長和系列(二): 一山豈能藏二虎？

潮州人鍾意多仔，可惜李嘉誠都係得兩個仔，所以佢特別愛惜呢兩兄弟，並且重點培訓佢哋。好耐之前嘅華人傑出系列裏面，李嘉誠受訪時亦都提過，當年李澤鉅同李澤楷仲係細嘅時候，已經會帶佢哋兩個兄弟入董事局，要佢哋乖乖哋坐埋邊睇自己點樣同其他董事開會籌謀發展大計。

兩兄弟睇得多自己父親係董事局裏面點樣同人開會，好快明白開會係一件咩事。所以佢哋兩兄弟係好細嘅時候已經能夠掌握比別人多的商業知識同智慧，我一點都唔覺得出奇。

尤其係個細仔小小超，由佢一手創立電訊盈科(008)，在2001年，當科網股處於高峰狀態時，曾經創過市值高達港幣6,000億的紀錄。當時，好多人仲用嘲笑嘅口吻話李嘉誠用盡一生努力去拼搏，所得嘅財富竟然不及佢個細仔多。當時冇人會懷疑李澤楷嘅能力同實力，所以好多人瞓身去買股票，最高峰時，電訊盈科每股去到$28。當然，當科網股爆破嘅時候，電訊盈科股價竟然跌穿$1蚊，所有大戶丶散戶損失慘重，相信好多香港人都唔會忘記呢一隻死人8號仔。

話說回來，呢兩位太子爺都係含着金鎖匙出世嘅人，性格亦都比較難服侍。遠在90年代中期，其實李嘉誠嘅如意算盤係由大仔管理長實（001），細仔管理和黃（0013），咁兩兄弟一人管理一間公司，李嘉誠就可以放心交棒俾佢哋兩個。李嘉誠愛子心切，想佢哋兩位盡快上手公司業務，毅然派出自己嘅得力助手去輔助你兩位太子爺。

李嘉誠派咗當時嘅和黃大班馬世民輔助李澤楷去接掌和黃。另外，李嘉誠亦都派咗當年係李嘉誠嘅左右手周年茂輔助大太子爺李澤鉅去接掌長實。結果，天性難馴既李澤楷監生將馬世民呢個一人之下萬人之上嘅大班激走。而李澤鉅都唔好得去邊，佢亦冇因為周年茂係佢嘅太傅而尊師重道，其後更公然架空周年茂喺長實裏面嘅權力，令到周自覺冇癮，最後自動辭職。

一個係和黃大班被激走，一個係長實執行董事兼係李嘉誠嘅左右手被人架空自動走人。李嘉誠係短短時間之內已經失去左兩個重要嘅人才。但風暴並冇因為咁樣而結束，反而衍生出兩位太子爺在公司內既權利和權力鬥爭。從各方面消息所得，大太子爺李澤鉅同細太子爺李澤楷關係好一般。據聞年輕時兩兄弟喺美國求學時期，大家都係各有各住，各有各玩，兩兄弟好少走在一起，由此可推斷兩兄弟嘅感情並非要好。李嘉誠看在心，心情既無奈又心痛。

係末重組前，長實擁有49.9%和黃嘅股份。咁即係長實係母公司，而和黃係子公司。見下圖

大太子爺係母公司長實做嘢，細太子爺係和黃裏邊做嘢。咁即係個細佬始終都要聽大佬嘅說話。以李澤楷嘅性格，佢又點肯屈服係佢大佬之下。雖然李嘉誠唔係好捨得個細仔離開公司，但係亦都唔希望見到兩個仔嘅關係進一步轉差。所以唯有忍痛卑李澤楷向外闖，據聞李嘉誠將賣出亞洲衛星所賺到嘅4億美元作為李澤楷嘅創業基金，俾佢自己係出面發展。既然李澤楷已經自立門戶而去，即係佢都唔係呢個系列裏面，所以我哋都唔會再詳細講述佢之後嘅發展程況。

所謂一山不能藏二虎，細仔另謀發展，離開長實集團大本營，剩返落嚟嘅就只有大太子李澤鉅一人。李澤楷為人野馬難馴，鍾意周圍攪攪震，所以佢特別出名，名氣都俾佢大佬大。周不時都可以係八卦雜誌或者商業雜誌見到有關李澤楷嘅報道。相反，李澤鉅為人比較內斂，不愛應酬不愛說話，做事認真兼且睇落城府極深。

馬世民走了，周年茂走了，連小小超都走了。一時間，整個長實集團好似人才盡失。不過李嘉誠身邊仲有好多大內高手。一個咁大嘅公司卑大仔一個人去管理，李嘉誠不太放心。所以佢重金禮聘霍建寧返來幫佢睇住和黃，直接向佢滙報。而小超人就跟著自己繼續管理長實業務。之前講過，小超人為人城府極深，既然長實依家是自己地盤，安插自己班底是好順理成章之事。之後，小超人就多咗兩位得力助手，佢哋就係吳佳慶(右二)和趙國雄(左)。

在2015年，吳佳慶新酬達港幣$2,717萬，趙國雄比吳佳慶新酬略少，也達到年薪$2,644萬。佢哋兩個係唔係集團裏面最高人工嘅董事？當然唔係，佢哋兩個嘅人工係集團裏面只屬於一般。係李嘉誠嘅集團裏面，仲有幾個比呢兩位小超人嘅得力助手更高薪酬。佢哋包括：香港打工皇帝霍建寧，佢嘅薪酬約$2.1億元。排第二位嘅就係小超人自己，薪酬亦都得到$1.07億元。排第三位係一位女士叫胡周慕芳，佢嘅薪酬達到$5,100萬。第四位係一個叫做葉德銓既董事，佢嘅薪酬亦達到$4,900萬。

曾經有人講過，想要有高人工就要係李嘉誠嘅集團裏面做嘢，我哋可以喺呢度做一個統計，比較一下其他大型集團董事嘅人工，究竟係高啲定低啲。

李嘉誠頭馬霍建寧，薪酬$2.1億

李兆基頭馬林高演，薪酬$3,069萬

新鴻基地產綽號樓神嘅雷霆，薪酬$2,119萬

你可能會問點解霍建寧薪酬值咁高嘅？原因係佢識得幫李嘉誠賺大錢。在1999年，霍建寧幫李嘉誠出售係英國嘅電訊公司（Orange)，賺咗超過港幣$1,100億，令到李嘉誠成為當年全球最賺錢嘅富豪。在2007年，霍建寧再幫李嘉誠出售印度電信業務Hutchison Essar 67%股權比歐洲流動通訊一哥Vodafone，作價約港幣$866億元，今次交易為李嘉誠帶來約$750億元的盈利。有咁好嘅得力助手，李嘉誠點可以唔重金留住霍建寧吖。

李澤鉅除咗幫父親係長實集團裏面做管理之外，自己亦都能夠獨當一面建立一間由佢打骰嘅公司，呢間公司叫做長江基建（1038）。長江基建於1996年7月上市。李澤鉅成為長江基建嘅主席。係佢嘅帶領之下，基建不單止係中國同香港有業務，而且業務開始國際化。它投資既國家包括：英國、荷蘭、葡萄牙、澳洲、紐西蘭和加拿大都有投資項目。

而投資項目包括：能源基建、交通基建、水處理、廢物管理、配氣、配電等等。截至2016年6月底，長江基建市值為$1,700億元，已經變成長江集團裏面嘅一個重要資產。

在長江集團未改組前，長江基建（1038）直屬和黃管轄。所以即使主席是李澤鉅，但係都係屬於霍建寧嘅管轄範圍之內。見下圖

霍建寧經常被人認為係李嘉誠嘅契仔，誠哥對佢寵愛有加。但係喺李澤鉅眼中，可能並非是一件好事。所以在長實集團重組之後，長江基建已經唔再屬於霍建寧嘅管轄範圍之內，已變成直接由李澤鉅睇返。李澤鉅不單止睇返自己嘅業務，而且仲開始插手和黃其他由霍建寧管轄嘅業務。呢一個勢力的擴張慢慢形成李澤鉅在集團內掌握實權。而李嘉城和霍建寧在集團的影響力將會漸消失。一個新的話事人已經誕生了，進入了李澤鉅的新時代。

下一篇文章將會研究長和的過往業績和分析資產價值。大家不要錯過。多謝各位朋友支持。