Posts
News 1: 集中注意在小米 (1810)現金流狀況
小米 第二季的收入1,089億元人民幣，小米業務大致可以分為兩大範疇。第一個範疇是手機業務，收入有840億元人民幣，佔第二季總收入77%。第二個範疇係電動汽車，收入有249億元人民幣，佔第二季總收入23%。
做了1,089億元人民幣的生意，毛利有216億元人民幣，平均毛利率計有19.83%，叫做唔錯。不過值得注意的是，智能手機的毛利率只有8.5%，如果計及其他有關於手機的支出後，手機業務未必有錢賺。
另外，喺第二季度裏面，有兩項支出，都用多咗錢。例如，研發開支，由77.63億元人民幣提升到92.31億元人民幣。研發開支，未必係提升技術所致，好有機會係零件嘅來貨價貴咗，這肯定唔係好事。又例如，銷售及推廣開支，由77.78億元人民幣提升至86.48億元人民幣。同樣地，銷售及推廣開支增大，某程度上代表市場競爭激烈，要做多啲減價行動，提升銷售量所致，肯定都唔係一件好事。
現金流方面，小米喺第二季度尾，手持嘅現金多了，由上季未的263億元人民幣至到第二季未達372億元人民幣，這個數字比較喜出望外，即係繼續仲有錢可以頂住。值得一提的是，小米一向有回購股份的習慣，以往每次回購，金額都高達$2億元港幣，但最近的情況係，每次回購股份的金額，都不會超過$5,000萬港元。這證明了在現金流出方面，已經開始控制起來。2026年上半年，小米一共共用超過$116億港元，但似乎對股價冇乜幫助。要記住，在短期內，貿易應付帳項高達1,183億元人民幣，以現在小米的現金狀況，其實難以應付。
小米已經唔係第一次伸手問股東攞錢，而家就係要睇吓佢可以捱幾耐，先至會再向市場配股集資或供股集資。未來我仍然睇唔好它 的業務發展。手機業務，成本上升，難攪。電動汽車業務，競爭激烈，推廣銷售，都係難搞。所以在股價方面，我仍然維持它會下跌，睇吓幾時會跌穿$20元一股。
現在天氣那麼熱，以為煤氣冇乜運行，但啱啱公布的上半年業績，又唔錯喎，大家嚟睇睇有乜嘢改善了先！其實，煤氣主要業務冇乜特別進展，今次的盈利增長，最主要係靠「聯營公司業務」所帶動。上年上半年，聯營公司業務帶來$5.35億港元的收益。今年上半年，聯營公司業務帶來的收益高達$14億港元，就係呢一筆錢，令到煤氣公司業務有比較有 可觀的增長！
煤氣上半年營業額$295億元，毛利有$44.3億元，至於到股東手都仲有$36.4億元(上年同期只係賺到$29.6億元)，今次嘅每股盈利19.5仙，每股派12仙，理論上，現金流方面，已經改善了。
市場上嘅反應和我一樣，覺得煤氣公司上半年業績大有改善，超乎預期，所以帶動股價都向上升。不過我都係嗰句，上年全年賺到$56.88億元，但賺到嘅錢，都唔夠派息。今年上半年的確有所改善，但係全年呢？別忘記下半年香港天氣更加熱，用煤氣嘅機會率再細啲，所以要睇全年賺錢能力，先至可以作準。現在煤氣公司股息回報率有4.85%，係可以接受嘅，但當然，回報率再高啲就更加好啦，唯有等候機會，慢慢收集，以收息為主囉！
當一間公司仲係有錢賺嘅時候，突然間話唔派息，股價會有咩影響呢？ 唔使問阿貴都知道會跌啦。中聯通(762)而家就係咁嘅情況，啱啱公布完半年業績，賺到94.7億元人民幣，按年倒退近35%，這個已經不是一個好兆頭，再加上突然間話停止派發中期息(上年中期息派$0.31港元)，這次停止派息，據說自從2021年之後，從未發生過嘅事情。
如果和上年一樣，中期息派$0.31港元來計，中期股息大約要派$95億元港幣，唔係小數目，剛剛和它中期賺到嘅盈利差唔多。但最好笑係公司仲強調現金流冇問題，非常健康，例如經營現金淨流入329億元人民幣，提升了13.6%。
早幾年前，內地電訊股突然間話可以將派息比率提高，所以市場憧憬將來內地電訊股都會增加派息。加上內地電訊行業，基本上有賺無蝕，在自然增長的情況下，盈利不斷推高，加上派息比率增加，股息會越嚟越豐厚，所以這些公司的股價都可以向上升。2025年年初，中聯通股價爬升到每股接近$11元，但呢個利好狀態，並沒有保持，之後股價就不斷向下跌，到了今天，股價創了全年新低，報$5.5元左右，基本上是股價腰斬，上年初高價買入的投資者，身家輸一半。
如果中聯通的派息政策，可以突然間改變，咁其餘嗰兩間公司，中電信 (728)和中國移動 (941)理論上都可以改變派息政策。咁即係之前承諾嘅情況，又會再改變，好冇安全感。其實到現在為止，到底中聯通係唔會派中期股息，定係會和末期息一齊派呢？市場上還未有一個說法，所以大家要密切留意消息啦！
到底今天這三間公司的股價有何變動呢？如果中聯通股價下跌，是否代表其餘嗰兩間公司股價會向上升呢？除了內銀股一向行動一致之外，電訊股亦都係差唔多，所以大家要有一個心理準備，隨時另外兩間電訊公司業績都可能有問題，到時會唔會股價齊齊再跌呢？
nVidia係全世界最大市值的公司，超過$5.3萬億美元，暫時仲係冇其他公司可以靠近它。據說輝達將會在八月底公布季度業績。盈利增長就肯定，不過會唔會高於市場的預期，咁就好難講。美國股市神神化化，只要盈利達不到市場預期的水平，哪怕是差少少，一樣可以將股價隊到落去你難以想像的價位，不過如果你相信nVidia仍然是龍頭大佬，股價跌下來，可能並不是一件壞事，有機會俾小投資者執死雞，賺返一筆！
最新聽到消息，原本nVidia生產了50萬塊H200的晶片，準備向中國出售。後來又唔知因為咩理由，美國又唔准、中國又唔要嘅情況之下，嗰批貨就被打入冷宮，聽講嗰批晶片價值幾十億美元，雖然對nVidia的盈利影響不算太大，但始終都係錢，始終都係一批存貨，擺喺度唔用，實在太浪費了。不過，今日終於傳來好消息，中國政府批准內地企業可以買入H200晶片。據說字節跳動和騰訊 (700)率先買入，各自買入1萬塊，但係就冇講到洗咗幾多錢。不過唔緊要，中國呢邊唔講，nVidia報表，或者黃仁勳一定會講出嚟，到時咪知道nVidia可以賺幾多錢囉，當係一種額外的盈利。不過大家亦都唔好期望和中國做生意可以長做下去，隨時隨地都會突然間斷纜。
2025年7月，那個季度，nVidia賺了$246億美元。請問今年七月所公布的季度業績，nVidia會賺幾多呢？我相信起碼要賺到$600億美元，市場先會收貨，難道高唔高呢？大家唔使估，下個星期就會知。
後語
由於我的YouTube頻道，被封鎖了賺錢能力，現在一毫子都賺唔到，但係我又想同大家見面，所以就寫下散文，一來可以抒發一下，二來都仲有微博的廣告收入。所以在此希望各位俾面，睇吓文章之餘，幫手按一按文章附近的廣告，希望咁樣可以得到少量的廣告費，多謝大家幫忙，感激不盡！
No comments:
Post a Comment