Posts
News 1: 港燈 (2638) 公布半年業績
長和系裏面，最低輩分就係港燈，終於公布咗2026年上半年的營運表現。收入有$59.39億港元，純利有$10.03億港元，回報率大約有16.88%，回報率相當之唔錯！每股盈利11.35仙，但派中期息有15.94仙，多於每股盈利，相信都係因為用現金流嘅方法去計算，所以可以派多啲股息比股東。翻查返過去六年的派息政策，每年都是派32.03仙，若以現在的股價來衡量，股息回報率大約有4.965%，俾政府嘅銀頭髮債券高少少，公用股就係咁㗎啦，冇得太過苛求。
其實我講咗好多次，今天的港燈，已經不是昨日的港燈。以前的港燈，是李嘉誠手上的寶貝，點解？因為透過港燈，賺咗好多錢，然後將呢啲錢，向外發展。但到了現在，港燈的歷史任務，已經完成了。
不過，香港不可能沒有電燈公司，所以這間公司會一直存在，但未必需要落在李嘉誠手中。如果將來中國政策繼續改變香港，我可以大膽預測，將來香港，中電 (002)和港燈 (2638)將會合併，然後可能比內地的電力公司吞併，相信將來嘅走勢就會是這樣！
目前港燈還是安全的，它的准許回報率，去到2033年才結束，到時李澤鉅都70歲了，李嘉誠就唔知仲會唔會喺度。所以如果中央政府允許，相信李澤鉅會喺適當嘅時候，將港燈出售。將來套現到啲錢返嚟，再作打算囉！
反正港燈，現在一年大約賺到$20億元左右，去到1號仔長和身上，其實盈利佔比非常細，真的是可有可無。順帶一提，如果李澤鉅都要將港燈交返出嚟，中電由英國嘉道理家族控制，冇理由仲可以由佢哋控制。所以以長遠嚟睇，兩間電燈公司，都會成為內地企業所控制的，信不信由你！
News 2: 小米 (1810) 現金流可能出現問題
如果大家有睇過我嘅YouTube頻道，都知道我一向不太喜歡小米這間公司！為什麼呢？原因簡單之極，其產品質量不夠好，加上佢嘅老闆雷軍，感覺上鍾意自吹自擂。還記得在網上有一條片，他被訪問當中，說出他的小米汽車，每一部份都是自主研發，並沒有抄襲。但偏偏他的小米汽車和保時捷的樣貌近乎一樣。當時保時捷的總經理還打趣的說，可能雷軍團隊和保時捷設計團隊心有靈犀，設計出近乎一樣外型的汽車來。
2025年10月，小米的股價爬上高峰，超過$60一股，總市值迫近$1.6萬億港元，仲以為他有機會問鼎中國首富的位置。也不知道是什麼力量將它的股價推到咁高，但好景不常，一年之後，小米的股價跌至$20邊緣，很多投資者都輸到趴響度。
或者這樣說吧，2024年，小米賺到$251億元。2025年，它賺到$461億元，大躍進吧，所以它的股價可以上升不如此離譜。但2026年的表現呢？據說8月18日便會公布上半年業績，到時大家便可以睇清楚它的盈利表現。
小米有兩個困局。第一，內地汽車業競爭亦都非常激烈，要鬥平去突圍而出，也不容易，更何況要賺到盈利，就更加難上加難。中國的經濟環境有幾好，相信大家心中有數，電動汽車也屬於奢侈品，它的需求和經濟增長息息相關。經濟差的時候，對奢侈品的需求，自然就會減少。
第二，手機業務受到成本不斷上升的影響。尤其最近所講的DRAM儲存記憶體成本不斷攀升，去到一個好過分的境界。就連蘋果都頂唔住，要將旗下產品加價。股神巴菲特講過，蘋果的粉絲對其產品有一種黏貼性，即係話蘋果粉會繼續買入蘋果的產品，即使蘋果加價，最多都係延遲買入產品，但並不會放棄其產品。蘋果做到這一點，小米可以嗎？小米手機價格大概在$300美元或以下，屬於中低檔產品，一旦提高手機售賣價格，客戶對小米手機有黏貼性嗎？我很懷疑！
小米一向都有回購股份，以往大約每次購入總值$2億港元的股票，但近期，回購股份的總金額，每次大約保持在$5,000萬港元左右，點解會縮咗水呢？ 我以往講過，小米要用錢嘅地方好多，它的現今水平可能正在不斷下跌。所以每次回購股份，都要攞$2億港元出來，長期來看，並不容易。所以只能減少回購股份的金額。但這個行動，亦可能驗證了其現金流狀況正在惡化當中。我不知道小米手機的國內知名度如何，但肯定不及「遙遙領先」的華為。
股價方面，仍然係嗰句，除非教得出一份令人可以接受的成績單來，否則我仍然看淡它的股價表現。未來它的股價再次靠近$20，甚至跌穿這個水平，我也覺得不足為奇，畢竟它現在的總市值，還有近$6,800億港元，可以有排跌！
News 3: Google (GOOG) 還值得投資嗎?
最近有好多人才離開Google公司，有些自己創業，有些加入競爭對手陣地，或者會造成一定的恐慌。今年五月，Google股價再次發威，升到去$400美元一股，加上最近公布的業績非常之好，理論上，股價不應該下跌的。但偏偏這個情況就是出現了，由高位持續下跌到現在的$343美元一股。
我相信當今世上所有人，每天都會用到Google的產品。例如YouTube、Google Chrome，Google Meet等產品。而且它擁有壟斷的地位，暫時沒有其他競爭對手可以威脅到它的市場佔有率。
只是市場，開始擔心它在AI競賽方面，投資太過龐大，造成現金流負數，所以要舉債度日。現在的AI市場，肯定係各家必爭之地。一係Google唔去爭取，如果要爭取，就要投入巨大資本，這個基本是肯定的。大家還記得Google Chrome嗎？ 它一直都是提供免費給人們去用，它有虧本嗎？沒有，反而越賺越多。
同樣地，現在的Google Chrome加入AI元素，也是免費給人們用的，將來將會在廣告費用上收回投資成本，而且應該會繼續獲利。所以這一場的AI資本投資是必須的，但也會造成短暫嘅痛苦，但以長遠來看，只要能攞到一個重要的市場份額，可以佔一席位，將來就應該大把世界。股神巴菲特旗下的巴郡公司，將會再投資多$100億美元落Google身上。既然巴郡團隊研究過之後，都肯落疊，我們這些小股民，如果計啱條數，應該可以搭一搭順風車。唔一定要好似巴郡咁去食大茶飯，但起碼作出少量投資，可以飲餐茶都好呀，我就是抱着這個態度去投資這間公司，也考驗下自己的眼光，不好嗎？
由於我的YouTube頻道，被封鎖了賺錢能力，現在一毫子都賺唔到，但係我又想同大家見面，所以就寫下散文，一來可以抒發一下，二來都仲有微博的廣告收入。所以在此希望各位俾面，睇吓文章之餘，幫手按一按文章附近的廣告，希望咁樣可以得到少量的廣告費，多謝大家幫忙，感激不盡！
😊😊🙇♂️🙇♂️🙏🙏
No comments:
Post a Comment