Posts
News 1: 會德豐古洞樓盤是否失敗?
會德豐最近在古洞的樓盤Park Silicon未開售之前，聲勢浩大，又話有好多人入飛，報章所講，超額超過25倍，甚至或最後有成30倍，即係每一個推出的單位，有30個客人去爭奪，戰況理論上應該非常激烈，但最後結果如何呢？ 得啖笑！只能夠講，好彩會德豐已經唔係一間上市公司，如果唔係，其股價應該會跌得幾慘！
今次首輪推出99個單位，其中有18個單位屬於招標的，據說呢啲單位售價高達$23,000+一平方呎。如果反應真係咁熱烈，呢99個單位，應該一炮清袋，毫無懸念。但結果係，最初發展商話沽出56個單位，套現了超過$4億港元。但到最後埋數嘅時候，原來只確認了44個單位已經簽署了臨時買賣合約，所以銷售額最後得返$3.3億元港幣。
可能每次發展商要出售新盤的時候，都係會吹到好多人入飛，已經成為常態，呢個招數效用越嚟越細。今次發展商或超額25倍，即係大約有2,500張飛去搶99個單位。最後賣唔晒，咁你話，呢一次嘅銷售，算唔算成功呢？
係人都知道吳光正，已經退休了，將整個王國交給兒子吳宗權，不過吳光正沒有給予兒子磨練的體驗，直接推佢上去坐會德豐主席嘅位置，然後由兩位太輔吳天海和梁志堅 (兩位都是會德豐的副主席)去輔助，簡單來說，坐喺度等收錢就得啦，乜都唔使做。
其實以一間咁大嘅私人企業，吳光正現在都是79歲左右，相信體力還是可以，可以繼續做主席位置，然後俾個機會個仔做董事總經理，咁樣先至係落手落腳去訓練個仔如何運作一間公司，吳宗權現在大約48歲左右，後生到不得了，應該仲有排要學嘢。看看其他老牌家族，都係由老竇帶住個仔一段長時間，然後才放手俾個仔去打理整個家族的生意。李嘉誠都係咁做、李兆基都係咁做、甚至連新世界的鄭家純都係咁做。目的只有一個，就係要訓練個仔有能力接實支棒。
不過，都唔係淨係吳光正咁做，直接將個仔推上去主席嘅位置。恆隆地產 (101)的陳啟宗，都係咁做。陳啟宗亦都退下火線，由個仔陳文博接掌主席職位，他今年43歲，同樣有學識，年青可為，但係偏偏沒有做董事總經理呢一個實權位置，而係請一個外來有經驗的人來做，點解呢？
會唔會係吳光正和陳啟宗都有政治考慮，費事個仔唔知道點樣去解決複雜的政治問題，所以就叫佢哋坐定定，做好自己主席嘅職位就夠啦，其他公司嘅營運層面，就請啲專業人士去管理，有起事上嚟，都係由街外人幫手解決，自己煩少啲，會唔會係咁嘅情況呢？如果真係咁諗，咁呢兩位爸爸，便是一位好爸爸，因為愛子心切！
News 2: 希慎興業(0014)會唔會瀨嘢呢?
喺銅鑼灣有三大地標，標誌着銅鑼灣的繁盛，不過其中兩個座標，已經出現問題。第一個係銅鑼灣SOGO，即係細劉劉鑾鴻旗下的物業。曾經風光一事，隨着內地遊客消費態度轉變，已經不大如前。加上投資在啟德的雙子座，更是致命傷！其實，我覺得細劉當初投地時，係冇計錯數。試諗一下，啟德地區所有樓盤，都係屬於高檔，入得去住，肯定都係中產階級以上的人，消費能力一定非常強，所以喺啟德區裏面起一個雙子塔，做商場，理論上財源滾滾來，唔應該有問題，但事實呢，相差甚遠，呢啲就叫做時勢逆轉，投資高手一樣瀨嘢！
另一個銅鑼灣地標，時代廣場，屬於九龍倉置業 (1997)。這個地標，每逢大時大節，肯定是年青人的集中地。例如聖誕節和新年倒數，呢個地方肯定係最熱鬧。但係現在呢，一樣變得死氣沉沉。九龍倉置業索性Hea做，有租收就繼續收。如果要再投資重新裝修，使費過大，恐怕吳天海要再諗諗。如果可以出售的話，唔知九龍倉置業捨唔捨得呢？
最後一個地標，就係由希慎興業 (0014)所控制的利園物業群。希慎公布上半年營業額按年微跌0.1%至$17.28億元，其中商舖業務營業額按年增1.4%。 上半年經常性基本溢利按年增長1.7%至$10.49億元，基本溢利增加7.4%至$11.07億元，主要受惠於出售竹林苑住宅單位的公平值收益所帶動。維持第一次中期股息每股27仙。如無意外，全年派息每股$1.08元，和上年一樣，股息回報率大約有6.4%，算是不錯。如果年年都能夠保持派息，呢間公司都叫做穩陣！
希慎話優化後的商戶組合推動租金改善，租戶銷售額增長17%，人流增長8%，跑贏大市。截至6月底，香港商舖出租率96%，上半年的續約租金及新出租的租金水平維持上升趨勢。不過，上海利園的商舖業務部分的出租率67%，情況唔係咁理想，扣除營運支出，咁嘅出租率，應該冇乜錢賺。好彩，喺銅鑼灣地帶，呢間公司似乎仲頂得住，不過係唔係真係咁強勁呢？咁就要睇吓佢最新嘅利園八期。
據資料顯示，希慎和華懋在2021年5月以$197.8億元奪得的銅鑼灣加路連山道商業地，就是現在的利園八期。項目總面積逾100萬平方呎，預計於2026年第二季落成。希慎主席話希望當利園八期落成後，可帶動「夜繽紛」經濟，帶旺香港。 你估得唔得呢？因為連同建築費，相信利園八期總投資金額，應該唔會少過$250億元。一旦做得唔好，情況就會好似細劉咁，受到重創，分分鐘連翻身機會都冇，所以投資喺希慎身上，都要繼續觀察佢喺銅鑼灣嘅經營狀況，學李澤鉅話齋「小心駛得萬年船」，係有道理嘅！
自從台積電在8月10日公布了七月份的經營狀況後，我以為市場會大為接受，所以理論上股價應該升多啲。而事實上呢？股價的確有升，但並沒有預期的好，不過我仍然對它充滿信心，唯有靠八月份的營收情況，繼續推進它的股價。
根據財經消息指出，原來國際上已經有好多基金，不斷買入台積電的股票！點解要咁做？原因好簡單，當前的國際環境唔係咁好，但係又要投資，咁當然要搵一間穩陣嘅企業。台積電就係他們心目中理想的投資對象。無論是拍片還是寫文章，我都有提及過，台積電的管理層透露，他們的訂單是源源不絕的，2027年訂單冇問題，打後嗰兩三年，情況依然係很好的，所以只要有生意做，投資呢啲公司就唔使怕。
根據台積電今年第二季收入的分布如下。兩納米的收入只佔3%。三納米的收入佔30%，二五納米的收入佔33%。見下圖。
未來日子裏面，只要生產多啲2納米和3納米的晶片，收入就會繼續創新高，盈利亦都會係咁樣。因為到目前為止，台積電仲未遇上任何競爭對手，可以在先進納米製程晶片上和它一較高下，加上台積電並沒有放軟手腳，繼續進步，它後面的競爭對手，相信會追得好辛苦。
仲有一段好消息:「台積電目前 5.5 倍光罩尺寸 (reticle size) 的 CoWoS 已進入大量生產，多家 AI 客戶產品良率超過 98%，部分甚至達 99%；隨台積電以一年一代速度推進 CoWoS 技術，預計 2029 年將進一步邁向 14 倍光罩尺寸。」，量率越高，代表浪費越少，也就可以在成本上再改善多一點，看來有機會將毛利率再推高一點，這個肯定好消息，市場上冇理由唔接受㗎！睇吓佢嘅股價今年年底可否觸及$500美元一股先！唔係發夢㗎，因為佢嘅股價最高去到$479美元，只要再推前少少，$500美元一股就在前面不遠之處。
後語
由於我的YouTube頻道，被封鎖了賺錢能力，現在一毫子都賺唔到，但係我又想同大家見面，所以就寫下散文，一來可以抒發一下，二來都仲有微博的廣告收入。所以在此希望各位俾面，睇吓文章之餘，幫手按一按文章附近的廣告，希望咁樣可以得到少量的廣告費，多謝大家幫忙，感激不盡！
No comments:
Post a Comment