長實、香港科技探索、巴郡 (Aug 16, 2026)

 New 1: 長實 (1113)使乜高價投地

上個星期五 (即係8月14日)，長實 (1113)收市股價都要跌6.445%，報收$45元，原因係上半年業績漂亮，所有負債清除的情況下，淨係中期股息增加了5.1%，市場不能接受，所以沽售其股票。因此，長實的市值跌了超過$108億港元。市場可能認為咁樣做可以令到李澤鉅感覺到唔舒服。其實股價嘅波動，日日都有，雖然星期五股價波動得比較大啲，但係對李澤鉅影響甚微。反而長實股價大跌，比一班想低價投資的投資者，有個機會低價撈股，分分鐘遲啲發一個小橫財。

冇錯，根據長實的報表所描述，手上總現金超過$657億港元，如果扣除所欠銀行和其他債務的$438億港元，公司處於淨現金$219億港元，喺而家呢一個動盪嘅時勢，有咩好得過手揸現金，又冇負債啊！如果啲錢真係冇出路，起碼將所有債務還清，試想一下，$438億元的總債務，一年需要支出幾多利息？以平均4%的利息來支付，一年下來也要差不多$18億元的利息支出，能省回這筆利息支出，對下半年的財務表現，肯定要加分啦！

加上呢一間公司，本身都在賺錢，日日都有錢入嚟。現在手上的淨現金$219億港元只係一個開始，現金情況會越嚟越多，雖然小投資者未必可以分到特別股息，但理論上，往後的日子，每年都會加派股息，應該是可以的，所以我一直強調，要同李澤鉅鬥長命，咁就有機會贏啦，哈哈！

早前我才在YouTube拍片 (第2035集)提及中國海外 (688)高價買入紅磡地皮，將來要賣到很貴，才能翻本，我一直都在懷疑，真的要這麼高價去搶地皮嗎？至於由會德豐地產推出的古洞樓盤 (Park Silicon)，暫時推出82個單位，據說超額認購近25倍，每平方呎售價接近$18,000港元，價格有點誇張，但沒有辦法，因為會德豐地產都係高價買入地皮的，據說每平方呎，淨係地價都要$8,500元，吾賣得貴啲，好難返到本！

在長實的中期業績報告中顯示，物業發展的利潤不太好，毛利率可以低至3.5%，證實房地產生意難做，所以有時李澤鉅都講得啱，一個項目去唔去馬，最緊要計掂條數。好似以上數據所指，做房地產的利潤只得3.5%，風險又高，發展時間又長，真係要計掂條數先至好去馬。

所以長實非常之醒目，一定唔會高價搶地，反而在新界，他們擁有的農地，趁而家個勢好，攞出嚟發展，正式平靚正！例如，長實在大埔鳳園，有一塊巨大的地皮，正向城規會申請改建為住宅及康樂地帶。如果一切順利，呢個項目可以提供接近兩千個單位，到時再平平哋賣出去，又可以收返啲錢返嚟，又有樓宇供應，但價錢又唔貴。好過其他發展商，亂咁搶地。講真，長實都可能睇唔好香港嘅未來，既然以前買落平地，又可以改建成住宅，趁呢個勢，快啲套現返嚟，將來長實嘅現金，真係會多到嚇死你，到時睇吓李澤鉅仲有乜嘢藉口唔還富於小股民。

News 2: 香港科技探索 (1137)和外敵死過

HKTVmall發出盈警，預計今年上半年，最多可能虧損$8,300萬港元，比上年度虧損$2,320萬港元，多出了好多。大家都明白，它的虧損，來自市場激烈競爭，冇辦法唔打減價戰。而主要的競爭對手，可能就係由京東引起，然後其他本地公司也跟風大打減價戰。

正如HKTVmall管理層所解釋，因為擴大市場推廣 (即係減價戰)，例如有八五折優惠活動，差不多等同沒有毛利率，目的只有一樣，就係要留住客人。睇返HKTVmall，直至到2025年12月底，手頭上現金大約還有$3.5億港元，到了現在，相信現金情況進一步減少了，未來日子，點樣再繼續打減價戰落去呢？咁就真係要問吓王維基啦。他老哥之前受訪問嘅時候，戰鬥力仍然非常之強，表示他一生的經商環境都係咁惡劣，但仍然可以以小贏大，唔係靠僥倖，係靠實力。今次遇到的是京東，能否再打贏一場仗呢？ 其實未必一定要打贏，打和都叫贏，即係京東唔再打減價戰，咁世界變和平了。

又或者咁樣講吧，王維基最好唔好單打獨鬥，反正京東都已經得罪晒香港所有零售商。如果可以嘅話，當然睇吓可唔可以同百佳和惠康合作對抗外廠，借力打力，大家一齊合作，相信其他本地公司，理論上都應該要響應，咁樣先至可以解除困局。

HKTVmall蝕錢的消息，相信會令到股價再次向下。我以前用好高價錢買入呢間公司嘅股票，現在當然輸得慘痛，不過冇所謂，投資總會有贏有輸。之前買HKTVmall的股票，純粹只有一個原因，就係想支持王維基，係唔係很沒有理性的做法呢？ 我也不知道，不過我相信自己亦能夠在其他地方把輸去的錢，再贏返嚟，希望王維基都可以。

News 3: 巴郡 (BRK.B)壓住落Google身上

係人都知道巴郡追加$100億美元的投資在Google身上。到目前為止，擁有Google的股票數量達到1.06億股，成為第三大持倉股，價值高達$378億美元。就咁睇落去，每股嘅成本價大約$356美元左右，比現在最新收市價$344美元一股，似乎這批股票是蝕錢當中，不過好輕微，大家不用擔心。無獨有偶，我最近亦都在$340增加Google的持股數量。

巴郡投資理念，一向都係長線投資，所以現在持有Google，相信是要等到股價大升之後，才會出售。如果這個信念沒有錯，Google未來盈利表現亦正路的話，股價向上升，是遲早的事。話唔定，三兩年之後，Google的股價，會升一倍呢！我雖然好想投資多啲落去Google身上，可惜股數仍然未夠多，所以想食大茶飯，比較困難，只能夠睇吓會唔會再高位些，賣出股票，咁我已經好滿足了。

其實今次巴郡增加Google持股量，其中一個原因就係Anthropic 即將啟動的IPO，起碼市場盛傳估值可以高達$2萬億美元。Google持有Anthropic 15%的股權，如果在上市之後套現，拿回來的便是$3,000億美元。到時，Google嘅現金流狀況就會改善了，而且亦可以錄得投資上的巨額利潤。照這樣推斷，股價都應該向上升，所以最終巴郡的股價亦都會向上升。

我早前當巴郡的股價在$480附近左右，做過買賣，但賺錢唔多，我一賣出它的股票，現在的股價是$504美元一股，真係俾佢吹脹！

後語

由於我的YouTube頻道，被封鎖了賺錢能力，現在一毫子都賺唔到，但係我又想同大家見面，所以就寫下散文，一來可以抒發一下，二來都仲有微博的廣告收入。所以在此希望各位俾面，睇吓文章之餘，幫手按一按文章附近的廣告，希望咁樣可以得到少量的廣告費，多謝大家幫忙，感激不盡！