Posts
News 1: 太古地產 (1972)起樓有質素
最近赤柱有一個豪宅盤，其中一個獨立屋，新業主進行裝修期間，竟然發現屋內的鋼筋質量，可能出現問題，所以自己搵專業建築人士測量一下，確實有問題，不過發展商睬你都有味，所以而家演變成去到屋宇署的層面。根據最新消息所指，屋宇署對這間獨立屋進行實地視察和進行不同的測試 (詳盡的測試項目在這裏不會詳細說明，反正一個普通投資者都唔會明白呢啲建築嘅規則），屋宇署最基本發現部份鋼筋配置與圖則不符。所以屋宇署暫時的結果係，這間獨立屋「未有構成明顯危險」。我就覺得好好笑，如果有明顯嘅危險，咁就已經變咗危樓啦，仲可以點可以繼續住人呢?
另外，呢個屋苑，係豪宅屋苑，呢啲獨立屋，講親都億億聲上落，唔係一句「未有構成明顯危險」就可以算數，豪宅價錢，當然要配備豪宅的質量。即係話，你俾咗好多錢去買一碗鮑魚雞粥，裏面只有雞，沒有鮑魚，難道你可以說，都是一碗粥就得啦，都食得落，唔好計較咁多啦。可唔可以咁樣講呢？當然唔可以啦。
據說何東嘅後人，有一位叫做何猶廣，動用超過$2億港元，買下其中一間獨立屋。呢個屋苑咁多間獨立屋，冇理由只有上述嗰一位新業主咁黑仔，係得佢間獨立屋結構上有問題。所以有理由相信其他獨立屋又好，其他單位又好，都有機會出現呢啲問題。所以其他已經買入呢一間公司嘅房屋，他們應該要集合力量，如果真係發現房屋結構出現問題，或者係偷工減料，貨不對辦，那麼他們應該要集體訴訟，起碼訴訟費用會平好多，而且一贏，所有業主都有着數。呢場戲，有排睇，大家拭目以待。
如果香港的建築質量是每況愈下的話，那麼那些仲有良心嘅發展商，肯落本去起樓的發展商，我哋應該要好好研究一下。雖然他們的單位，可能會賣得比較貴些，但只要和質量上掛鉤，貴少少，都係值得嘅。其中有一間我特別鍾意的發展商，就係太古地產(1972)，它起過的豪宅有蔚然 (Azura)、珒然 (Argenta)、瀚然 (AREZZO)、殷然(Alassio)、傲璇 (OPUS HONG KONG)。除了OPUS講緊要億億聲之外，其他嗰幾個單位項目，最頂級，一億元之內都有交易，買呢啲高質素嘅單位，起碼唔使擔憂。最經典嘅就係太古城啦，已經好多年歷史啦，不過有啲驗樓師喺電視節目上面都講過，唔好睇小呢啲幾十年嘅樓，佢嘅質素，比其他新樓不遑多讓，咁即係質量有保證啦。其實香港仲有好多發展商，佢哋啲樓質素都係麻麻哋，所以買樓，睇品牌都好重要。
我突然間又諗起新世界喺大圍嗰個樓盤，因為質量差，啲屋起到10樓，都要拆卸重建。一方面你可以話佢有責任心，對準業主有交代。但另一方面亦都話俾大家知，他們的監管係有問題、係有漏洞，我相信係喺迫不得已的情況之下，先至焗住要重建，有轉彎餘地，相信新世界都冇可能損失超過$10億元，去拆卸再重建，你估真係錢多咩！
太古地產股價現在大約在$24元邊緣徘徊，不過暫時冇市盈率，因為在2025年，獲得虧損$15.33億元。唔係佢基本業務有問題，係因為物業重新估值之下嘅虧損，所造成的最終虧損，對現金流冇乜大影響，不過因為虧損，講出嚟梗係唔好聽啦。說真的，這間公司在香港有大量物業收租，如果唔係因為物業重新估值嘅情況下虧損，以前它每年應該可以賺到$70億元左右。
好彩嘅係呢間公司派息相當唔錯，而且管理層拍晒心口話，以後每年派息，都會有單位數字嘅增長。既然佢咁講，我大膽假設，每年股息大約有3%-5%的增長，如果你諗住攞嚟收息的話，是一個不錯的選擇。當然，股價越低越好，理想嘅情況下，最好股價接近$20元邊緣，咁樣去買呢間公司嘅股票，就會穩陣得多啦。現在的股息回報率大約有4.87%，相信下一年，回報率應該有5%，比起好多大型發展商，例如新鴻基(0016)的3.7%，長實集團 (1113)的3.88%，太古地產都比它們優勝。
當然，投資在它身上，大前提，就係大家要對香港有最基本的信心，如果連這一點基本信心都沒有，那香港的企業，應該不適合你去投資，還是觀望多
一下吧！
今日剛剛看到一篇在明報的報道，講述內地十一黃金周，為香港帶來大量的旅客。其中文化體育及旅遊局獎羅淑佩，在電視節目中表示，今年黃金周首天有30.55萬人次訪客入境，當中內地訪客達27.7萬人次 (佔超過九成是內地遊客)，較2018年26萬人次的高峰多1.7萬人次，形容就數字而言「相當理想」。但她並沒有說，在10月1日，星期四，亦都有香港居民25.6萬人次離開香港。而且還要計數，到底呢一批離開香港的香港人消費總額會否高於同日內地遊客落來香港的總額消費。如果香港的消費高於內地人在香港的消費，其實我哋香港一啲都冇着數，仲蝕咗俾佢添。
所以這位羅局長，當然唔會提及呢一點，只會說對於全年入境訪客人次達5,380萬目標很有信心，但承認戰事令油價升，機票價格高企，使短途客來港意欲減，當局會多做宣傳。
其實最近人民幣升值，理論上，從內地落嚟香港消費，應該會覺得更加抵。問題係佢哋願唔願意消費，如果唔願意消費的話，就好似羅局長咁講，好開心見到個「量」升咗，但其實對我哋香港經濟沒有實際幫忙，不是嗎？
我舉個例子，大家在電視新聞上邊都有睇到，採訪內地人的報道，其中有一個旅行團，即日來回。其中一位旅客說得很清楚，只係俾咗幾十蚊 (相信是人民幣)，便可以落來香港還一天，沒有打算在香港過夜。大家都冇聽錯，就係幾十蚊，我哋晚餐，去茶餐廳踎，叫個餐食，最基本都要$70港元。至於呢一批窮遊的內地客，佢哋會唔會在香港消費呢？我好懷疑。無綫電視新聞，訪問在一個來自江門的大媽，問佢哋落嚟香港，消費幾多？大媽諗都冇諗嘅情況下說出了實況，四個人落嚟香港，準備消費200元，不管是什麼貨幣，每個人的消費平均也只是50元。長途跋涉落到嚟香港，呢50元，照常理推斷，交通費應該都洗咗一大半，餘下的金額，在香港可以做什麼呢？可能在麥當勞買杯雪糕食，跟住就走人啦。
我哋香港代客之道不錯的，有煙花匯演。我來一個大膽假設，假設這個煙花匯演，全部為咗內地人而設，所以由文化體育及旅遊局統籌，全長23分鐘，分8幕演出，合共發放31,888枚煙花，活動整體預算約為$1,800萬元。 呢一筆費用，係我哋嘅吸引內地客來香港消費的成本，如果有500,000內地遊客落嚟觀看這次煙花匯演，每一位內地客睇煙花匯演嘅成本係$36港元。如果佢哋純粹係搭車落嚟香港，睇完煙花表演，馬上返回內地，如果使費係少於$36港元，我哋呢一鋪又蝕咗俾佢哋。如果坐港鐵，由羅湖站到尖東站，來回車票港幣$83元，如果計埋優惠，最平$74港元就可以搭到港鐵來回啦！
如果你用跨境直通巴士的限時優惠，最平來回可以$50港元左右。另外仲要諗吓，真係有500,000個內地客落嚟香港，除咗睇煙花，睇完之後可能會製造大量嘅垃圾，需要清潔，這是香港的額外花費，加加埋埋，其實我哋冇乜着數。所以以量取勝呢一招自我催眠的方法，應該係行唔通的。你知、我知、牛頭角順嫂都知，只有那些不食人間煙火的人「不知」，所以有點無奈、更多的是唏噓，我們還是顧好自己的生活吧，其他的事情，難以在我們的掌握當中，還是算了吧！有時真的不是以量便能取勝，剛剛收到一個消息，中國足球隊和巴勒斯坦的比賽，最終以五比零輸了，14億人口，對住一個支離破碎的國家，條件上已經輸蝕我們中國很多，但在惡劣環境之下，偏偏是他們贏，我們輸。係咪人多就得呢？
由於我的YouTube頻道，被封鎖了賺錢能力，現在一毫子都賺唔到，但係我又想同大家見面，所以就寫下散文，一來可以抒發一下，二來都仲有微博的廣告收入。所以在此希望各位俾面，睇吓文章之餘，幫手按一按文章附近的廣告，希望咁樣可以得到少量的廣告費，多謝大家幫忙，感激不盡！
No comments:
Post a Comment