Posts
News 1: 比亞迪 (1211) 好景走到盡頭
內地新能源汽車龍頭大佬比亞迪終於等到公布中期業績。業績肯定是倒退的，但到底有多嚴重呢？我哋先看看以前的數據。在2025年9月，比亞迪管理層將原本的銷售數量從550萬架下調至460萬架，減幅大約是90萬架，或16.4%的跌幅。這樣的下調，大家看在心裏，已經覺得唔妥。
最終，2025年全年完結了，新能源車銷售量一共是460.24萬架，剛好超過之前下調至460萬架的銷售目標，自high地覺得完成任務，而且管理層還說，2025年全年的銷售量安年增長了7%，好像想叫大家都要接受呢一個銷售目標。就在2025年12月，這個月裏面銷售量有42萬架，如果同上一年比較，已經跌了18%，不是好兆頭。這還不止，其實從2025年10月份開始，銷售額已經連續跌了三個月，看落去相當大鑊。
比亞迪管理層仍然想攞返個尾彩，據說2025年全年純電動車銷售量達225萬架，據說有機會會超越美國電動車製造商Tesla，成為全球最大電動車製造商。所以即使銷售量倒退，亦都要攞返個尾彩，話俾大家知，它已經攀上世界最大電動車製造商的位置，遙遙領先，真係自high到一個不能自拔的地步。最後，2025年全年，比亞迪一共賺了接近$360億港元，和2024年的$428億元比較，已經倒退了近16%。總算好彩，因為仍然是賺錢當中。雖然還有派息，但和上年比較，派息減少九成，所以回報率低得可憐，不值一提！
踏入2026年呢？業績會改變嗎？我們就來看一看，擔保大家有驚喜。我們從2026年第一季講起吧，第一季營業額有1,502億元人民幣，銷售金額跌了近12%。而純利為41億元人民幣，倒退了55%。第一季都做得唔好，整個2026年，其實都不要抱着太大期望。
剛剛公布的上半年業績 (即是第一季加第二季的數據），營業額有3,448億元人民幣，倒退了7%，看起來，是第二季的業績有所改善，導致上半年的倒退情況亦都有改善。上半年淨利潤有123億元人民幣，倒退了超過20%。至於上半年的汽車銷售量有181萬架，如果以此推論，全年銷售量可能只有360萬架左右，比起上年的460萬架，又少了100萬架，這樣的成績，2026年的盈利表現，相信一定又會少了很多，所以它的股價，可以繼續爆升嗎？
比亞迪在2025年拆細股份， 一股大股變成三股細股，股票價格亦由當時的近$400港元一股，變成$133港元一股 (拆細之後的價格)，和現在的股價在$90港元邊緣徘徊，已經貶值了32%，高峰投資在它身上的投資者，暫時要輸錢，不過唔知可以捱幾耐才能夠翻身。如果單憑2026年估計的業績，我對股價並不樂觀，有機會繼續跌，甚至會跌到全年低位的$71.4港元一股，並不出奇！
比亞迪一直都被市場認為，是阿爺的補貼帶動它的盈利。只要這些補貼一旦縮小，甚至取消，情況可能惡劣到隨時轉盈為虧，不得不妨。內地股票市場，還有什麼公司值得投資呢？ 還有什麼公司可以創造更高的盈利呢？ 暫時仲未看到。所以一動不如一靜，留返多啲現金在手，等候機會。學李澤鉅話齋「而家咁嘅時勢，梗係現金為王」。
在8月28日出的一篇文章，其中一條新聞，提及北京首都機場 (694)，當中亦都有提及過內地三間航空公司，早一排，它們不約而同的說第二季度將會錄得虧損，至於有幾嚴重，要等待公布之後才知道，所以我一直都有同身邊朋友講，除咗國泰可以投資之外，千祈唔好多手去投資內地航空公司，蝕死都未知咩事！
今日終於看到，中國國航的半年業績。說真的，三間航空公司，我都坐過其中兩間，第一間係南方航空公司，因為機票緊張嘅關係，又要趕住返嚟香港，所以才被迫買南方航空公司的機票。飛行上冇乜大問題，淨係記得餐飲係最普通嘅排骨飯，我而家仲記得清清楚楚。第二間就係中國國航，同樣地，都係買唔到港龍航空、或者係國泰航空嘅機票，先至選擇坐中國國航。不過講真，我對呢間公司嘅服務，冇乜太大意見，應該屬於幾好的水平。可惜成為阿爺公司之後，其實賺錢或者蝕錢，對管理層來說，我相信並不重要。但係因為同時它有上市的，所以對小投資者來說，投資在它身上，現在看起來，真是惡夢連場。
回說上半年的財務狀況，營業額有892億元人民幣，增長了10.5%，看下去，經營狀況還可以。不過一說到股東純利方面，卻虧損了近23億元人民幣。根據紀錄顯示，第一季盈利有17.4億元人民幣，第二季卻錄得虧損40億元人民幣，所以最終上半年轉盈為虧，蝕了近23億元人民幣。派息方面，就更加唔使諗，自從有了疫情後，已經連續六年，沒有派過一仙的股息，買佢啲股票等收息嘅投資者，看來又要再次失望了。
一般來說，燃油成本佔航空公司總成本的30%-40%，一旦油價上升，比例就會推高，蝕本的情況，好容易就會產生。加上中東局勢持續，導致多個國家領空關閉，航線中斷，直接影響收入。政治環境不理想，例如中國和日本產生磨擦，便勸喻國民不要前往日本，甚至要取消旅程，咁航空公司就只能夠退款給顧客，生意都冇得做，又點樣可以賺錢呢？再加上，高鐵是其中一個競爭者。最近聽人講，高鐵的價錢有時比飛機票還要貴，但人們都是採用高鐵，點解呢？因為手續比較方便，亦都唔需要提早太多去到機場，加上機場通常偏離市區，到達後，還要坐車前往市中心，浪費很多時間，所以旅客都傾向坐高鐵，快靚正喎！
中國國航現價$3.97港元，離開全年低位的$3.85港元已經不遠了。如果你還是覺得呢一間公司將來會有前途，或者可以考慮跌穿一年低位，才開始慢慢落手去投資。不過正如我頭先所說，佢冇得派息，所以買入呢間公司，只能夠炒波幅，如果你運程好，搭上順風車，炒上炒落而可以贏到錢，咁係你幸運、或者你好有料到！中國國航每股資產淨值$2.712港元，比現價低水，冇乜睇頭。
直至到2025年底，它手上持有現金有159億元人民幣，啱啱公布的2026年上半年業績，還未有提及現金狀況，不過相信現金比例可能會繼續向下衝。一間咁大間嘅企業，每日嘅營運資金都需要很多，萬一資金短缺，怎麼辦？我諗到一個方法，中國國航持有29.97%國泰的股份，以現在價錢來看，應該值$267億港元。如果在市場出售，恐怕國泰的股價會向下跌。如果賣出比機構投資者，又唔知邊個會要？一係買返俾太古公司，我相信太古公司都好樂意接受呢一批股份，從此和中國國航劃清界線，可能仲好呢！
如果不能夠賣國泰股份套現，咁最後一招，就係供股集資或者配股集資，來解決資金緊絀的情況。如果供股的話，股價肯定會再向下調整，所以跌穿全年低位，一點也不出奇。如果沽出國泰的股份給機構投資者，也要俾個折扣，最後應該會累到國泰股價都有機會向下跌。不過這並不是一件壞事，如果你認為國泰嘅經營狀況冇問題，股價向下調整，反而是一個投資的好機會，所以大家應該要開始留意呢兩間公司股價的走勢啦！
News 3: Adobe (ADBE)的股價慢慢升回來
Adobe這間公司，相信有好多人都未必會太認識它，不過如果你有用過電腦，就應該會聽過PDF file，呢個就係佢其中一件產品，現在好多正式的電子文件都採用呢一個格式，其實屬於專利。例如有好多政府機構，要人民填一些表格，都是用Adobe的產品。
呢間公司，我以前都有買賣過，佢嘅股價，近年波動得好緊要，而且是不斷向下跌，相信有很多人投資在它身上，都要虧損。它的股價一直都在高位徘徊。數到上一次的高位是在2021年11月，當時的股價貼近$700美元一股，好誇張，市盈率亦都好高。其實這間公司的股價一直都徘徊在$500多美元一股，後來因為有AI的出現，人們開始擔心AI會取代這間公司現有的產品，例如Photoshop有機會比其他AI產品取代，所以股價一直向下跌，跌到阿媽都唔認得。跌到最深，是在今年二月份發生，去到$190美元，真的令人心寒。
所以我在拍YouTube片嘅時候，都有提及過這間公司，我說我不會放棄，仍然會等候一個合理的價錢，繼續「輕量級」投資在它身上。點解咁有信心呢？我嘅投資概念並不是因為它的產品不會被AI取代，所以投下信心的一票！而是董事局宣布會有一項價值$250億美元的股份回購計劃。我記得我拍片的時候，曾經講過，$250億美元的回購，等同當時Adobe整間公司超過¼的市值，所以市場上的流通股份，將會大量減少，在供求失衡的情況下，冇理由股價唔升嘅！現在終於深深體會到我的說法，最近發覺，Adobe的股價開始慢慢上升。
最新的報價，Adobe已經從低位升到去$291美元一股，這個升幅，可能和管理層已經開始回購股份有關，要等待公司遲一些公布回購股份情況，才能作實。說真的，即使沒有股份回購的因素，它本身的業績亦都沒有令人失望過。例如2026年第一季度，營業額有$64億美元，純利$18.9億美元。去到第二季，營業額有$66億美元，純利$17.12億美元。過去嗰五年 (2021-2025)，年年都有錢賺，而且還有增長。AI產品已經出來了三年，在這三年裏面，Adobe的利潤仍然有增長，所以市場上說AI會取代Adobe目前的產品，有沒有那麼悲觀呢？ 而且Adobe亦都有應用AI在它的產品身上，它並沒有挨打，至於股價會升到咩水平呢？我樂觀些又保守些，只要業績能夠保持，加上股份回購計劃繼續進行，上望$350美元一股，你估得唔得呢？ 等時間來證明吧，立此文章為照！
後語
由於我的YouTube頻道，被封鎖了賺錢能力，現在一毫子都賺唔到，但係我又想同大家見面，所以就寫下散文，一來可以抒發一下，二來都仲有微博的廣告收入。所以在此希望各位俾面，睇吓文章之餘，幫手按一按文章附近的廣告，希望咁樣可以得到少量的廣告費，多謝大家幫忙，感激不盡！
