Posts
News 1: 買債券是否有着數?
剛剛收到消息，澳洲儲備銀行，一致通過加息¼厘，去到4.6%。我有個朋友就發達囉，早一、兩年前，趁住個女去澳洲讀書，順便將一部份資產轉移到澳洲去。聽他講，當時的匯價大約是$4.8港元兌換一澳元。現在澳元的匯價已經攀升到$5.5港元換一澳元。點解今次要加息？ 據說有兩個原因。第一個原因，通脹仍然高企，要想辦法將佢壓返落嚟。第二個原因，中東局勢緊張，油價繼續高企，將會帶動下一輪的通脹，所以在冇辦法的情況下，只有加息去「鎮壓」。
其實加息已經係全球化嘅問題，各個國家都想盡辦法去壓抑通脹。今次澳洲繼續加息，順利嘅話，可以將通脹壓抑一下。但係要記住，加息可以鎮壓通脹，但亦都會損害其他經濟範疇。這些經濟理論，不會只在澳洲發生，全世界每一個國家，只要不斷加息，就會產生以下的麻煩。
第一個危險，消費冷卻
如果利息太高，人們都會將啲錢擺喺銀行，作為定期存款，賺取更多的利息，然後將來，先至去享受，先至去消費。但現在的消費模式會突然間煞停，人們不買東西，公司生意又怎會好呢？再推遠啲，萬一業務倒退，裁員成為必定的動作，到時肯定會令到澳洲的失業率再次提升，搵工變得越嚟越不容易。
第二個危險，投資冷卻
如果利息太高，即係借貸成本上漲。一間企業，如果計得掂條數，投資計劃可以繼續進行。但係如果一啲投資項目，原本已經係本大利小，現在遇上加息潮，好多公司都會將手上嘅投資project擱置下來，等將來減息周期展開，才可能會繼續投資步伐。呢個情況同樣地減少公司擴張的步伐，沒有擴張，就不會再請多啲人，咁樣對國家有好處嗎？
第三個危險，政府財赤加劇
加息之後，消費急降、投資殺停，跟住失業率高企。澳洲係一個福利國家，以前打工賺到錢，就要交高昂的稅率，現在沒有收入了，怎麼辦？當然係問政府攞失業救濟金。所以結局將會係，政府可能要加大支出幫助失業人士，甚至要攞更多嘅錢去支撐經濟，加上大批失業人士冇收入之後，肯定冇得交稅，政府稅收少咗一大橛，冇財赤才怪，到時政府又要發行新嘅債券支撐使費，利息高的情況下，利息嘅支出只會不斷增加，長遠一點看，將會形成惡性循環，遲早瓜老襯！美國都係咁嘅情況，只不過唔知呢張音樂椅，幾時會停落嚟而已，不過一旦停落嚟，其實已經好大鑊，效果不敢想像。
第四個危機，出口減弱
加咗息之後嘅澳元變得更值錢，即係代表買澳洲的產品，亦都相對會貴咗。澳洲產品貴咗，如果其他國家都有類似澳洲嘅產品，咁使乜向澳洲購買呢？ 肯定會轉向其他國家採購，到時澳洲嘅出口 (Exports)便會萎縮，最終可能變成貿易赤字，如果因為出口減少，肯定會有更多澳洲人會失業。我舉個例子，澳洲元太貴，去澳洲讀書嘅人都會少咗、去澳洲旅遊嘅人士都會少咗，咁就會影響澳洲嘅旅遊業，到時會有幾多人會失業？ 真係好難估計。
所以總結一下，其實加息等於服用毒藥，食得多，真係會死人。但係唔加息，控制唔到個通脹，必需品價格不斷上升，影響人類的生活，同樣會響起警號。所以呢個係一個難題。
同樣地，美國現在嘅處境和澳洲一樣，可能要不斷加息去壓抑通脹。九月份已經加過一次息，據說嚟緊嘅10月份，加息嘅機會率亦都接近七成，如果連續兩個月都加息，唔知市場會有啲咩反應呢？
目前，美國嘅10年期債券息率報價大約喺 5.24% 至 5.26% 左右。和2024年的息率大概4%，已經升咗好多。如果聯邦儲備局繼續加息，咁美國嘅經濟，我好肯定的告訴大家，一定會出事，一定的！
又用經濟學角度嚟睇，一個國家嘅政府，肯定係最穩健，所以佢發行嘅債券利率，肯定係全個國家最低的。比政府次一級實力的，便是那些大企業，例如Walmart、Google，等等賺錢能力較強的企業，因為他們有實力，所以發行債券嘅利息，只會比政府高少少。所以如果現在美國政府發行10年期債券會息率去到5.24%，那麼這些大企業發行的10年期債券，肯定比5.24%為高，可能要去到6%。
如果有實力的大企業都要用高息去吸引人們去購買債券，咁那些更次一級的企業、又或者那些中小企業，他們要借錢嘅利息，肯定高到離晒譜。邊個願意高息去借錢創業啊？所以加息只會令到國家經濟停頓下來，對整個美國經濟都不好，所以最後會點，梗係燒到去股市身上啦！
如果買債券，穩穩陣陣，有超過5%回報率，又冇風險，邊個還會去投資股票？我喺YouTube頻道裏面嘅觀眾朋友、以及喺blog裏面的讀者，都不約而同打趣的說，李澤鉅最近賣咗咁多資產，套現大筆錢返嚟，現在利息又咁高企，直程乜都唔使做，將啲錢擺晒喺債券上面，已經賺到可觀嘅回報率，使乜去投地，又用幾年時間，辛辛苦苦起好之後，又要想盡辦法去貨，何必呢！
另外，因為現在的債息高，債券價格相對較低。如果將來進入減息周期，息口會慢慢減落嚟，到時債券價格就會向上沖。如果李澤鉅睇到呢一點，現在買入大量債券，然後去等減息周期的來臨，肯定又可以大賺一筆，正宗「財息兼收」，問你死未？ 哈哈
我們作為一個普通投資者，都要顧及利息的走向，現在美股處於一個頗為危險的地步。說真的，自從特朗普上場之後，搞咗咁耐，搞嚟搞去，我都唔覺得佢幫美國喺其他國家身上攞到啲乜嘢着數返嚟，反而搞到美國自己通脹高企，好似仲衰過以前。例如最近和中國達成貿易協議，你又收我關稅，我又收返你關稅，大家都冇着數，其實搞嚟做乜嘢呢？我都唔係好明，總之侵侵冇搞到個股市，已經好幸運，但係加息，一定要影響股市，一定要小心，因為係自己嘅財富，一定要掌握喺自己手上便。
由七月份開始，原本香港每日成交金額，幾乎可以肯定有超過$3,000億港元。例如在7月9日，當天的成交金額是$3,772億港元，亦都是七月份裏面最高的一日成交金額。可惜去到7月21日，呢一日全日成交金額，竟然跌穿$3,000億港元，報$2,899億港元。呢一個情景，對我來說，有點驚訝。因為一直以來，港股嘅成交金額，都起碼有$3,000/$4,000億元左右。自從呢一個局面打開了之後，港股嘅每日成交金額，便斷斷續續的，低於$3,000億港元。七月份最低一日的成交金額是$2,098億港元，低得有點過分。整個七月份，有22個交易日，總數加起來有$67,565億港元。大家記住呢個數字，咁八月份呢？
在八月份裏面，一共有21個交易日，只有最後一個交易日，全日成交金額超過$3,000億港元，報$3,148億港元。即係話，有20個交易日，都係慘淡經營。好似已經變咗係一個常態。最低的嗰一日交易額，只有$2,107億港元，說不定，連每日$2,000億元的成交金額，都未必守得住。總括來說，八月份的總成交金額有$53,163億港元，和七月份比較，總成交金額跌了21%。
我們的九月份，尚欠一日，便會結束了。在這22個交易日裏面，已經最少有11日，每日成交金額，少於$2,000億港元。最離譜的一日，就是9月25日，中秋節，可能沒有內地資金南下，當天全日的成交金額僅僅有$1,022億港元，很想知道，會否踏入10月份的某一天，成交金額會否跌穿$1,000億港元呢？如果有一日跌穿，呢個肯定係一個奇景，亦都會相當之令人不安的。還有一天，九月份才正式完結，不過觀看每日的成交金額，九月份和八月份比較，可能要再跌多兩成，咁嘅情況，港交所嘅股價，又點會好呢？
根據資料顯示，港股的每日成交金額，令到港交所可以得到嘅收入，大約佔總收入的35% – 45%。如果計及衍生工具，近 60% – 70% 的收入與整體港股市場交投活躍度高度相關。由此可見，港股每日的成交金額低迷，係會好直接咁樣影響港交所的盈利表現。所以，它全年低位在$360港元，現在的股價是$386.8港元，即係只要股價再向下調整多7%，便會觸及和創出全年新低位，大家有興趣買呢一間公司股票的話，一定要密切留意囉！
由於我的YouTube頻道，被封鎖了賺錢能力，現在一毫子都賺唔到，但係我又想同大家見面，所以就寫下散文，一來可以抒發一下，二來都仲有微博的廣告收入。所以在此希望各位俾面，睇吓文章之餘，幫手按一按文章附近的廣告，希望咁樣可以得到少量的廣告費，多謝大家幫忙，感激不盡！
No comments:
Post a Comment