖啡、椰椰拿鐵)，將極致平價模式延伸至咖啡賽道。

如果大家以為蜜雪集團是靠賣奶茶給消費者賺錢，那麼你實在太簡單了。但其實，它是一家供應鏈管理及供應商公司。此話怎解？根據官方公佈的最新財報數據，截至 2025 年底，蜜雪集團全中國 (中國內地)的門店總數已達到 55,356 間。  

全球總門店數則接近6萬間 (共 59,823 間，包含東南亞等海外 13 個國家的 4,467 間分店)。

所以它的業務是一間加盟店。據說集團超過 99% 的門店為加盟店。換句話來說，它只有品牌，其他實體業務，是用加盟形式賣給別人去經營，這樣才能夠在極短時間之內，將公司的規模，大幅地壯大。

所以它的收入主要來自商品及設備銷售 (占比超 95%): 蜜雪集團自行建廠生產或採買食材 (糖、奶、茶、果醬等)、包裝材料 (紙杯、吸管)及門店設備，再批量賣給加盟商。 所以淨係將銷售材料賣給自己加盟店，已經可以大賺一筆，呢條橋果然夠勁。

不單如此，蜜雪集團還有加盟及服務費 (占比約 2%-3%): 向加盟商收取的加盟費、管理費及培訓服務費。總括來說，呢個就係蜜雪集團的經營模式。因為它的上市時間很短，盈利方面數據只能暫時支撐着吧。例如，它公布了2025年全年一共賺了$65.52億港元，算是很不錯了。踏入2026年，第二年的業績，上半年一共賺了$26.54億港元，和上年同期比較，跌了超過一成。所以今年下半年能否有好成績，便很難說了。原因是中國內地經濟環境不太好，消費疲弱。雖然可能人們覺得蜜雪的產品價錢不貴，但在慳得就慳的情況下，估計它們的加盟店銷售額應該唔會好得去邊，可能會影響加盟店向其購買材料的需求。如果真係咁樣，它的盈利有機會大幅下降，不過暫時還是推測，要到真正公布全年業績，才知道這間公司能否站得住腳?

雖然2026年全年盈利還未知曉，但他的股價，可能透露了一點端兒。它最新的股價是$191元，已經跌穿招股價。如果和最高峰$618.5元作比較，跌幅超過69%。加盟店要做得好，管理上，市場營銷上都要做得非常好，如果你覺得呢一間公司只是幸運地將自己的企業發展到現在如此大的規模，將來慢慢可能就會出現管理上和市場營銷上的問題，都是它的股價還值$191元嗎? 大家如果有讀過考商業書本，都有聽過Product Life Cycle, 即係話，每一件產品，都有一個壽命，有本事嘅，產品可以在市場上逗留很耐。

例如可口可樂、麥當勞等等。但是如果產品只有一段時間受歡迎，然後無以為繼，那麼這間企業的產品，便會慢慢老死去。所以未來蜜雪集團，一定要繼續開發新產品去支撐公司，如果唔係，恐怕這間公司的業務將會慢慢衰退，投資在它身上，一定要打醒十二分精神！

News 2: 小鵬 (9868)是否自掘墳墓呢?

我一直都將內地6間電動車企拿來比較，或者拿來預測未來內地在這個板塊的前途。自從內房唔掂以後，國家又有新方向，就係全力催谷人們去購買電動車。照領導人的意願，只要多啲電動車出售了，經濟增長自然就會好起來了，之前的房地產淪陷情況，就可以一筆勾銷，當冇事發生過。但這樣想法，可以嗎？

六間車廠裏面，有一間叫做小鵬汽車 (9868），現在市值大約$775億港元，但係呢間公司過去嗰五年，全部蝕錢收場。2021年，蝕本超過$59億港元。最厲害係2023年，蝕了超過$114億港元。最近一年 (2025年)都要虧損$12.68億港元。保守估計這五年裏面，一共蝕了$330億港元。年年虧損，當然沒有息派啦。所以買入呢一間公司，只能夠炒波幅，一有好消息到，股價自然便會升啲。不過睇它的股價趨勢，係一浪低於一浪。其股價最高峰的時候，要倒回2021年11月，當時股價每股$220港元。那麼現在的股價呢？徘徊在$40港元邊緣，跌幅超過八成，小投資者們，應該喊都喊唔返來，冇得返家鄉。甚至相信很快會再破底，再創全年新低，問你怕未？

小鵬在電動車業務還未有好轉的情況下，繼續發掘新項目。這次小鵬公佈啟用全球首條高階通用人形機械人自動化產線，完成從研發試制到產線制造的關鍵跨越。而董事長何小鵬表示，生產線的投產意味著人形機械人已準備好擴大規模，走向現實世界。他補充說「我希望它能真正具備通用能力，承擔危險、重複或令人厭惡的任務，最終讓生活變得更美好。或許有一天，機械人會成為我們的夥伴、朋友，甚至是家人。」

雖然機械人的報道，沒有披露更多資料，但我一直都在懷疑，到底小鵬生產出來的機械人？可以用在哪裏？到底係B2B還是B2C。如果係B2B，例如用喺工地上面，將最危險嘅工作，交俾機械人去做。不過我又開始質疑，小鵬做出來的機械人，能否勝任在工地上做出細緻而危險的工作呢？

如果係B2C，即係民用，咁我又開始懷疑，是否可以用在家居上呢？ 如果可以的話，是否可以將菲傭、印傭炒掉呢？根據現在的AI機械人發展進度，學台積電CEO魏哲家所講，中國現在生產出來的AI機械人唔錯，可以跳嚟跳去，但係看不到有什麼實際用途。即係話，他已經說得很明白，現在中國所製造出來的AI機械人，仲係未達到某個可以民用的水平。

還有，最重要的一環，就是中央政府根本唔會比民間應用超強的AI機械人。為什麼呢？ 原因很簡單，因為威脅太大。我哋舉個例子，好似馬雲呢啲咁有錢嘅人，如果佢生產出1萬幾千個超強嘅AI機械人出嚟，雖然話幫手做業務，但係如果呢批機械人，係有殺傷力嘅，咁馬雲豈不是擁有一隊無敵的軍隊？中央肯嗎？當然不成！所以最後結論係，這些所謂AI機械人，其實只是一件大玩具，理論上唔會有太大實質用途 (可以用喺工業上邊，咁就最好，民用應該就未到呢個水平)。而且中國喜歡一窩蜂做事。你這間公司出產AI機械人，另一間公司亦都會跟着來，然後百花齊放，最後又變成內卷。如果以此推斷，小鵬這個新業務，相信只係一個噱頭，未必能夠在將來賺到龐大盈利。

所以，買小鵬嘅股票要小心啊，呢啲項目，屬於最初發展階段，有排投資，有排燒錢。當公司的錢用到7788，隨時又會伸手問市場攞錢，到時無論是配股、還是供股，都必須要有折讓價，肯定累到股價會再創新低，不得不妨。我哋即管放長雙眼，睇吓供股/配股幾時會來臨。

後語

由於我的YouTube頻道，被封鎖了賺錢能力，現在一毫子都賺唔到，但係我又想同大家見面，所以就寫下散文，一來可以抒發一下，二來都仲有微博的廣告收入。所以在此希望各位俾面，睇吓文章之餘，幫手按一按文章附近的廣告，希望咁樣可以得到少量的廣告費，多謝大家幫忙，感激不盡！

寧德時代、中國失業率又嚴重了 (Sept 20, 2026)

 News 1: 寧德時代 (3750)做唔到壟斷

寧德時代都有個綽號，叫做「寜王」，綽號果然威猛。它是2025年5月20日，在香港上市的。當時招股價$263港元，第一日上市股價高達$296港元，升了12.55%。大家知道這間公司做什麼業務的嗎？基本說法，公司的業務主要從事動力電池系統、電池系統的研發、生產、及銷售。講得明白一點，就係電動車的電池，不過佢好嘢啊，產業鏈一條過，由研發到銷售，都自己做晒，中間慳咗好多中介費，正所謂賺到盡，理論上唔錯㗎。

最近報章上說到，它的股價大跌，到底跌到咩情況呢？點解又會大啲呢？值得我哋去參考一下。我對呢間公司認識不深，但也知道它做電動車電池，據說做得出色。據說寧德時代自2020年7月起開始正式向 Tesla 供應電池。主要向 Tesla 供應磷酸鐵鋰 (LFP)電池，主要用於上海超級工廠生產嘅標準續航版 Model 3 同 Model Y。連外國公司都用寧德時代嘅產品，所以佢夠出名，亦因如此，有「寧王」的封號。但這樣是否代表它能雄霸天下呢? 從股價的跌幅，看來是不成的。

根據消息指出，過去兩年，內地的電動車企高層，經常被問及，是否一定要倚賴寧德時代的電池呢? 到了今天2026年，這個問題開始具體化地被反映出來，所以「去寧化」甚至成為了熱點話題。

首先，是理想 (2015)在9月初宣佈斥資26.5億元增資欣旺達動力，持股11.17%，成為欣旺達動力第二大股東。最奇怪的是，在2026年6月上市的全新一代理想L8全系採用欣旺達電芯，寧德時代退出該車型供應名單，大鑊，寧王少了一位客戶。

不止如此，理想的高端車型MEGA因為訂單超預期，而寧王趕唔切供貨，理想索性自研的5C三元電池，預計11月就開始交付。這等於說，理想正一步步把寧王從核心供應裏換出去。

不單止理想換了供應商，小米 (1810)也這樣做。剛上市的澎程N70、N90，沒有延續SU7、YU7用寧德時代電池的路線，直接搭載了小米自己的龍甲電池系統，電芯全部由中創新航和欣旺達供應，寧德時代連入場券都沒拿到。

有數據推算，寧王失去理想和小米兩家車企的訂單，合計就佔寧王國內裝機量的13.6%。有了以上這兩個說法，失去了一部份訂單，代表生意肯定沒有以前的好，所以股價向下跌，屬於正常範圍。其實寧王最新的收市價$507港元，並不是太差，因為如果你是招股價買入 ($263港元)，現在仍然賺大錢，升值了近93%，不是很好嗎？它的股價在上市後一直被推高，直至到今年的六月初，股價爬升到$794.5港元。由上市到股價高峰，投資者賺了兩倍，有什麼好投訴呢？不過，有人歡笑，總會有人愁。在高峰期買落的小投資者，看見股價跌到只有$507，跌幅高達36%，誰能受得了？

寧王現在的市盈率28倍，估計未來，如果業績可觀，可以降到24倍左右，睇落去還是不錯的。不過能否做到，這是一個未知數，如果你認為它失去了上述兩間電動車企的訂單後，仍然有理想的盈利增長，咁就冇問題，繼續持有這間公司的股票。但如果你認為它將來不單止會失去以上兩間車企的訂單，甚至更多車企會轉用更便宜的電池系統，這樣，寧王的股價，可能仲會尋底，搏唔博得過呢？咁就要睇你嘅預期。

因為寧王2025年才上市，根據香港方面報道，它在2025年盈利是$803億港元，我不知道這個盈利是否好誇張。但在2026年上半年，它也賺了超過$500億港元。如果照這樣推論，下半年保持平穩，它可以賺過千億港元，業務上的確可以再有增長。但是下半年，相信還未計及失去兩間電動車企的訂單，所以下半年變成非常動盪，值得小心推敲。說真的，它所派發的股息，絕對不吸引，回報率率只有1.75%。放在銀行的定期，都比它高出好多，除非佢股價大升，否則難以說服投資者投資在它身上。

News 2: 內地失業率嚴重，點幫到香港?

據國家統計局統計，今年6月青年失業率 (不包含在校生的16歲至24歲勞動力)失業率一度降至14.9%的低點，但在7月又回升至17.9%，8月則為18.9%，創下今年新高。2025年8月相關數據同樣為18.9%。

數據也顯示，今年8月還有兩組年齡組別的失業率。

第一組，25歲至29歲勞動力失業率為7.5%，較前一個月增加0.3％。

第二組，30歲至59歲勞動力失業率則是3.9%，與前一個月持平。

至於，8月份全國城鎮調查失業率為5.3%，比7月上升0.1％。今年首八個月，全國城鎮調查失業率平均值為5.2%，同比持平。

內地的消費主要靠年青人，16-24歲的組群𥚃，有些剛剛大學畢業，但失業率卻高達18.9%，呢個數字，有可能被低估，點解？原因出在大家對「失業人士」的定義有所不同。例如，教科書裏面寫的，失業人士是指在過去一個月裏面，很努力去尋找工作，但仍然找不到工作，便可以視為失業人士。

那麼中國呢? 問一問AI，結果如下

根據國家統計局的規定，被劃分為「失業人口」必須同時滿足以下三個條件：  

1. 年滿 16 周歲 (符合法定最低勞動年齡)  

2. 在調查參考周內沒有工作 (即沒有從事獲取勞動報酬或經營收入的活動，即使是一小時以上)  

3. 在調查時點前 3 個月內找過工作，並且如果在 2 周內提供合適工作，能夠立即開始工作。

除了第一條件，合乎邏輯之外。第二條件，已經覺得很怪。根據我問了AI，答案是這樣的，只要你喺調查失業率期間，做上一個小時的工作，你便不能夠納入失業人士。這樣寬鬆的說法，有很多人士，都不會包括在內，所以今次的失業率，相信被低估了。

不過無論怎樣都好，只要以上三個條件，有一個不符合，你都已經不算是失業人士。例如第二個條件，非常明顯，只要你工作過「一個小時」，你都不符合「失業」的行列裏面，哈哈，有趣有趣！

我們香港政府，一直強調，內地是我們最大的後盾，只要多啲人落嚟香港，香港情況自然就會好。所以，我們經常講一句說話「中國好、香港更好」。我經常都說這句說話，不能夠淨係睇一面，必須要睇另一面，即係「中國衰、香港更衰」。其實呢個情況，已經是一個不爭的事實。看看以前內地人落嚟香港買嘢嘅豪情，揮金如土的一刻，香港人都看傻了。但是現在呢，他們仍然落嚟香港，但係變咗旅遊經歷，不尋求高消費模式，咁就慘啦。例如，香港新年有煙花匯演，內地人蜂擁而至，睇完表演，一哄而散，返回內地，我們香港得到了什麼？

我一直強調，中國政府要對症下藥。現在中國人的景況，便是沒有穩定的工作和收入。所以必須解決失業問題，只要人人有工開，市場情況就會穩定下來。千萬不要再尋求什麼千億、萬億的基建項目。把這些建設投資放在人身上，效果將會更好。所以我一直期望「地攤經濟」的來臨，這是一個不體面的個體戶，但如果能夠有穩定收入，得到溫飽，然後再慢慢好起來，不是更好嗎？地攤經濟，令到人們可以用最少的營運成本，經營一盤小生意。那些貨品的價錢，又可以便宜些，增加顧客的消費需求，這樣的內需，才能捲動起來，否則，現在的經濟問題、失業問題，根本冇辦法解決。

至於我們香港，情況可能更糟糕。看着內地失業率問題嚴重，便知道上面的經濟也不會好到哪裏去。而然，我們還一廂情願，祈求內地人，會一批一批的，捧着大疊銀紙落來香港消費，我們香港顯然跟錯隊。但最大鑊就是，明知排錯隊，仲要繼續排落去，呢下先頂癮。所以我哋香港嘅未來，仍然在內地手中，求神拜佛，內地經濟要「真的」好起來，那我們才有一絲希望。香港之前所搞的「夜經濟」根本冇人再提，算是已經胎死腹中。現在再來一個北部都會區，有很多香港富豪，仍然支持香港政府，說都會區是未來香港重要的一個項目，會帶來更多機遇，真的會嗎？又是那句老說話，用時間來證明一切。不過在投資方面，那一間發展商投資得最多在都會區的，最好不要碰，那麼便可以「輸少當贏」，好過渣都冇，哈哈哈！

後語

由於我的YouTube頻道，被封鎖了賺錢能力，現在一毫子都賺唔到，但係我又想同大家見面，所以就寫下散文，一來可以抒發一下，二來都仲有微博的廣告收入。所以在此希望各位俾面，睇吓文章之餘，幫手按一按文章附近的廣告，希望咁樣可以得到少量的廣告費，多謝大家幫忙，感激不盡！

聯想集團、香港經濟和失業的矛盾 (Sept 18, 2026)

News 1: 聯想 (992)股價實在升得太過分

近呢一兩年，我都有個習慣，就係揀幾隻港股出嚟，睇吓自己眼光好唔好。所以就喺2025年底，我揀選咗七間香港上市的公司，預測一下它們在2026年股價能否去到我心目中嘅價位！呢七間公司的股票分別是: 長和集團 (001)、電訊盈科 (008)、和黃醫藥(0013)、東方海外 (316)、長江生命科技 (775)、聯想集團 (992)、和新意網 (1686)。

呢七隻裏面，有五隻已經達到目標，餘下兩隻未達目標的是和黃醫藥和長江生命科技，距離年尾還有一段時間，希望呢兩間公司的股價能夠去到我的預期股價，咁我在2026年港股預測方面，就會大獲全勝，好期待。但係今日我哋要討論嘅，係聯想集團，它的股價升得非常離譜，我好有眼光揀中佢，但我冇呢一種福氣可以賺到咁多錢，確實有一種走寶的感覺。

你可以在呢條新聞最底部，見到有一張圖，裏面有齊我揀選嗰七間公司的資料，大家不妨去睇一睇。如果唔怕麻煩，同樣地可以去我YouTube頻道，搵返第1820集B，你可以睇到當時我係點樣分析聯想集團的，咁樣可以證明，我唔係馬後炮，因為呢條片一早已經拍了，內容係冇得更改的，你哋可以去研究一番。講返呢一間聯想集團，年初開始嘅時候，它的股價$9.32元，其實呢個價錢已經可以入貨，完全沒有問題的。不過我就建議，如果再想平啲，等到$9元才買入，咁就更加好。當然以上呢兩個價格，都能夠做到。而且我從不貪心，我嘅目標價係一年之內升到$12元，已經叫做可以完成任務。回報率都有33%。我以為這33%的回報率，不容易達到。誰不知，在2026年4月27日，股價已經升到呢個水平，目標達到了，有點興奮、有點開心，證明自己眼光不錯。

但接下來，開始帶點憤怒，哈哈，原因是這間公司的股價，不知為何，竟然不斷上升，大家知道今天它的股價是多少嗎？是$37.58元，比起買入價$9元，足足升了四倍有多，帶點無奈、帶點唏噓，點解揀中的股票，偏偏自己沒有買，就這樣讓盈利飄遠了，實在太可惜啦。

我用一個合理的說法，就是它的盈利近呢兩年，有漂亮的增長。2024年度，聯想賺了$79億元。2025年度，盈利增長超過36%，賺了近$108億港元。不錯吧。到了2026年，全年業績再增長超過39%，一共賺了接近$150億元。和2024年比較，盈利在兩年裏面，差不多返了一番，所以投資者都睇好它的未來前景？這個我也不太清楚，不過根據管理層的說法，未來前景是良好的，尤其在AI部署方面，聯想集團的管理層，話仍然有一個非常好的增長勢頭，但是AI方面真的能夠幫聯想賺得更加多錢嗎？很快，聯想便會公布它的上半年業績，如果業績和市場預期是吻合的話，咁股價可以保持在這個水平，或者可以再更上一層樓。

因為它的股價今年裏面升得離譜，所以市盈率，亦已經超越30倍，唔算是一隻平的股票。Microsoft現在的市盈率是27倍，Oracle現在的市盈率接近26倍，和它以前有密切關係的IBM，現在的市盈率也不過是21倍左右，所以和這些國際企業比較，聯想現在的股價，應該是炒過龍了，不過，都係嗰句，等待中期業績，大概便知道，它的股價算不算貴了。另外，它的市值高達$4665億港元，非常之誇張呀。

今天我睇了一段新聞，講及好多科技的零件，尤其係晶片，都要繼續加價，所以形成，一些電腦產品，因為成本急升，未來的售價，肯定會更加貴，所以我奉勸一些讀者，如果想買電腦嘅話，就要快手啲啦，遲啲可能會升得更加厲害。如果想慳啲錢，好似我咁，好好去保護我這架老爺的電腦，千祈唔好而家先至嚟壞了，如果唔係，就要洗好多錢，去買一部新電腦，真係唔係好捨得。

如果電腦生產成本拉高了，聯想的電腦產品，在迫於無奈的情況下，也只能夠跟大隊加價。大家要記住，錢是在顧客的手裏，花不花費，便要看他們的消費態度。萬一顧客認為現在的電子產品價格太貴，絕對有可能延遲購買，到時雖然價格能夠提升，但銷售量如果有大幅下跌的話，總營業額，就未必會繼續創新高，甚至可能倒退。營業額倒退，很大程度上，盈利都會倒退，所以股價還可以那麼堅挺嗎？我帶點懷疑，所以要默默觀察外圍的零件售價狀況。

我都是用聯想的電腦Lenovo，好穩定，用得好舒服，我相信呢個係它的賣點。港股的恆指發展一般，但呢間公司的股價，卻是黑馬般的跑出來，令人意外。我曾經講過，現在所買的港股，最好業務不是集中在中國和香港。那邊間是最好，聯想便是其中一間公司，面向世界，賺其他國家的錢，所以即使中國和香港經濟不太好，只要外圍形勢穩定，它仍然能夠賺取可觀的盈利。不過現在西方國家，陸陸續續開始加息，肯定會阻礙消費，所以2027年，我應該唔會再推薦呢一間公司，因為它今年已經有一個好回報，但我亦都相信好日子不會常有，要有警惕之心，我還是揀選過另一間公司來和大家見面吧，大約在今年年底，我便會公布2027年，港股有邊幾隻股票，有潛質可以上升的，希望大家密切留意。

News 2: 本港經濟增長和失業率有矛盾

港府預測，今年我們本港的GDP增長介乎2.5%-3.5%之間，而且今年第二季實際經濟增長，出乎意料錄得4.3%的增長額，如果餘下的半年，香港經濟繼續保持平穩，相信有機會達到上限的3.5%經濟增長，甚至有機會，破埋呢個紀錄。所以照牌面睇，既然經濟有那麼亮麗的增長，香港人應該人人有工做，工資增加，生活富裕，肯消費才對。

剛剛特首宣佈完嚟緊呢1年度的施政報告，然後在電台聯播節目當中，接受觀眾打電話入嚟，和特首直接對談。不過，情況不是一面倒讚揚他的來年施政報告或者什麼的五年計劃。根據明報新聞所描述，有15名市民致電表達意見。其中有八人談及就業困難，而在這八個人裏面，有三個人表明自己或家人失業。更有聽眾表示失業超過一年，看不到未來。所以港府鼓勵港人多點生育，實在難以達標。

其實人類也是其中一種動物，只不過是我們懂得用錢去買食物，而動物不懂。有工作，才能賺到錢，有錢，才能生活下去。有富裕的錢，便有能力去養育下一代。人類和動物一樣，當生活困難的時候，亦都沒有能力去繁衍下一代。就正如政府經常都呼籲，唔好給食物於猴子和白鴿。所以一旦斷咗條米路，猴子和白鴿的數量便會下降，原因就係一字咁簡單囉，就係搵食艱難，仲點會生下一代啊？

我和一班朋友，經常說起香港的經濟，我們還打趣的說，宏觀經濟 (macroeconomics)和微觀經濟 (microeconomics)，不是走在同一方向的。什麼是宏觀經濟？便是政府所公布的經濟增長、通脹情況、就業情況等等大的社會問題。以宏觀經濟公布出來的數據，永遠都咁好，例如我哋香港有經濟增長，失業率保持穩定，甚至某種行業唔夠人手，需要輸入外勞。種種現象顯示給大家睇，在宏觀層面上香港是沒有問題的。

那麼微觀經濟呢？微觀經濟便是我們這些平民老百姓，看着我們周圍的經濟活動。以我為例，踏入2026年，我看見我住的範圍裏面，已經有好多舖頭關門大吉，今年嘅情況，比起2025年，更加差，店舖關門的速度更加快。這些都是我親身感受得到的。不單止是我，我有一些做生意的朋友，他們不約而同的說，生意差到「難以形容」。那麼點解我們感受到的，和宏觀經濟數據所顯示的那麼不一樣呢？我哋只能夠用科學去理解呢一個現象，叫做「平行時空」，或者是我們平民百姓和政府官員是生存在不同的空間，夠晒靈異，哈哈！

不過最近政府似乎有所領悟，例如勞工及福利局長孫玉菡預告下周公布中期人力推算，預測2028年本港仍面對整體人力短缺，惟短缺將收窄至13萬人，比兩年前預測少約5萬人，他承認人工智能 (AI)發展影響人力需求。另外，政府公布最新失業率升至3.8%，其中餐飲業升幅最顯著。有人力資源界認為，職位空缺減少與AI、人才來港、女性及長者參與勞動等因素有關。有勞工界議員認為在人力短缺收窄下，更需保障本地人就業。

原本本港的失業率一直都保持不變，現在開始上升至到3.8%，這樣代表經濟差了，但港府的經濟增長卻在增速當中，產生的矛盾，難以解釋。經濟學上，經濟增長得越快，對人的需求越多，理論上失業率會越來越低才對。但今天的景象，相信政府最好嘅理由應該係賴落去人工智能方面，咁就會變得合情合理，因為AI取代人類，已經是不爭的事實。

香港未來的前景，我個人抱着極懷疑的態度，或者是我悲觀，但也有好處。什麼好處呢？就是我諗到最衰嘅情況會出現，一旦情景真的出現，我肯定是一個最鎮定的人，因為我已經將最壞嘅情況諗過一遍。現在的港股亦都非常低迷，市況又唔好，晚上去酒樓食飯，冷冷清清，氣氛都沒有，怎能食得好味呢？嚟緊的有中秋節，在家的附近，沒有感受到節日所帶來的氣氛，和平時一樣，死氣沉沉。所以我哋即管睇一睇，中秋節當晚，人們會否空群而出，填滿整個尖沙咀、填滿整個銅鑼灣、填滿整個蘭桂坊。即使只有一日填得滿，那其餘的364日又怎麼辦呢？我突然諗起李嘉誠一句說話「山雨欲來風滿樓」，前路荊棘滿途，還是看着自己銀包裏面的錢，聰明地去運用吧！

後語

由於我的YouTube頻道，被封鎖了賺錢能力，現在一毫子都賺唔到，但係我又想同大家見面，所以就寫下散文，一來可以抒發一下，二來都仲有微博的廣告收入。所以在此希望各位俾面，睇吓文章之餘，幫手按一按文章附近的廣告，希望咁樣可以得到少量的廣告費，多謝大家幫忙，感激不盡！

李寧、中國不要學Cybercab (Sept 16, 2026)

News 1: 李寧 (2331)股價終於創造全年新低

相信有好多觀眾或者讀者都聽我講過，喺股市裏面，我特別不喜歡三間企業。它們是海底撈 (6862)、小米(1810)、和今天所說的李寧 (2331)。

我對李寧的印象，就是徘徊在業務上，它主要生產和銷售運動用品。有兩件事我還是記得的。第一件事，在很多年前，李寧全力進軍香港，包括想殺入香港羽毛球市場。還記得當時有一位做運動品銷售的朋友，他向我們有推介買李寧的羽毛球拍。大家都知道，雄霸咗香港羽毛球拍的是日本的Yonex，它的球拍價格比較貴，但說真的，質量非常之好。反觀當時朋友推介的李寧羽毛球拍，首先冇乜名氣，雖然攞上手，手感也不錯，但價錢竟然比Yonex 還要高，當時我心裏面就在想「有冇搞錯啊？一個新品牌，打入一個成熟的市場，仲要賣得比高質素的Yonex貴，憑什麼啊？」，所以對李寧這個品牌便開始沒有那麼好感。

第二件事，就是李寧的球鞋，我還記得在電視上看到羽毛球比賽，當時是女子單打。這事件發生在2021年9月，涉事的女球手是剛在東京奧運奪得羽毛球女子單打金牌的中國國家隊名將陳雨菲。比賽進行到第二局時，陳雨菲突然向裁判申請醫療暫停，隨即由現場醫生對她的右腳大腳趾進行包扎。換回舊鞋後才繼續完成比賽。賽後陳雨菲透露，比賽期間運動鞋鞋頭突然開裂，鞋內防護或結構組件中一根疑似「鋼絲」或高強度防割線的硬質細線露出來，在往前衝刺時直接扎入並割傷了她的右腳大腳趾，傷口深達數公分且流血。輿論與資本市場反應： 由於陳雨菲當時剛奪得奧運金牌，事件引發廣大球迷與公眾對國產專業體育裝備品質控管 (QC)的強烈質疑。受此負面消息影響，李寧股價在隨後的交易日中曾顯著下跌超過 5%。該款球鞋隨後也在各大電商平台全面下架。

大事方面，亦都有兩件大事影響李寧股價。

第一: 在2023年底，李寧以$22.08億港元向恆地購入北角商業大樓「港匯東」作為香港總部， 約14.4萬平方呎 (包含 22 層辦公/商業空間及 2 層零售區域），宣佈推進國際化發展策略，但也因在房地產市場下行期大手筆買樓而引起市場關注。雖然這一項投資，未必錯得晒，因為在香港設總部，唔買一個物業，都要租個地方。如果價錢適合，未嘗不可。只不過當年用$22億港元買入，今天這個物業還值幾多錢呀？按照香港現在的市道，北角的商業大廈，理論上應該會貶值好多，所以呢一項投資，是否值得呢？但當時市場反應，就係唔接受李寧呢一個投資決定，所以股價也大跌一輪！

第二: 庫存去化與折扣壓力。近年受內地消費環境影響，李寧面臨高端化轉型遇到瓶頸、線下門店庫存去化壓力，公司積極進行產品結構調整與促銷清理庫存。即是說，李寧大量生產運動服裝，務求將每一件產品的成本降低，這個做法沒有錯，問題是它生產出來的產品，銷售得很慢，堆積如山的存貨，變成舊貨，根本不值錢，最後要作出大量撥備，影響股價。

李寧，現在公司市值若$330億港元，市盈率10倍，股息率5%。驟眼睇落去，好似冇乜大問題。李寧剛剛公布2026年上半年業績，賺了近$21億港元，增長一成。派息也增加了，原則上應該可以托得住個股價，但偏偏股價卻在今天創下52週新低，報$12.65元。今年的高位在四月，超過$23元，短短半年，股價唔見一半，真係可憐。

現在看來，這間公司並非不賺錢，但品牌上，絕對冇得和國際品牌Nike比較。其實很簡單，行出街，望一望有幾多人着住李寧的衣服和球鞋，再看看有幾多人着住Nike的服裝和波鞋，從這些細微地方，大致上可以感覺到呢間公司將來的發展狀況。李寧只能夠留在中國發展，但中國經濟差，消費自然弱，對它的前途要有所保留。

News 2: 中國千祈不要學Cybercab

Tesla Cybercab 最近正式喺美國德州奧斯汀 (Austin, Texas) 投入服務。它不是免費的，目前 Cybercab 喺奧斯汀特定限定區域內提供付費網約車服務 (付費接送)。我已經睇咗好多YouTube嘅片，關於呢一個服務。到目前為止，大部份乘客都覺得非常新奇，而且又覺得可靠，所以如果呢個服務擴展開去其他地方，當地的的士司機，唔知會點算，我相信隨時會發起大遊行，抗議Cybercab奪取他們的生存空間。

Tesla Cybercab 嘅收費相對傳統的士同網約車 (如 Uber、Lyft)非常便宜，價格競爭力極高。例如，目前Cybercab 每英里的收費在$0.3-0.4美元之間，長遠來發展，Elon Musk 希望可以壓縮到每英里$0.2美元左右，記住一英里等於1.6 km，睇落去似乎真係非常之平喎。以香港紅的為例，每200米收$2.1港元。咁一英里即係1600米，應該會收$2.1*8= $16.8港元 (or $2.15美元)，嘩，真係有冇搞錯，Cybercab每走一英里，收費竟然仲平過香港的士 ，仲要平咗最少八成，所以唔好話喺當地造成非常大的爭議，就算將來Cybercab 嚟咗香港的話，所有香港的紅的、綠的，都根本冇可能生存得到，直程係死路一條。

至於在德州奧斯汀，情況就更加差，根據AI所提供的資料顯示，Uber/Lyft 每一英里收$1.5-$2美元，呢個價錢，已經實在太貴了。如果唔搭Uber，乘搭當地的的士，又如何呢？情況將會更加恐怖。因為當地傳統的士每一英里的收費大約$2.5-$3.5美元，點樣同Cybercab 鬥？完全冇得鬥。所以將來好多的士司機，或者Uber司機，都會因為Cybercab而冇工做。咁點算呀？諗到呢度，我都替當地司機悲鳴起來！

中國和美國一向都在科技上你追我趕。例如，大家在鬥太空火箭回收，大家在鬥AI有幾先進等，不過今次我真係希望中國唔好和美國鬥Cybercab，因為中國現在的經濟，表面上GDP仍然有得增長，內地官員感覺自我良好，但現實中，政府也講過，在中國「靈活就業」已經是一個新常態。根據官方保守統計 (底線): 人力資源和社會保障部(人社部)等官方公開數據顯示，中國靈活就業人員規模已超過2億人，約佔全國約 7.25 億總就業人口的 30%。如果是民間的統計，今年已經高達3.2億人在這個靈活就業的範疇裏面，情況非常之不樂觀。

如果一旦中國政府又要發展類似Cybercab的產品，有幾多中國人會受到牽連呢？說少的，分分鐘牽涉過千萬人，所以呢啲高科技嘅嘢，盡量唔好學，可免則免，一定要保住人民僅有的賺錢能力。市民一旦失去賺錢能力，冇收入，哪有錢消費呢？所以將來起得再多的基建，也沒有人用得起，到時牽引出來的經濟問題，只會越來越大。

同樣地，我亦為香港擔心，幾時Cybercab會殺到來香港呢？我曾經有這樣問過我的朋友，他們都不太擔心，他們說最少還有10年時間。不過，其實10年時間，眨眼之間便過去了，所以現在要投資的，最好也不要碰紅的、綠的了，因為現代的科技進步速度，比我哋想像中還要快，說不定不需要10年時間，香港已經遍地都是Cybercab。大家可能還期望，到時我哋就有平價的的士坐了，但我反而擔心到時我們還有沒有經濟能力坐這些平價的的士。唉這個世界實在太複雜了，大家要為將來作出精明的打算。

後語

由於我的YouTube頻道，被封鎖了賺錢能力，現在一毫子都賺唔到，但係我又想同大家見面，所以就寫下散文，一來可以抒發一下，二來都仲有微博的廣告收入。所以在此希望各位俾面，睇吓文章之餘，幫手按一按文章附近的廣告，希望咁樣可以得到少量的廣告費，多謝大家幫忙，感激不盡！

六合彩看人性、蘋果公司 (Sept 14, 2026)

News 1: 中六合彩看人性

最近有一單六合彩嘅新聞，原本就應該皆大歡喜結局，但情況竟然因為人性的貪婪，變成一單案件，而且警方介入之後，就唔係變成民事案件，而是刑事案件。由一個15人組成的「想發達團隊」，夾錢買六合彩，最後真係中咗頭獎，不過因為係$5一注，所以拿到嘅獎金只有原本頭獎嘅一半，即係$3,100萬左右，大家平均分，每人應該可以分到超過$200萬元，應該普天同慶，但悲劇發生了。

幫手去投注的那一位仁兄，在中獎之後，竟然話要獨吞$1,000萬元，餘下的，才給另外14位仁兄均分，即每人大約可以得到$150萬元左右，就是因為呢一個協議未能達成，幫手投注的那位仁兄，竟然玩失蹤，其餘的14位仁兄只能報警，而且呢一單事件竟然成為新聞熱門話題，最後，想獨吞$1,000萬的那位仁兄，被警方尋獲了，相信財神不會找上門，但麻煩將會接踵而來。這件事件也看見人性的一面「不能共富貴」。

根據報章所寫，如果成為刑事案，呢一位貪婪的仁兄，可能將會得不償失，名聲沒有了、自由也可能沒有了、份工也可能沒有了、強積金也可能沒有了、友情也可能沒有了。

在報章上看到的新聞，其實還有很多有趣的數據，沒有公開，不過我們可以用AI推斷一下這些有趣的數據。例如，今次15個人一齊投資買六合彩，到底投資幾多錢呢？最有可能係買九個號碼，總投注額$420，平均每人出$28元，這個金額可能少得滯。所以或者買10個號碼，總投注額$1,050元，每人平均出$70，呢個數字可能比較合理。雖然多人夾錢投注，但相信這批老友記，應該唔係搏晒命，都係想買個彩數，所以每個人平均投注額在$28-$70之間，合乎刀仔鋸大樹的常理。

如果呢一班人好彩，除咗中半注頭獎之外，仲可以中多六注二獎和18注三獎（當然都係以半注嚟計），二獎半注可以獲得$30萬左右，三獎半注也可獲得更$19,000元，仲有其餘那些四獎、五獎等等，加加埋埋，隨時都仲有多$200、$300萬元的額外獎金比大家去分。

站在貪婪仁兄角度去看，相信他認為人生只有一次可以中六合彩的機會，而且是靠他的「上帝之手」才獲獎，所以他要分多啲，某程度上，我認同佢可以分多少少，不過唔係咁大貪，我相信其餘嗰14位仁兄知道自己會中獎，俾多少少錢呢一位幫手投注的仁兄，我相信冇乜所謂。可惜貪婪掩蓋了他的理性，加上傳媒大肆報道，相信他的麻煩會接踵而來。冇咗份工，損失有幾大呢？ 佢有冇計過呢條數呢？如果刑事罪，最後要坐監，呢個損失又有幾大呢？加上以後喺親朋戚友面前，恐怕都抬不起頭做人。雖然香港而家經濟困難，錢對每一個人來說都是重要的，但是如果唔貪心，可以分到呢$200多萬元，始終都可以改善屋企人嘅生活，甚至攞嚟投資，可以賺得更多，點解呢位仁兄，咁衝動，冇諗清楚呢？

站在那14位有份投資的仁兄角度來看，如果我係其中之一個，其實我唔介意俾多十萬八萬嗰位幫手投注的人，始終係幸運錢，大家開心，中咗獎，只要將獎金好好利用，積少成多，也能夠令到大家以後的生活好過一點。不過最後竟然要變成反目成仇，這就是人性的一面，很有趣的！

如果將啲獎金買港股，例如我最愛的香港電訊 (6823），現在的回報率有6.6%，將啲獎金擺晒落去，每年有10幾萬股息，平均一個月都有萬幾蚊，幫補吓生活上嘅開支，我覺得挺不錯的。如果再進取啲，買晒落去台積電 (TSM)，兩年之後，分分鐘由$200萬元變成$400萬元都唔出奇，到時生活就更加富裕了。

我諗嗰位貪心的仁兄，如果佢好似我咁理性去想，應該唔會做傻事，而家麻煩來了，要一段時間去解決，淨係咁已經影響心情，都已經唔好啦。其實如果咁貪心的話，我建議佢，應該自己再攞啲錢出嚟，買多次同一組號碼，雖然係要俾多啲錢出嚟，但係如果中獎的話，那額外的$3,100萬元獎金便是自己獨吞的，咁咪仲好！相信呢位貪婪的仁兄，如果看見我呢一篇文章，應該會非常後悔、非常揼春，一時的貪婪，造成無法挽回的局面，何必呢？ 不過呢個故事都給予我哋一個警惕，投資股市，也不要太過貪婪，因為最終可能「貪字得個貧」，呢啲事件，日日都喺股市上邊發生。

News 2: 蘋果 (AAPL)產品會賣得好嗎?

蘋果終於有新產品發佈了，而且最近股價，做得相當唔錯。由原本比較低迷的$315美元，升到最近高位$332美元，似乎對新產品投下信心嘅一票。不過，我們沒有水晶球在手，這些新iPhone，是不是真的可以賣得好，始終都要睇數據。講真，我對iPhone 18 Pro 和iPhone 18 Pro Max 冇乜特別感覺。iPhone 18 Pro和Pro Max 基本版，比上一代貴了$100美元，算是非常克制，但市場開始擔心，它的毛利和毛利率，會否受到重大影響？ 所以對間公司股價的估值，都有不同睇法。

例如富瑞指，蘋果(AAPL）自9月12日開始預購以來，該行追蹤六個主要市場的交貨時間按年明顯縮短，惟中國及香港的18 Pro Max除外，該行視此為銷售偏弱的可靠指標。與一年前iPhone 17系列相比，美國、英國、德國及日本的18 Pro Max交貨前置時間縮短5至11日。

該行又指，Duo初步網上評價大致正面，主要受為摺疊機度身訂造的iOS體驗帶動，惟硬件規格落後於三星及小米等Android旗艦摺疊機。Duo將於10月16日開始預購。該行對Duo的看法自發布以來並無改變。最終，給予蘋果「跑輸大市」評級，目標價$263.66美元，較前一交易日收市價$332.27美元有21%下行空間。 嘩、真係睇得好淡喎。

另一間大行，里昂指蘋果可摺疊iPhone Duo的出貨前景較市場多數預期更樂觀，料可為產品收入、iPhone混合平均售價帶來支持，並有助在記憶體成本上漲下更好地守住利潤率。該行維持蘋果「跑贏大市」評級，並將目標價由$355美元上調至$405美元。預計可摺疊機2027財年出貨3,500萬部，遠高於其他研究機構所講的1,020萬部預測。

摩根大通報告指出蘋果發布iPhone 18系列開放預訂後，追蹤美國、中國、德國及英國等主要市場的交付等候時間作為需求指標，雖然目前仍屬非常早期，但兩款已開放預訂型號於首周(即預訂周)的趨勢均低於iPhone 17系列，消費者可能正在等待可折疊手機(Duo)推出，尤其是在中國市場。該行維持蘋果「增持」評級，目標價$340美元。 

中國是蘋果其中一個最重要嘅市場。最新消息顯示，內地已經出現黃牛黨，希望以高價賣出iPhone 18 Duo，官方建議價是16,000元人民幣，但網上有人想以9.9萬元人民幣出售，如果真係賣得出，咁就肥仔水啦！所以內地而家出現一個火爆搶機潮，據說一開始在網上預售，不到1分鐘，多個電商平台已經顯示「售罄」，據說有好多有心想買入自用的內地人說「根本搶不到」。我懷疑可能係以前太多內地人舐過嘢，買咗華為嘅摺疊機，谷到一肚火，所以而家轉買蘋果手機，起碼穩陣啲呀嘛，而且將來二手價，亦都比較保值啲。

最後，呢次蘋果產品得唔得，一定要俾啲時間出嚟，起碼睇到12月底，咁就知道蘋果呢一次會唔會贏嘞，一旦贏出咗，股價就唔同晒㗎啦，甚至整間公司可以再挑戰全球最高市值，新嘅CEO上場，希望有一番新景象，我都要睇吓有冇機會，俾我低價買入，再賺返少少錢，買返個靚AirPods先！哈哈！

後語

由於我的YouTube頻道，被封鎖了賺錢能力，現在一毫子都賺唔到，但係我又想同大家見面，所以就寫下散文，一來可以抒發一下，二來都仲有微博的廣告收入。所以在此希望各位俾面，睇吓文章之餘，幫手按一按文章附近的廣告，希望咁樣可以得到少量的廣告費，多謝大家幫忙，感激不盡！

大眾金融、新鴻基地產 (Sept 11, 2026)

News 1: 大眾金融 (626) 終於私有化

如果我冇記錯，大眾金融前身應該叫做「日本信用」，我細細個嘅時候已經聽過呢個名，而且當我有能力買賣股票嘅時候，曾經都持有呢一間公司嘅股份。點解喜歡這間公司？ 因為我研究咗佢好耐，發覺佢嘅生意模式幾好賺，每年派發嘅股息又幾好，所以好早好早之前就投資在它身上。

其實大眾金融在金融界裏面扮演嘅角色，係次一等的銀行服務。例如有個人去第一等銀行借錢 (滙豐、恒生、渣打、中銀等)，但係呢啲銀行都唔肯借錢俾佢。在這情況下，只能夠去一啲二等的銀行借錢 (東亞、星展、大新、或其他中資銀行)。如果連第二等級的銀行都唔肯借錢，咁就冇辦法啦，唯有幫襯大眾金融。當然，佢肯借錢俾你，利息一定唔會平，但係佢所冒嘅風險，亦都比別人高。香港經濟未開始衰退嘅時候，其實它的生意一直都保持穩健，年年都有錢賺，年年都有增長，實在是一個不錯的投資選擇。

可惜好景不常，疫情過後，我們香港市道根本就沒有好過。所以大眾金融所借出去嘅錢，就開始出現問題。例如借錢比客戶去買舖位，死得！借錢俾客戶買物業，又死得。加上佢做埋的士牌融資，咁就更加大鑊。如果我又冇記錯的話，紅色的士最高峰時，牌價是大約$7.2百萬，一路狂跌到，最近的紅色的士牌價大約$2.2百萬左右，跌幅接近七成。咁嘅情況之下，大眾金融的業績又點會好得去邊！

它的業務，由2021年賺近$5億元，之後一直急速下跌，到2023年，盈利只有$1,400萬元。到了2024年，轉盈為虧，蝕了近$10億元。到了上年2025年，情況才穩定下來，賺了$8,000萬元左右。即使從回盈利水平，但和當年可以賺近$5億元比較，只及當年的25%，相信仲有排療傷，如果香港嘅經濟一直都不能夠再興旺起來，睇怕它的業績，也只能夠在這些低水平的位置徘徊，都幾慘，但冇辦法，現實嘅經濟狀況就是這樣！

既然盈利表現下滑，股價亦從高峰期的$3.3元左右，跌至2024年的$1.19元，跌了近64%，小投資者心都碎了，好彩的是，這間公司的股權特別集中，大股東 (大眾銀行)持有超過73%，所以街貨大約少於27%。其實呢間公司每股資產淨值唔差，有大幅折讓，大約每股值$7元。正因如此，終於大股東提出私有化，作價每股$2.5元，令到股價最近急升至$2.2元。如果你博私有化成功，仲有水位$0.3元俾你賺，賺幅大約有12%，大約兩個月之後就會揭曉私有化到底會否成功？

若然成功，你會賺到12%，但是如果私有化失敗，應該打回原形，你可能會倒蝕40%，你夠唔夠膽博呢？我以前計過條數，所以有2間公司進行私有化，都得到甜頭，它們便是合和實業 (54)和利豐 (494)，今次大眾金融私有化，由出現比較大嘅水位，可以研究一下，不過都係嗰句，一旦私有化失敗，就會坐艇，要有心理準備。

News 2: 新地 (0016)可以雄霸中港地盤

我在2026年9月3日發表咗一篇文章，裏面嘅內容包括了新鴻基地產 (0016)，它現在貴為香港嘅地產龍頭，睇吓其他嗰三間公司，都冇得同佢鬥落去。新世界 (0017)瀕臨破產邊緣，佢如果搞得掂自己嗰盤數，渡過難關，已經算了不起。但如果想同新地爭天下，諗都唔好諗。至於恆地 (0012)，講過好多次，就係中環嗰兩塊地，食到佢飽晒，而家仲要慢慢消化。加上大股東四叔家族借咗好多錢俾恆地，現在照睇情況，大股東都想收返一部份嘅貸款，所以相信恆地現在會盡量公平地還一啲街外債，然後再還一啲大股東嘅債，直至到大家都舒服嘞，恆地先至會再出嚟大搞一場。至於最具實力的長實集團 (1113)，你睇到李澤鉅嗰種神隱方式，就知道佢無心戀戰，佢手頭上仲有一啲地可以發展，另外仲有好多物業，可以放售，所以小超人應該唔會喺市場上同新地爭地盤，冇咁嘅必要。甚至如果可以嘅話，相信李澤鉅會繼續發展海外事業，甚至可能將長實集團轉型，唔會淨係經營地產業務，所以新地呢位龍頭大佬，位置應該坐得幾穩！

新地剛剛公布2025/2026年度的全年業績，全年收入有$941.94億港元，按年上升了18.2%，純利有$214.26億元，按年升了11%。不過和市場預期可以賺到的$235億元，還是遜色了一點，可能呢個原因，今天其股價竟然大跌超過7%，十分罕見，報$108.2元 。但係如果你話唔關業績事，咁可能仲有一個原因，就係美國預期會在九月份加息，嚇怕了市場，所以地產市道預期會唔好，貴為龍頭大佬，跌得多啲，可以理解。

不知道大家對新地業務上有多少理解，但其實新地業務非常之集中，一心一意就係做地產有關的生意。它的主要市場就是香港和內地。無論在香港或是在內地，業務上分類兩大類，第一類，起樓、賣樓。第二類，就係將起好嘅樓，出租。

剛才說過，剛剛公布嘅業績，營業額有$941.94億元。香港是主要市場，做了$837.55億元，佔整體收益88.92%。其餘的便是來自內地的營業額 ，佔餘下的11.08%。這個比例幾好，起碼知道新地向內地發展，但不是太進取，現在的時勢，太過進取，反而不是一件好事。不過當然，將來新地嘅發展，好取決於家族成員的取態，和會否有外來的壓力。例如，如果中方邀請你去內地投資，這便是外來的壓力，難道新地夠膽說不嗎？

剛剛公布了的利潤是$214億港元，比起上年賺了近$193億元，增長了11%，應該就係賣樓進取了，才有此成績，如果賣樓的步伐沒有加速，相信利潤方面，未必有得增加，甚至倒退添！

公司嘅財務，最緊要穩健。根據最新一份財務報告指出，它的淨債項與股東權益比較，大約是10.7%，睇呢個數字，應該就冇問題啦，債務水平非常之低。不過有幾個有趣的數字，大家可以留意吓。

最新的現金有$300億元

最新的流動債務有$653億元

最新的長債務有$1,138億元

最新的總債務有$1,791億元

最新的總資產有$8,177億元

所以總資產 ($8,177億元)減去總債務 ($1,791億元)，剩返落嚟的$6,386億元，便是股東的。如果根據以上呢堆數字推論，債務比率應該是21.9%，所以大家可以睇清楚新地最新的財務狀況。

最後，最近內地禁止賣樓花，雖然政策還未太清楚，但總括來說，就係要將樓起好，才可以出售，保障買家可以有一個安樂窩，可以收到樓。但這樣一來，對發展商的財力便是一個考驗。大家都知道內地所有內房公司，它們的財務狀況有幾咁穩健，我相信大家都心裏有數。所以現在看起來，對新地有危有機。如果內房公司實力不夠，將來就很難和新地競爭，即使有靚地，都可能比新地擸咗先。不過最緊要都係一句，內地的經濟，可唔可以去返疫情前咁好呢？如果唔可以嘅話，如果係一個結構性問題嘅話，又如果新地繼續投資內地嘅話，咁就唔係一個機會，而係一個危機，大家睇路啦！

後語

由於我的YouTube頻道，被封鎖了賺錢能力，現在一毫子都賺唔到，但係我又想同大家見面，所以就寫下散文，一來可以抒發一下，二來都仲有微博的廣告收入。所以在此希望各位俾面，睇吓文章之餘，幫手按一按文章附近的廣告，希望咁樣可以得到少量的廣告費，多謝大家幫忙，感激不盡！

長江基建、海底撈 (Sept 9, 2026)

 News 1: 長建 (1038)今日除淨

相信讀者或者係睇我影片的觀眾，都知道長江基建是我的愛股，由我開始出來打工賺錢，便一直注視這間公司的發展。我鍾意呢間公司，好大原因係因為李嘉誠，因為我鍾意佢的經營方式。而且，當我開始投資長建的時候，正正是這間公司高速發展的時候。李嘉誠將呢一間小型公司交俾大仔李澤鉅，試吓個仔的經營能力。如果我冇記錯，長建最初的時候，是投資中國。當時中國經濟還在非常初階水平，需要有外資去幫手。例如起馬路、起電廠等，當時都非常之大需求。長建食正呢條水，公司規模便慢慢形成起來。

後來唔知係咪覺得中國發展前途唔好，定係外面有好世界，長江基建正式向西方國家進發，其中一個最主要嘅國家，就係英國。曾經有人誇張地形容，李嘉誠買起半個英國，因為有好多基礎設施，都同佢有關，喺呢度就吾再詳細講解了。不過有樣嘢可以肯定，李嘉誠父子肯去投資的地方，一定係法律系統比較健全的。基本上五眼聯盟，都有他們的投資足跡，包括了英國、澳洲、新西蘭、加拿大、歐洲其他國家。現在的業務，全部國際化。我亦都相信，在香港嘅華人企業當中，只有長和系擁有豐富的海外投資經驗。邊一個富豪要投資其他地方，真係應該要問吓李嘉誠父子，唔係講笑的！

1996年7月，長江基建上市，當時的招股價是每股$12.65元，第一年派的股息是$0.16元。以當時嘅情況來看，股息率非常之低，只有1.26%。不過如果你由一開始就買入呢一間公司，持有到現在，足足30年，當你有90歲命，這30年已經是你人生的三分之一。所以，應該值得擁有一個理想的回報率。今天的收市價是$66.3元，和30年前比較，升了5.24倍。你可能會說，這30年裏面，只賺了五倍多些，回報率似乎唔夠吸引喎。不過，我哋還忽略咗一樣東西，便是長建所派發的股息，亦要計入回報率裏面。

2025年，長建國派發每股$2.61元的股息，以當年的招股價 ($12.65元)來計，回報率有20.63%。或者可以咁講，你買入長建的股票，就好似你買咗一間屋，長期擺響度收租，2025年的回報率就是高達20.63%。而且長江基建仲有一個綽號，叫做股息增長王，點解？原因很簡單，因為由上市那一年計起，它每年的股息都有增長，連續增長了30年，肯定係一個紀錄。好多人對李澤鉅好有意見，話佢比較冷血無情，但長江基建在他的主理之下，最少得到一個好的封號「股息增長王」，所以，如果李澤鉅希望保持呢一個好的聲譽，相信股息增長，應該會持續。

尤其最近一年，長江基建出售一部份英國的資產，已經套現咗一大筆錢回來，手上現金扣除所有債務之後，仲有起碼$272億港元在手。所以，只要其餘的業務繼續保持平穩和增長，加上手上的現金，我看不到股息為何會沒有增長？所以大家放心吧，如果你持有呢一間公司嘅股票，一定可以收到合理的股息。以最近的股價來計算，它的股息回報率大約有4%，不算太高，但勉強可以接受。因為它現在是一間非常健康的公司。

用AI計算過，直至到2025年底為止，如果你由上市到現在一直持有股票的話，咁多年來，每一股可以帶給你大約$40.4元的總股息，大約回報率有3.19倍。所以總括來說，股價上升，帶來5.24倍的回報，股息累積，又帶來3.19倍，最終，這30年裏面，你的總回報率是8.43倍，每年平均的回報率有7.37%，你滿意嗎？

News 2: 海底撈 (6862)創出三年新低

在內地股票裏面，有三間公司，我一直都睇佢哋唔順眼，偏偏呢三間公司，都成為藍籌股，所以我更加唔服氣，覺得恒生指數亂咁嚟。今日終於可以講吓其中一間，叫做海底撈 (6862)，因為呢一間公司嘅股價已經跌至三年低位，最新報$10.34元，今天跌了超過9%，不過，市值還有$576億港元。為何今天的股價，會跌得那麼厲害呢？

原因是海底撈的控股股東 (由張勇、舒萍等組成)透過大宗交易方式以每股$10.62港元的價格出售公司2.59億股，佔已發行股份總數約4.65%，套現超過$27.5億港元。然後下一個問題就係，點解大股東要出售股票呢？睇唔好公司前景？

海底撈表示，該項出售純粹出於大股東自身資金需要及財務安排而作出，並構成股東層面的私事。其與集團的業務、營運、財務狀況或發展前景概無任何關係。既然大股東等錢使，咁即係代表大股東好唔掂？如果係咁嘅情況，會唔會遲啲繼續減持股份呢？何況今日的收市價，已經跌穿了他們的出售價。即係接呢一批貨嘅人，已經輸緊錢，你話幾無謂呢！

海底撈，做飲食業的，經濟好，生意自然源源不絕的來。但近年中國的經濟，大家都可以睇到，蕭條咗好多。雖然去海底撈食飯未必要太貴，但當大家都冇錢嘅時候，慳得就慳的原則之下，自然就會少去呢啲餐館食飯。所以我認定，海底撈的生意肯定唔會好，所以個股價唔應該太高。偏偏有一段時間，可能有大行嘅吹噓之下，間公司的股價，升得比較離譜，我看不過眼，所以我討厭這間公司，現在看見這間公司的股價，我覺得我之前的推理，完全合理，喺呢一篇文章，最下低有一幅圖，大家落足眼力睇吓我之前拍嘅片有關於海底撈的，冇一條片係讚佢，可想而知，我對呢間公司係完全冇好感。

不過海底撈都俾咗一個啟示我哋，經濟好，自然多人出嚟消費，現在它的股價不斷跌，肯定係經營情況有問題。不過睇返佢盈利表現，2023、2024、和2025年，年年都賺接近$50億港元，睇落去環境唔錯喎，但它的股價一直跌，肯定係有一啲知情人士，提早沽貨離場。最新消息顯示，海底撈手上還有60億元人民幣現金。長期負債26億元人民幣，不過唔使馬上還，所以仲有空間可以應對。至於短期債務，即係一年之內要償還的，有超過86億元人民幣，似乎手上現金，未夠履行短期債務，有違約風險。

加上海底撈近年股價高位是今年年初，超過$17.5元，如果大股東醒目，要出售股份套現，都應該係喺今年初，冇理由喺而家呢個時間嚟出貨。但係在今年年初高位買入的投資者，我實在戥他們心痛，從年初高位$17.86元啲至今天的水平，一共失去了42%，非常接近腰斬。如果遲啲公司的業務走樣，相信股價仍然會繼續的。至於會跌到去咩水平呢？大家要計一計數。首先，2026年上半年，海底撈仍然錄得盈利$20.42億港元，如果下半年的業績保持平穩，又或者差過上半年，全年盈利將會錄得倒退，大約三成左右。到時就睇吓市場點樣去解讀呢一份業績，我都覺得呢間公司好值得大家去分析，考驗吓自己嘅眼光，我們很快就會知道這間公司的全年盈利啦，不妨拭目以待！

後語

由於我的YouTube頻道，被封鎖了賺錢能力，現在一毫子都賺唔到，但係我又想同大家見面，所以就寫下散文，一來可以抒發一下，二來都仲有微博的廣告收入。所以在此希望各位俾面，睇吓文章之餘，幫手按一按文章附近的廣告，希望咁樣可以得到少量的廣告費，多謝大家幫忙，感激不盡！

馬會、中芯國際、蘋果+台積電 (Sept 7, 2026)

News 1: 馬會帶你睇香港經濟

在九月初，香港賽馬會舉行周年大會。兼且公布全年業績。馬會係冇上市的，不過它的規模，比任何一間上市公司都要大。我有一位朋友，在馬會裏面工作，他說馬會給予的福利，仍然非常不錯的，所以馬會可算是香港比較肯照顧員工的良心企業。

馬會嘅收入，可以用天文數字嚟形容。上一年的博彩收入創下$3,317億港元的新高，並且向政府繳交$293益港元的博彩稅，相信全香港，冇乜邊間企業，可以交到咁多稅項。根據稅局表示，收到馬會嘅稅款，佔整個年度嘅稅收入6.4%，非常驚人的數字。講明會係做慈善機構，上年度都攞咗$393億港元回饋社會，我相信又係一個記錄。講真，不敢想像如果冇咗馬會的慈善捐款去幫助弱勢社群，相信日子會更加難過。

據說馬會投資在從化馬場的賽馬活動將會延期，因為同內地傾唔掂，不過如果一旦傾得掂，可能又會帶來另一筆的收入。你知啦，既然經濟唔好，好多人都會話「生意淡薄，不如賭博」，所以將來從化馬場，一旦可以舉行賽馬賽事，相信會吸引到一批內地人來投注，到時唔係應該賺得更多咩？ 其實呢一個方案應該係雙贏，但是點解內地政府會叫停？難道係國策覺得賭博唔應該喺國內發生，咁就不得而知啦。都係嗰句，上年業績好，又唔代表今年業績會繼續好，始終見到香港嘅市況，每況愈下，真是有點擔心。

9月6日，新的馬季開鑼了！據說入場的旅客大幅度上升約74%，人山人海，理論上非常熱鬧，原則上投注金額應該會再創高峰。但係我哋估錯咗啦，昨日的總投注金額只有$12.91億港元，和上一季比較，下跌了7.1%。根據馬會訊息表示，在疫情前的2019年，入場人數高達6.8萬人次，雖然今年都有近4.4萬人次入場，但和當年比較，還是差很遠。某程度上，可以話香港的情況，根本未恢復過來，只及當年的65%左右，一個字「唉」。

馬會的業績，亦都係我哋香港經濟的寒暑表。第一個賽馬日，投資金額倒退，有點不太吉利。往後的日子，投注額會否繼續下降呢？某程度上都要睇吓香港嘅經濟做得好唔好。例如股市好，投注額都可能會高啲。如果遇上加息潮，影響經濟，恐怕馬會今年的收入會有跌幅，一來影響政府稅項收入，二來亦都會影響慈善捐款，其實貧苦大眾，都希望靠着馬會的捐款，可以提高一些幫助，令到大家生活得好些。說真的，踏入2026年後，看到香港更加多舖頭關門大吉，呢個係我親眼見到的。反而政府所說的經濟增長勝於預期，我未親身感受到對香港帶來什麼得益，確實有點奇怪，難道我的體感出了錯？哈哈哈！

News 2: 中芯國際 (981)繼續做龍頭

不知最近大家有沒有看過一段新聞，提及過中國製造芯片的發展情況？呢段新聞來自瑞銀的分析，話中國半導體制造能力在未來十年內可能仍難取得足夠進展，以開發出可替代ASML (ASML)尖端極紫外光刻 (EUV)技術的可行方案。大家嘅技術相距10年，對我來說，一點也不覺得驚奇。就正如瑞銀的分析師所指，現在中國的光刻機發展，如果和ASML比較，大概只是ASML 2004年的水平。現在都2026年囉，大家技術相距超過12年，點追啊？

總部位於荷蘭的ASML是全球唯一一家生產先進光刻機的廠商，這類設備對於製造先進半導體至關重要。中國原本是ASML主要市場之一，但卻被美國禁止向中國出售極紫外光刻設備。就是因為彼此的距離拉遠了，反而一間公司會有運行，就係中芯國際(981)。它現在的股價從高位的$93.5元下跌至到$68.3元，雖然跌幅不算厲害，但奇怪的是，它在中國的地位，應該屬於「單天保至尊」，即係冇咗佢唔得，所以理論上，股價應該繼續向上衝衝衝才對。又或者因為它的市盈率已經高達106倍，所以想衝都有點困難? 看見它每日的成交金額，都有幾十億港元，有理由相信，很多小投資者，都在這間公司上面搵食，靠股價波動，賺取差價，未嘗不可。

中芯國際唔係冇錢賺，不過業績竟然是倒退，是不是很奇怪？例如在2022年，公司賺了$142億港元，相當不錯，是不是？到了2024年，公司只賺了$38.25億港元，倒退得幾緊要！明明是龍頭大佬，是一間幫中國生產晶片的唯一一間企業，賺錢應該越嚟越多，點解盈利會越嚟越少？仲有，呢間公司生產嘅晶片，神神秘秘，永遠唔會話你知，到底它現在是生產幾多納米嘅晶片？所以我一向對透明度低的公司，冇乜興趣！再加上這間公司長年累月，都唔會派股息，連一啲安慰都唔俾股東，咁點解要投資喺呢間公司身上呢？你睇吓台積電 (TSM)，雖然派息唔多，但見到股息逐年增長，長期持有，可能係一個唔錯嘅選擇。例如，在2022年，全年派息美股$1.4美元，到了2025年。派息每股增加到$2.78美元，差不多增長一倍，咁樣嘅公司，再過多三年，股息可能增加到$6美元一股，咁咪好有睇頭囉！

所以總括來說，中芯國際，係可以攞嚟炒，但係要睇吓價位靚唔靚，高位買入，後果自負。不過作為一個長期投資者，只能夠短炒獲利，感覺上不夠實際，都係長線投資會好啲。要做到這一點，中芯國際管理層，必須要做兩樣嘢。第一，將公司嘅營運狀況要透明化 (不過相信好難做到)。第二，公司要有派息，咁樣先至有長期股東支持，只要股東一日唔賣咗啲股票，市面上流通嘅股票數量，就會減少，對股價，肯定有幫助。當然，可以加多一樣，就係如果有能力回購股份，咁就更加好。不過， 相信呢間公司應該好難做得到，祝大家好運！

News 3: Apple (AAPL) + TSM (TSM)

9月9日，重九，美國股市應該有兩個重磅的消息會公布。第一單，就係蘋果會公布新產品的巡禮。因為近期儲存晶片價格升得好離譜，令到蘋果非常之頭痕，Tim Cook直情話佢做咗咁多年CEO，都未見過儲存晶片價格升得咁 離譜，所以市場相信，推出嚟的新iPhone，必定會加價。而事實上，大約早一個月之前，我去過豐澤舖頭睇過，當時的店員已經告訴我，iPad的價格，每部加咗$800港元。另外其他電腦，都會好快加價。最近又再去豐澤，睇吓啲電腦價格，果然冇錯，全部加晒價，而且個價錢，對我呢啲實用者嚟講，實在太貴啦，買唔起。

好耐以前聽過巴菲特講，佢投資蘋果，係因為蘋果嘅品牌有黏貼力，什麼意思呢？ 即係顧客如果想換手機，一定會買返iPhone，唔會買其他牌子，呢啲就叫做黏貼力。所以今次如果蘋果真係加價，而且加得好離譜的話，咁就可以試得出顧客的黏貼力有幾大。但我想深一層，儲存記憶體價格上升，受害的唔單止蘋果，其他公司都會受影響，如果大家都一齊加價，咁蘋果加價的影響，相對就會減少。

始終蘋果產品價格，即使顧客好有黏貼力，但如果價錢太貴，好可能會延遲購買，咁樣嘅話，就會影響蘋果嘅收入和盈利，一定會反映在股價身上，到時可能會帶動納斯達克指數向下調整，問你驚唔驚？同樣地，亦都可能係一次機會，俾你平價買入蘋果股票，話唔定將來贏到嘅錢，足夠買一部頂級iPhone，咁咪變成唔使錢囉，免費送俾你！我最近買入咗一批蘋果股票，然後分兩次賣出，當然全部獲利，但係唔知夠唔夠錢買一部最新的iPhone Pro。所以要睇吓9月9日，最新iPhone的售價係幾多嘞！

另外，台積電應該都會公布，八月份的營收情況。對呢間公司，我毫不擔心，業務上一定有增長。只不過呢個增長，市場會否接受而已。美國那些大行，隻隻都係大鱷，貪心到不得了，只要台積電的表現，冇佢哋預期咁好，就會將個股價㨃落去，不過咁樣做，我反而開心，因為我已經準備咗一筆錢，隨時可以加碼買入台積電嘅股份。之前我拍片，已經講過，台積電今年 (2026)業績肯定冇問題，甚至連明年 (2027)，啲訂單都爆晒棚，同樣地冇問題。既然有咁好嘅保證，加上業績有增長，而且自己又唔貪心，呢隻股票，應該可以投資得過。我最近奉行一個投資策略，叫做「長揸短炒」，即係有一部份嘅股票，係可以攞出嚟經常做買賣，只要有錢賺就得啦，雖然唔會賺得多，但係有一種滿足感，加埋長揸股票，好彩的話，叫做賺到盡！哈哈！

對蘋果嘅股價，我不懂得預測，不過相信可以平穩，除非新嘅iPhone銷售強差人意，咁就麻煩啲。如果股價，有機會跌一成或者升一成，股價範圍大約在$290-$350之間上落，如果有機會撈底。回報率都相當唔錯，大家唔好心急，慢慢等好機會的來臨。至於台積電，我堅持睇升唔睇跌，不過如果好彩，股價能夠跌穿$400美元，我肯定會買入。而家對台積電的股價預測，有兩個水平。第一個水平，希望可以升穿歷史高位，即是$479美元，如果再樂觀啲，希望到今年年底，有機會升穿$500美元，咁就肥仔水囉！

後語

由於我的YouTube頻道，被封鎖了賺錢能力，現在一毫子都賺唔到，但係我又想同大家見面，所以就寫下散文，一來可以抒發一下，二來都仲有微博的廣告收入。所以在此希望各位俾面，睇吓文章之餘，幫手按一按文章附近的廣告，希望咁樣可以得到少量的廣告費，多謝大家幫忙，感激不盡！